ຊົມເຊີຍວັນສ້າງຕັ້ງຄະນະໂຄສະນາອົບຮົມຜົ້ງສາລີ                                                                                                ຂ່ ຳ ນັບຮັບຕ້ອນກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງຜົ້ງສາລີຢ່າງສຸດໃຈ !

ເມືອງບຸນໃຕ້ ແຂວງຜົ້ງສາລີ ລົງຜັນຂະຫຍາຍຜົນສຳເລັດກອງປະຊຸມໃຫຍ່ຄັ້ງທີ XI ຂອງພັກ ຢູ່ກຸ່ມບ້ານນາມາກ

ເມືອງບຸນໃຕ້ ແຂວງຜົ້ງສາລີ

ລົງຜັນຂະຫຍາຍຜົນສຳເລັດກອງປະຊຸມໃຫຍ່ຄັ້ງທີ XI ຂອງພັກ ຢູ່ກຸ່ມບ້ານນາມາກ

        ໃນວັນທີ 18 ມິິຖຸນາ 2021 ທີ່ຜ່ານມານີ້ ຢູ່ທີ່ຫ້ອງການກຸ່ມບ້ານນາມາກ ເມືອງບຸນໃຕ້ ແຂວງຜົ້ງສາລີ ໄດ້ຈັດໃຫ້ມີການ ເຜີຍແຜ່, ເຊື່ອມຊຶມ ຜົນສຳເລັດກອງປະຊຸມໃຫຍ່ຄັ້ງທີ XI ຂອງພັກ ແລະ ຜົນສຳເລັດກອງປະຊຸມໃຫຍ່ຂອງອົງຄະນະພັກແຂວງຜົ້ງສາລີ ຄັ້ງທີ XI ຂຶ້ນຢ່າງເປັນທາງການ ໂດຍເປັນກຽດເຂົ້າຮ່ວມ

ຂອງທ່ານ ສານມະນີ ອິນດາວົງ ຮອງເລຂາພັກເມືອງ ຜູ້ຊີ້ນຳວຽກງານພັກ-ພະນັກງານ, ມີທ່ານ ຈິດສະຫວາດ ຫົ່ມສະຫວັດ ເລຂາຄະນະພັກຮາກຖານກຸ່ມບ້ານນາມາກ, ມີບັນດາທ່ານທີມງານຂັ້ນເມືອງ, ເລຂານາຍບ້ານ ພ້ອມດ້ວຍອົງການຈັດຕັ້ງບ້ານ, ອຳນວຍການໂຮງຮຽນ, ຫົວໜ້າໂຮງໝໍນ້ອຍ ພາຍໃນກຸ່ມນາມາກເຂົ້າຮ່ວມ.

        ໃນພິທີ, ທ່ານ ຈິດສະຫວາດ ຫົ່ມສະຫວັດ ເລຂາຄະນະພັກຮາກຖານກຸ່ມບ້ານນາມາກ ໃຫ້ຮູ້ວ່າ: ຈຸດປະສົງໃນການຈັດກອງປະຊຸມໃນຄັ້ງນີ້ ກໍເພື່ອເປັນການເຜີຍແຜ່ຜົນສຳເລັດຂອງກອງປະຊຸມໃຫ່ຍຄັ້ງທີ XI ຂອງພັກ ແລະ ຜົນສຳເລັດກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງຜົ້ງສາລີ ພ້ອມທັງເປັນການແນະນຳ, ທົບທວນຄືນກ່ຽວກັບການປະຕິບັດພາລະບົດບາດ, ສິດ ແລະ ໜ້າທີ່ຂອງອົງການປົກຄອງທ້ອງຖິ່ນສະບັບປັບປຸງໃໝ່ ປີ 2015 ແລະ ແນະນຳເຊື່ອມຊຶມບາງມາດຕາໃນກົດໝາຍວ່າດ້ວຍສື່ມວນຊົນ.

     ໃນໂອກາດດັ່ງກ່າວ ທ່ານ ສານມະນີ ອີນດາວົງ ຮອງເລຂາພັກເມືອງ ຜູ້ຊີ້ນຳວຽກງານພັກພະນັກງານ ໄດ້ໃຫ້ກຽດຂຶ້ນລາຍງານຜົນສຳເລັດກອງປະຊຸມໃຫຍ່ຂອງຜູ້ແທນທົ່ວປະເທດຄັ້ງທີ XI ຂອງພັກ ແລະ ຜົນສຳເລັດກອງປະຊຸມໃຫຍ່ຂອງອົງຄະນະພັກແຂວງຜົ້ງສາລີ ຄັ້ງທີ XI ເຊິ່ງທ່ານໄດ້ໃຫ້ຮູ້ວ່າ: ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ່ XI ໄດ້ດຳເນີນຢ່າງເປັນທາງການແຕ່ວັນທີ 13 ເຖິງວັນທີ 15 ມັງກອນ ປີ 2021, ກອງປະຊຸມໄດ້ດຳເນີນພາຍໃຕ້ບັນຍາກາດແຫ່ງຄວາມສາມັກຄີ, ຄວາມເປັນເອກະພາບ ແລະ ຄວາມຮັບຜິດຊອບສູງ ແລະ ສຳເລັດລົງດ້ວຍຄວາມສະຫງົບປອດໄພອັນຈົບງາມ. ກອງປະຊຸມໄດ້ຄົ້ນຄວ້າ ແລະ ຮັບຮອງເອົາບົດລາຍງານການເມືອງ ຂອງຄະນະບໍລິຫານງານສູນກາງພັກສະໄໝທີ X ແລະ ຮັບຮອງເອົາກົດລະບຽບຂອງພັກສະໄໝທີ XI ທັງຮອງຮັບການຈັດຕັ້ງປະຕິບັດແນວທາງການເມືອງຂອງພັກ, ຊຸກຍູ້ວຽກງານກໍ່ສ້າງພັກ ເຮັດໃຫ້ພັກມີຄວາມປອດໃສ, ເຂັ້ມແຂງ, ໜັກແໜ້ນ, ມີຄວາມສາມາດພຽງພໍໃນການນຳພາພາລະກິດປົກປັກຮັກສາ ແລະ ພັດ ທະນາປະເທດຊາດໃນໄລຍະໃໝ່. ກອງປະຊຸມໄດ້ເອກະພາບຢ່າງສູງເລືອກເອົາ ສະຫາຍ ທອງລຸນ ສີສຸລິດ ອະດິດນາຍົກລັດຖະມົນຕິ ເປັນເລຂາທິການໃຫຍ່ ຄະນະບໍລິຫານງານສູນກາງພັກ, ເລືອກເອົາ ສະຫາຍ ບຸນທອງ ຈິດມະນີ ເປັນຜູ້ປະຈຳການ ຄະນະເລຂາທິການສູນກາງພັກ, ໃນກອງປະຊຸມຍັງໄດ້ເລືອກປະທານ, ຮອງປະທານ, ຄະນະກວດກາສູນກາງພັກ ປະກອບດ້ວຍ 6 ສະຫາຍ ໂດຍແມ່ນສະຫາຍ ຄຳພັນ ພົມມະທັດ ເປັນປະທານ. ຕໍ່ກັບຜົນສຳເລັດກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ. ທ່ານຍັງໄດ້ເຜີຍແຜ່ຜົນສຳເລັດອງປະຊຸມໃຫຍ່ຂອງອົງຄະນະພັກແຂວງຜົ້ງສາລີ ເຊິ່ງທ່ານໄດ້ໃຫ້ຮູ້ອີກຕື່ມວ່າ ກອງປະຊຸມໃຫຍ່ຜູ້ແທນອົງຄະນະພັກແຂວງຜົ້ງສາລີ ຄັ້ງທີ XI ໄດ້ດຳເນີນໃນລະຫວ່າງວັນທີ 5-6 ຕຸລາ 2020 ຢູ່ທີ່ເທດສະບານໃໝ່ເມືອງບຸນເໜືອ ແຂວງຜົ້ງສາລີ, ກອງປະຊຸມໄດ້ດຳເນີນດ້ວຍບັນຍາກາດອັນສະຫງ່າລາສີ ແລະ ໄດ້ສິ້ນສຸດລົງດ້ວຍບັນຍາກາດອັນຈົບງາມ. ກອງປະຊຸມໄດ້ປະຊາມະຕິຢ່າງເປັນເອກະສັນເລືອກເອົາ ສະຫາຍ ຄຳຜອຍ ວັນນະສານ ເປັນເລຂາຄະນະບໍລິຫານງານພັກແຂວງ, ເລືອກເອົາ ສະຫາຍ ບົວທອງ ອຸ່ແສງຄຳ ແລະ ສະຫາຍ ທອງສີ ເສົາສຸລິພົມ ເປັນຮອງເລຂາຄະນະບໍລິຫານງານພັກແຂວງ.

        ໃນໂອກາດດຽວກັນນັ້ນ ທາງທິມງານຈາກຂັ້ນເມືອງ ກໍໄດ້ພັດປ່ຽນກັນຂຶ້ນແນະນຳບັນດາເອກະສານທີ່ກ່ຽວຂ້ອງ ເປັນຕົ້ນແມ່ນພາລະບົດບາດ, ສິດ ແລະ ໜ້າທີ່ຂອງອົງການປົກຄອງທ້ອງຖິ່ນສະບັບປັບປຸງໃໝ່ ປີ 2015 ເຊິ່ງແນະນຳໂດຍ ທ່ານ ຈິດສະຫວາດ ຫົ່ມສະຫວັດ ເລຂາຄະນະພັກຮາກຖານກຸ່ມ, ແນະນຳບັນດາແບບຟອມເກັບກຳສະຖິຕິພົນລະເມືອງພາຍໃນບ້ານ, ກົດໝາຍວ່າດ້ວຍການຈົດທະບຽນຄອບຄົວ, ກົດໝາຍວ່າດ້ວຍການເອົາເດັກມາເປັນລູກລ້ຽງ ແລະ ແນະນຳການໃຊ້ກາປະທັບຂອງບ້ານ, ການຮ່າງເອກະສານທາງການໃຫ້ບັນດາເລຂານາຍບ້ານ ແລະ ອົງການປົກຄອງບ້ານທີ່ເຂົ້າຮ່ວມ ຂຶ້ນແນະນຳໂດຍ ທ່ານ ຄຳຫຼອດ ແພສະຫວັນ ຫົວໜ້າໜ່ວຍງານບໍລິຫານ ຫ້ອງການພາຍໃນເມືອງບຸນໃຕ້ ຈາກນັ້ນ ທ່ານ ສົມຊະນະ ກົມມະແສງ ຫົວໜ້າໜ່ວຍງານຖະແຫຼງຂ່າວ ໄດ້ຂຶ້ນສະເໜີການບໍລິໂພກຂໍ້ມູນຂ່າວສານ, ເປັນຕົ້ນແມ່ນຮູບແບບຂອງຂ່າວ, ຊ່ອງທາງການຕິດຕາມຂ່າວທີ່ໜ້າເຊື່ອຖື, ປະເພດເນື້ອໃນຂ່າວ ແລະ ແນະນຳຂັ້ນຕອນການຮັບຂໍ້ມູນຂ່າວສານຈາກຂັ້ນເທິງ ເພື່ອນຳສະເໜີຂ່າວຜ່ານລະບົບໂທລະໂຄ່ງບ້ານ ໃຫ້ຊາວບ້ານໄດ້ຮັບຊາບເປັນແຕ່ລະໄລຍະ ພ້ອມນັ້ນກໍຍັງໄດ້ແນະນຳແບບຟອມກ່ຽວກັບການເກັບກຳຂໍ້ມູນດ້ານສື່ມວນຊົນ ເປັນຕົ້ນແມ່ນຂໍ້ມູນໂທລະໂຄ່ງ ແລະ ຈຳນວນຄອບຄົວທີ່ໃຊ້ເຄື່ອງຮັບສັນຍານດາວທຽມອີກດ້ວຍ.

    ໃນຕອນທ້າຍຂອງກອງປະຊຸມຍັງໄດ້ຮັບຟັງການໂອ້ລົມຂອງທ່ານ ສານມະນີ ອິນດາວົງ ຮອງເລຂາພັກເມືອງ ຜູ້ຊີ້ນຳວຽກງານພັກພະນັກງານ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ກັບຜົນສຳເລັດທີ່ທາງອົງການປົກຄອງບ້ານແຕ່ລະບ້ານພາຍໃນກຸ່ມນາມາກ ທີ່ໄດ້ເອົາໃຈໃສ່ເປັນຕົວແທນໃຫ້ແກ່ພັກ-ລັດ ໃນການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມໃນຕະຫຼອດໄລຍະທີ່ຜ່ານມາ. ພ້ອມທັງເຫັນດີເປັນເອກະພາບຕໍ່ກັບການແນະນຳເອກະສານຂອງພາກສ່ວນທີ່ກ່ຽວຂ້ອງໄດ້ສະເໜີໃນກອງປະຊຸມ. ຈາກນັ້ນທ່ານຍັງໄດ້ຮຽກຮ້ອງມາຍັງຄະນະພັກທຸກໜ່ວຍ ຈົ່ງເປັນແບບຢ່າງເຊີດຊູຄວາມເປັນແບບຢ່າງນຳໜ້າໃຫ້ແກ່ສະມາຊິກພັກ, ນຳພາສະມາຊິກພັກ ແລະ ປະຊາຊົນປະຕິບັດກົດລະບຽບຂອງພັກ, ທຳມາຫາກິນທີ່ຖືກຕ້ອງຕາມລະບຽບກົດໝາຍ, ສູ້ຊົນສ້າງໃຫ້ໜ່ວຍພັກຂອງຕົນເປັນໜ່ວຍພັກທີ່ປອດໃສ, ເຂັ້ມແຂງ, ໜັກແໜ້ນ.

ສາຍພົວພັນລາວ-ຫວຽດນາມ

ພິທີພົບປະແລກປ່ຽນບົດຮຽນລະຫວ່າງຄະນະໂຄສະນາອົບຮົມແຂວງຜົ້ງສາລີ ກັບຄະນະໂຄສະນາສຶກສາແຂວງດຽນບ່ຽນ

ເຊື່ອມຕໍ່ເວບໄຊ້ທ

ເລກໂທ ສຸກເສີນ

ແຈ້ງໄຟໄໝ້:   1190
ຕຳຫຼວດ:       1191
ລົດໂຮງໝໍ:    1195
ໄຟຟ້າ:          1199
ນໍ້າປະປາ:      1169

ຈຳນວນຄົນອອນໄລ໌ທ

ມີ 17  ຂາສັນຈອນ ແລະ ບໍ່ມີສະມາຊິກອອນໄລນ໌ ອອນໄລນ໌

ສະຖິຕິຜູ້ເຂົ້າຊົມ:

144025
ມື້ນີ້ມື້ນີ້7
ມື້ວານນີ້ມື້ວານນີ້311
ອາທິດນີ້ອາທິດນີ້1421
ເດືອນນີ້ເດືອນນີ້2818
ທັງໝົດທັງໝົດ144025

ບົດຄວາມທີ່ໄດ້ຮັບຄວາມສົນໃຈ