ຄະນະໂຄສະນາອົບຮົມແຂວງຜົ້ງສາລີ ຮ່ວມກັບສະພາປະຊາຊົນແຂວງ ປາຖະກະຖາເລົ່າມູນເຊື້ອວັນສຳຄັນຕ່າງໆຂອງຊາດ, ຂອງພັກ

ສ້າງຂື້ນເມື່ອ ວັນອັງຄານ, 03 ກັນຍາ 2019 03:22
ຂຽນໂດຍ Bounsouly Loma

ຄະນະໂຄສະນາອົບຮົມແຂວງຜົ້ງສາລີ ຮ່ວມກັບສະພາປະຊາຊົນແຂວງ ປາຖະກະຖາເລົ່າມູນເຊື້ອວັນສຳຄັນຕ່າງໆຂອງຊາດ, ຂອງພັກ

ຕອນແລງຂອງວັນທີ 16 ສິງຫາ 2019 ຜ່ານມານີ້ ຄະນະໂຄສະນາອົບຮົມແຂວງ ໄດ້ສົມທົບກັບສະພາປະຊາຊົນແຂວງ ໄດ້ຈັດພິທີປາຖະກະຖາເລົ່າມູນເຊື້ອວັນສຳຄັນຕ່າງໆຂອງຊາດ, ຂອງພັກ ຊຶ່ງມີ 3 ເອ ກະສານຄື:

ວັນສ້າງຕັ້ງລັດຖະທຳມະນູນ ແຫ່ງ ສປປ ລາວ ຄົບຮອບ 28 ປີ (15/8/1991-15/8/2019), ວັນຍຶດອໍານາດທົ່ວປະເທດ ສປປ ລາວ ຄົບຮອບ 74 ປີ (23/8/1945-23/8/2019) ແລະ ວັນສ້າງຕັ້ງອາຊຽນຄົບຮອບ 52 ປີ (8/8/1967-8/8/2019) ຂຶ້ນທີ່ຫ້ອງປະຊຸມຂອງແຂວງ.ໂດຍການເປັນກຽດເຂົ້າຮ່ວມເປັນປະທານຂອງ ທ່ານ ປອ. ຈັນສີ ແສງສົມພູ ກຳມະການພັກແຂວງ, ຮອງປະທານສະພາປະຊາຊົນແຂວງຜົ້ງສາລີ;​ ເຂົ້າຮ່ວມໃນພິທີມີບັນດາທ່ານ ກຳມະການພັກແຂວງ, ຫົວໜ້າພະແນກ, ຮອງຫົວ ໜ້າພະແນກ, ພະນັກງານ, ສະມາຊິກພັກ, ນາຍ ແລະ ພົນທະຫານ-ຕຳຫຼວດ, ຕະຫຼອດຮອດໂຮງຮຽນ, ໂຮງໝໍ ແລະ ລັດວິ ສາຫະກິດອ້ອມຂ້າງແຂວງ ເຂົ້າຮ່ວມທັງໝົດ 154 ສະຫາຍ, ຍິງ 63 ສະຫາຍ.

         ໃນພິທີ, ທ່ານ ຈັນສີ ແສງສົມພູ ໄດ້ຫວນຄືນປະຫວັດຄວາມເປັນມາຂອງວັນລັດຖະທໍາມະນູນແຫ່ງ ສປປ ລາວ. ພາຍຫຼັງປະເທດຊາດໄດ້ຮັບການສະຖາປະນາເປັນ ສປປ ລາວ, ພັກໄດ້ວາງແນວທາງ ແລະ ນໍາພາປະຊົນ ປະຕິບັດສອງໜ້າທີ່ຍຸດທະ ສາດຄື: ປົກປັກຮັກສາ ແລະ ສ້າງສາພັດທະ ນາປະເທດຊາດ, ລັດຖະທໍາມະນູນເປັນກົດໝາຍພື້ນຖານຂອງຊາດ ທັງເປັນການຫັນເອົາແນວ ທາງການປ່ຽນແປງໃໝ່ຢ່າງຮອບດ້ານ ທີ່ມີຫຼັກການຂອງພັກປະຊາຊົນປະຕິວັດລາວ ມາເປັນກົດໝາຍ ພື້ນ ຖານຂອງລະບອບປະຊາທິປະໄຕ ປະຊາຊົນລາວ ເພື່ອສຶກສາອົບຮົມປະຊາຊົນ ບັນດາເຜົ່າໃຫ້ ຍົກສູງນ້ຳໃຈຮັກຊາດ, ຮັກລະບອບໃໝ່, ເພີ່ມທະວີຄວາມສາມັກຄີທົ່ວປວງຊົນລາວທັງຊາດ, ເຊີດຊູ ບົດບາດເປັນເຈົ້າການໃນການປົກປັກຮັກສາ ແລະ ສ້າງສາພັດທະນາປະເທດຊາດ ຕາມຈຸດໝາຍຂອງພັກທີ່ກໍານົດໄວ້; ການປະກາດໃຊ້ລັດຖະທໍາມະນູນ ເປັນເຫດການ-ການເມືອງທີ່ສໍາຄັນຂອງຊາດ, ທັງເປັນຂີດໝາຍໃໝ່ແຫ່ງການຫັນໄປສູ່ການຄຸ້ມຄອງລັດ, ຄຸ້ມຄອງສັງຄົມດ້ວຍກົດຫມາຍ ແລະ ສ້າງລັດແຫ່ງກົດໝາຍເທື່ອລະກ້າວ, ສ່ອງແສງໃຫ້ເຫັນເຖິງລັກສະນະທາດແທ້ ແລະ ການເຕີບໃຫຍ່ຂະຫຍາຍ ຕົວຂອງລະບອບປະຊາທີ່ປະໄຕ ປະຊາຊົນລາວ ພາຍໃຕ້ການນໍາພາອັນຖືກຕ້ອງຂອງພັກ ປະຊາຊົນປະຕິວັດລາວ, ທັງເປັນການຢັ້ງຢືນຕໍ່ໂລກກ່ຽວກັບຄວາມເປັນເອກະລາດ ແລະ ຜືນແຜ່ນດິນອັນຄົບຖ້ວນຂອງ ສປປ ລາວ. ໂອກາດດຽວກັນນີ້ ທ່ານ ບຸນສຸລີ ໂລມາ ຮອງຫົວໜ້າຄະນະໂຄສະນາອົບຮົມແຂວງ ຍັງໄດ້ສະເໜີປະຫວັດຄວາມເປັນມາຂອງການຍຶດອໍານາດ 23 ສິງຫາ ປີ 1945 ຊຶ່ງມີຄວາມໝາຍຄວາມສໍາຄັນຕໍ່ປະຊາຊົນລາວທັງຊາດເພາະວ່າ: ໄຊຊະນະດັ່ງກ່າວມັນແມ່ນໝາກຜົນແຫ່ງການຕໍ່ສູ້ປະຕິວັດອັນຍືດເຍື້ອຍາວນານຂອງປະຊາຊົນລາວບັນດາເຜົ່າ ພາຍໃຕ້ການນໍາພາຂອງພັກປະຊາຊົນປະ ຕິວັດລາວ ມັນແມ່ນໝາກຜົນທີ່ເກີດຈາກຄວາມກ້າຫານ, ປະດິດສ້າງ ໂດຍການນໍາໃຊ້ ໐3 ບາດຄ້ອນຍຸດທະສາດ ເພື່ອຍາດອໍານາດການປົກຄອງໃນທົ່ວປະເທດແບບ ບົວບໍ່ຊ້ຳ ນ້ຳບໍ່ຂຸ່ນ ມັນແມ່ນໄຊຊະນະ ຂອງແນວທາງປະຕິວັດອັນຖືກຕ້ອງ ແລະ ການນໍາພາອັນສະຫຼາດສ່ອງໃສຂອງພັກ, ພ້ອມດຽວກັນນັ້ນກໍ່ໄດ້ເລົ່າປະຫວັດຄວາມເປັນມາຂອງການສ້າງຕັ້ງອາຊຽນ ຊຶ່ງອາຊຽນເປັນອົງການລະຫວ່າງປະ ເທດ ຂອງອາຊີຕາເວັນອອກສ່ຽງໃຕ້ ອາຊຽນໄດ້ຮັບການສ້າງຕັ້ງຂຶ້ນໃນວັນທີ 8 ສິງຫາ 1967 ມີສະມາຊິກ 5 ປະເທດຄື: ອິນໂດນີ ເຊບມາເລເຊຍ, ຟີລິບປິນ ສິງກະໂປ ແລະ ໄທ ຫຼັງຈາກສ້າງຕັ້ງອາຊຽນຂຶ້ນແລ້ວອາຊຽນກໍໄດ້ຮັບສະມາຊິກໃໝ່ຈາກອາຊີຕາ ເວັນອອກສ່ຽງໃຕ້ເພີ່ມຕື່ມອີກ 5 ປະເທດ. ມາຮອດປັດຈຸບັນ ອາຊຽນ ມີສະມາຊິກທັງໝົດ 10 ປະເທດ; ຈຸດປະສົງ ແລະ ຫຼັກ ການພື້ນຖານຂອງອາຊຽນ ເພື່ອປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມໝັ້ນຄົງຂອງພາກພື້ນ, ເຂດອາຊີຕາເວັນອອກສ່ຽງໃຕ້ເປັນເຂດປອດອາວຸດນິວເຄຼຍ ແລະ ອາວຸດທໍາລາຍລ້າງຜານອື່ນໆ ເພື່ອເພີ່ມທະວີຄວາມສາມາດໃນການເພິ່ງຕົນເອງຂອງພາກພື້ນ ໂດຍການສົ່ງເສີມຮ່ວມມືທາງດ້ານການເມືອງ, ຄວາມໝັ້ນຄົງທາງດ້ານເສດຖະກິດ ແລະ ວັດທະນາທໍາສັງຄົມໃຫ້ກ້ວາງຂວາງ, ເຄົາລົບເອກະລາດ, ອະທິປະໄຕ, ຄວາມສະເໝີພາບ, ຜືນແຜ່ນດິນອັນຄົບຖ້ວນ ແລະ ເອກະລາດແຫ່ງຊາດຂອງແຕ່ລະປະເທດສະມາຊິກອາຊຽນ, ບໍ່ແຊກແຊງເຂົ້າກິດຈະການພາຍໃນຂອງກັນ ແລະ ກັນ ພ້ອມແກ້ໄຂຂໍ້ຂັດແຍງໂດຍສັນຕິວິທີ.