ການຝຶກອົບຮົມການພັດທະນາ, ຄຸ້ມຄອງ ແລະ ມອບເວັບໄຊ໌ ໃຫ້ຄະນະໂຄສະນາອົບຮົມແຂວງຜົ້ງສາລີຢ່າງເປັນທາງການ

ລາຍລະອຽດ

ສ້າງຂື້ນເມື່ອ ວັນອາທິດ, 23 ມີຖຸນາ 2019 08:54

ຂຽນໂດຍ Bounsouly Loma

ການຝຶກອົບຮົມການພັດທະນາ, ຄຸ້ມຄອງ ແລະ ມອບເວັບໄຊ໌ ໃຫ້ຄະນະໂຄສະນາອົບຮົມແຂວງຜົ້ງສາລີຢ່າງເປັນທາງການ

ໃນຕອນແລງ ຂອງວັນທີ 17 ມິຖຸນາ 2019 ກົມຂໍ້ມູນຂ່າວສານ ຂອງຄະນະໂຄສະນາອົບຮົມສູນກາງພັກ ໄດ້ມາເຄື່ອນໄຫວຝຶກອົບຮົມການພັດທະນາ, ຄຸ້ມຄອງເວັບໄຊ໌

ໃຫ້ຄະນະໂຄສະນາອົບຮົມແຂວງຜົ້ງສາລີ ຊຶ່ງນຳໂດຍ ທ່ານ ວັນຕຸລາ ຣັກນຸດ ວ່າການຫົວໜ້າກົມຂໍ້ມູນຂ່າວສານ ຄະນະໂຄສະນາອົບຮົມູນກາງພັກ ພ້ອມດ້ວຍຄະນະ.

          ການຝຶກອົບຮົມ ໄດ້ມີນັກສຳມະນາກອນຂອງຄະນະໂຄສະນາອົບຮົມແຂວງ ແລະ ບັນດາເມືອງເຂົ້າຮ່ວມຮຽນທັງໝົດມີ 20 ທ່ານ, ຍິງ 9 ທ່ານ.

1. ຈຸດປະສົງລະດັບຄາດໝາຍຂອງການຝຶກອົບຮົມ:

- ເພື່ອຍົກສູງຄຸນນະພາບວຽກງານການເມືອງ-ແນວຄິດ ເວົ້າລວມ, ເວົ້າສະເພາະ ແມ່ນການໂຄສະນາເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດຢ່າງກວ້າງຂວາງ ແລະ ທົ່ວເຖິງ ໂດຍການຜ່ານໜ້າກະດານເອເລັກໂຕຼນິກ (ເວັບໄຊສ໌) ເພື່ອຕີຖອຍການໂຈມຕີທີ່ມີຕໍ່ພັກ-ລັດ ແລະ ເຮັດໃຫ້ເພື່ອນມິດຂອງພວກເຮົານັບມື້ນັບເພີ່ມຂຶ້ນ.

- ເພື່ອແນໃສ່ເຮັດໃຫ້ພະນັກງານວິຊາການໄອທີ ຂອງຄະນະໂຄສະນາອົບຮົມແຂວງຜົ້ງສາລີ ມີຄວາມຮູ້, ຄວາມສາມາດ ເພື່ອລົງເລິກວຽກງານຂໍ້ມູນຂ່າວສານ ທາງດ້ານການນຳໃຊ້ເວັບໄຊສ໌ ແລະ ການພັດທະນາເວັບໄຊສ໌ ຮັບໃຊ້ເຂົ້າໃນການຈັດຕັ້ງປະຕິບັດວຽກງານຕ່າງໆ ໃນໄລຍະໃໝ່.

- ເພື່ອຍົກລະດັບຄວາມຮູ້ໃຫ້ພະນັກງານວິຊາການໄອທີ ຂອງຄະນະໂຄສະນາອົບຮົມແຂວງ ໃຫ້ນັບມື້ສູງຂຶ້ນ ແລະ ເຂົ້າໃຈເລິກເຊິ່ງ ເຖິງບົດບາດຂອງເຕັກໂນໂລຢີ, ຂໍ້ມູນຂ່າວສານ (ເວັບໄຊສ໌) ໄດ້ເຖິງໄພຄຸກຄາມ, ອາສະຍາກຳຕ່າງໆດ້ານໄອທີ ແລະ ວິທີ ການຮັກສາຄວາມປອດໄພຂອງຂໍ້ມູນຂ່າວສານ.

- ເພື່ອສ້າງບາດກ້າວຫັນປ່ຽນໃໝ່ ວຽກງານການເມືອງ-ແນວຄິດ ຕາມທິດຍົກສູງຄຸນນະພາບດ້ວຍການປັບປຸງເນື້ອໃນ ແລະ ການສ້າງຖານຂໍ້ມູນຂອງເວັບໄຊສ໌ ເຂົ້າໃນວຽກງານໂຄສະນາອົບຮົມຢູ່ຂັ້ນທ້ອງຖິ່ນ.

- ເພື່ອຮຽນຮູ້ການຄຸ້ມຄອງ ແລະ ການນຳໃຊ້ເວັບໄຊສ໌ ຢູ່ຂັ້ນທ້ອງຖິ່ນໃຫ້ເລິກເຊິ່ງ ເພື່ອຕອບສະໜອງໃຫ້ແກ່ວຽກງານໂຄສະນາອົບຮົມ, ໂຄສະນາຜົນງານການເຄື່ອນໄຫວດ້ານຕ່າງໆ ເຮັດໃຫ້ວຽກງານໂຄສະນາອົບຮົມ ມີຄວາມວ່ອງໄວທັນສະໄໝ ທັນກັບສະພາບຂອງວຽກງານໃນໄລຍະໃໝ່.

2. ເນື້ອໃນການຝຶກອົບຮົມ:

ເນືອໃນການຝຶກອົບຮົມ ແມ່ນກ່ຽວກັບວິທີການພັດທະນາເວັບໄຊສ໌, ການຄຸ້ມຄອງ ແລະ ການນຳໃຊ້ເວັບໄຊສ໌; ໂດຍຖືເອົາການບັນຍາຍ ແລະ ໃຫ້ນັກຝຶກອົບຮົມເຮັດຕົວຈິງໄປພ້ອມ.

+ ເອກະສານໃນການຝຶກອົບຮົມມີ:

1/. ການນຳໃຊ້ເຕັກໂນໂລຢີຂໍ້ມູນຂ່າວສານ ເຂົ້າໃນວຽກງານໂຄສະນາອົບຮົມ.

2/. ການພັດທະນາ, ການອອກແບບເວັບໄຊສ໌, ການຕັດຕໍ່ຮູບພາບ ເພື່ອເອົາລົງເວັບໄຊສ໌.

3/. ການນຳໃຊ້ ແລະ ການບໍລິຫານໜ້າກະດານຂ່າວເອເລັກໂຕຼນິກ.

4/. ການຄຸ້ມຄອງຊື່ຜູ້ໃຊ້ (User) ແລະ ການສຳຮອງຖານຂໍ້ມູນຂອງເວັບໄຊສ໌.

5/. ການຄຸ້ມຄອງ ແລະ ພັດທະນາເວັບໄຊສ໌.

ຜ່ານການຝຶກອົບຮົມ ເຫັນໄດ້ວ່ານັກສຳມະນາກອນຫຼາຍທ່ານ ໄດ້ມີຄວາມຮັບຮູ້ເພີ່ມຕື່ມກ່ຽວກັບວຽກງານໄອທີ ໂດຍສະເພາະກໍແມ່ນການສົ່ງຂໍ້ມູນຂ່າວສານ, ບົດຂ່າວ ແລະ ບັນດາເອກະ ສານຕ່າງໆ ຈາກຂະແໜງຫາຂະແໜງ, ຈາກເມືອງຫາແຂວງ ແລະ ການຂຽນບົດຂ່າວລົງເວບໄຊ ຂອງຄະນະໂຄສະນາອົບຮົມແຂວງ; ການຝຶກອົບຮົມການພັດທະນາ ແລະ ຄຸ້ມຄອງເວບໄຊ ຄັ້ງນີ້ເປັນບາດກ້າວໜຶ່ງໃນການພັດທະນາວຽກງານໄອທີ ຂອງຄະນະໂຄສະນາອົບຮົມແຂວງຜົ້ງສາລີ ເພື່ອເຊື່ອມຕໍ່ດ້ານຂໍ້ມູນຂ່າວສານກັບບັນດາຄະນະໂຄສະນາອົບຮົມແຂວງ, ຄະນະໂຄສະນາອົບຮົມສູນກາງພັກ ກໍຄືພາກສ່ວນອື່ນໆ ເພື່ອເປັນການເຜີຍແຜ່ບັນດາການເຄື່ອນໄຫວ, ຂໍ້ມູນຂ່າວສານຂອງຄະນະໂຄສະນາອົບຮົມແຂວງຜົ້ງສາລີ ໃຫ້ພາກສ່ວນ, ຂະແໜງການອື່ນ ໄດ້ຮູ້ເຖິງພາລະບົດບາດ, ສິດ, ໜ້າທີ່ ແລະ ການເຄື່ອນໄຫວພາຍໃນຄະນະໂຄສະນາອົບຮົມແຂວງຜົ້ງສາລີ.

ການຝຶກອົບຮົມ ການພັດທະນາ, ຄຸ້ມຄອງເວບໄຊໃນຄັ້ງນີ້ ໄດ້ໃຊ້ເວລາ 1 ວັນເຄິ່ງຈຶ່ງປິດລົງ ຫຼັງຈາກນັ້ນ, ກົມຂໍ້ມູນຂ່າວສານ ຂອງຄະນະໂຄະນາອົບຮົມສູນກາງພັກ ຊຶ່ງຕາງໜ້າໂດຍ ທ່ານ ວັນຕຸລາ ຮັກນຸດ ວ່າການຫົວໜ້າກົມຂໍ້ມູນຂ່າວສານ ໄດ້ມອບເວບໄຊຄະນະໂຄສະນາອົບຮົມແຂວງຜົ້ງສາລີ ຢ່າງເປັນທາງການ ໃຫ້ຄະນະໂຄສະນາອົບຮົມແຂວງຜົ້ງສາລີ ຊຶ່ງຕາງໜ້າຂຶ້ນຮັບໂດຍ ທ່ານ ນ. ຈັນມະນີ ນາມວົງ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງຜົ້ງສາລີ ພ້ອມດ້ວຍບັນດາທ່ານ ຮອງຫົວໜ້າຄະນະໂຄສະນາອົບຮົມແຂວງ.

• < ຕໍ່ໄປ
• ຕໍ່ໄປ >