ທ່ານຮອງເຈົ້າແຂວງຜົ້ງສາລີ
ພ້ອມດ້ວຍຄະນະກໍາມະການຄຸ້ມຄອງໄພພີບັດຂັ້ນແຂວງ
ລົງຕິດຕາມຊຸກຍູ້ ແລະ ຊ່ວຍເຫຼືອເບື້ອງຕົ້ນໄພພິບັດຢູ່ເມືອງບຸນໃຕ້ ແຂວງຜົ້ງສາລີ
ດ້ວຍຄວາມເປັນຫ່ວງເປັນໄຍຂອງການນຳພັກ-ລັດແຂວງ ທີ່ມີອົງການປົກຄອງເມືອງ ກໍ່ຄືພໍ່ແມ່ປະຊາຊົນທີ່ຖືກຜົນກະທົບຈາກໄພນໍ້າຖ້ວມໃນວັນທີ 11 ກັນຍາ 2024 ທີ່ຜ່ານມານັ້ນ, ຕອນບ່າຍຂອງວັນທີ 12 ກັນຍາ 2024 ນີ້, ທ່ານ ຄໍາເຫຼັກ ໃຈອິສານ ຮອງເຈົ້າແຂວງໆຜົ້ງສາລີ, ປະທານ ຄະນະກໍາມະການຄຸ້ມຄອງໄພພີບັດຂັ້ນແຂວງ ພ້ອມດ້ວຍຄະກໍາມະການ, ກອງເລຂາ ໄດ້ລົງຕິດຕາມຊຸກຍູ້ ຊ່ວຍເຫຼືອເບື່ອງຕົ້ນ ໄພພິບັດ ຢູ່ເມືອງບຸນໃຕ້ ໂດຍມີທ່ານ ອ່ອນຄຳ ອິນແສງ ເຈົ້າເມືອງໆບຸນໃຕ້ໃຫ້ການຕ້ອນຮັບ ເຂົ້າຮ່ວມຕິດຕາມ ແລະ ປະຊຸມຮ່ວມກັນ.
ໂອກາດນີ້, ທ່ານ ອ່ອນຄຳ ອິນແສງ ເຈົ້າເມືອງໆບຸນໃຕ້ ໄດ້ລາຍງານສະພາບນໍ້າຢູ່ເມືອງໃຕ້ ເຊິ່ງທ່ານໃຫ້ຮູ້ວ່າ: ເນື່ອງຈາກຝົນຕົກຕິດຕໍ່ກັນຫຼາຍວັນເປັນບໍລິເວນກ້ວາງໃນຂອບເຂດທົ່ວແຂວງ ໂດຍສະເພາະເມືອງບຸນໃຕ້ ໄດ້ເຮັດໃຫ້ແມ່ນໍ້າຫຼາຍສາຍ ເປັນຕົ້ນແມ່ນໍ້າລານ ແລະ ນໍ້າແຫງ້ນ ທີ່ໄຫຼຜ່ານເທດສະບານເມືອງບຸນໃຕ້ ມີລະດັບນໍ້າເພີ່ມຂຶ້ນຢ່າງຕໍ່ເນື່ອງ ເວລາປະມານ 2 – 6 ໂມງເຊົ້າ ຂອງຂອງວັນທີ 11 ກັນຍາ 2024 ຈຶ່ງເຮັດໃຫ້ແມ່ນໍ້າສາຍດັ່ງກ່າວມີລະດັບຂື້ນສູງໄຫຼລົ້ນຝັງເຂົ້າຖ້ວມບ້ານເຮືອນປະຊາຊົນ,ເສັ້ນທາງ, ຕະຫຼາດ, ໂຮງຮຽນ, ສັດລ້ຽງ ແລະ ຜົນລະປູກ ໃນເຂດບ້ານ ບູນໃຕ້, ໄດ້ຮັບຄວາມເສຍຫາຍຢ່າງຫຼວງຫຼາຍ. ຕໍ່ກັບສະພາບດັ່ງກ່າວ ທາງການນຳເມືອງ ກໍ່ຄືພາກສ່ວນທີ່ກ່ຽວຂ້ອງໄດ້ລະດົມສຸມທຸກກຳລັງແຮງພ້ອມກັນສາມັກຄີ ເຂົ້າຊ່ວຍເຫຼື່ອພໍ່ແມ່ປະຊາຊົນທີ່ຖືກຜົນກະເຊິ່ງໄດ້ຍົກຍ້າຍເອົາຄົນ, ເຄື່ອງໃຊ້ຕ່າງໆ, ສັດລ້ຽງ ແລະ ພາຫະນະໄປໄວ້ບ່ອນສູງທີ່ມີຄວາມປອດໄພ.
ສຳລັບຜົນເສຍຫາຍຈາກການເກັບກຳຂໍ້ມູນເມືອງຕົ້ນຂອງຄະນະຮັບຜິດຊອບຂັ້ນເມືອງ ດ້ານພື້ນຖານໂຄງລ່າງ ເສັ້ນທາງຫຼວງແຫ່ງຊາດ 1 B ແຕ່ບ້ານ ຈຸລາວແສນໃໝ່ ຫາບ້ານອາຢາ ແມ່ນມີດິນເຈື່ອນຖົມທາງ ກຳລັງແກ້ໄຂ; ຈຸດເຂດທາງເຂົ້າບ້ານຫ້ວຍຄ່ອງມີດິນເຈື່ອນຖົມທາງ ໄດ້ແກ້ໄຂແລ້ວ; ເສັ້ນທາງແຕ່ບ້ານນາຫວາຍຫາບ້ານນາມາກ ແມ່ນທາງແຕກເປັນບາງຈຸດ ລົດໃຫຍ່ບໍ່ສາມາດໄປມາໄດ້; ເສັ້ນທາງແຕ່ບ້ານນາແຕ່ນຫາບ້ານສະໂນນໍ້າລານແມ່ນມີດິນເຈື່ອນຖົມເປັນຈຸດໆ ເຊິ່ງແຕ່ລະບ້ານບໍ່ສາມາດໄປຫາກັນໄດ້. ລະບົບໄຟຟ້າ ຢູ່ເຂດບ້ານຈຸລາວແສນໃໝ່ເສົາໄຟຟ້າຫັກ 2 ເສົາ ໄດ້ສ້ອມແປງປ່ຽນແທນແລ້ວ, ເສົາໄຟຟ້າຢູ່ເຂດກຸ່ມນາແຕ່ນ ຫັກ ບໍ່ມີໄຟຟ້າໃຊ້ເຮັດໃຫ້ການສື່ສານຢູ່ເຂດກຸ່ມດັ່ງກ່າວແມ່ນມີຄວາມຫຍຸ້ງຍາກບາງບ້ານແມ່ນບໍ່ມີສັນຍານ, ບໍ່ມີໄຟຟ້າບໍ່ສາມາດຕິດຕໍ່ຫາກັນໄດ້; ໃນນີ້ ເນື່ອງຈາກຝົນຕົກຫຼາຍ ປະຊາຊົນຢູ່ສະໂນນໍ້າລານ ເກີດອຸປະຕິເຫດ ມີເສົາໄຟຟ້າ 2 ຕົ້ນລົ້ມ ຕົ້ນໜຶ່ງທັບເດັກນ້ອຍເພດຍິງອາຍຸປະມານ 12 ປີ ເຮັດໃຫ້ຂາທັງສອງເບື້ອງຫັກ ແລະ ໄດ້ເສຍຊີວິດໃນເວລາຕໍ່ມາ; ສຳລັບບ້ານທີ່ໄດ້ຮັບຜົນກະທົບໃນເຫດການຄັ້ງນີ້ມີ: ບ້ານລ້ອງນາຍເກົ່າ, ບ້ານນາມາກ, ບ້ານນາຫວາຍ, ບ້ານໂນນບຸນກາງ, ບ້ານໂນນພູເມືອງ, ບ້ານໂພທອງ ແລະ ບ້ານບຸນໃຕ້ ຖືກຜົນກະທົບນໍ້າຖ້ວມບ້ານເປັນບາງຈຸດໂດຍສະເພາະແມ່ນພື້ນທີ່ນາ, ເຮືອນຊານບ່ອນຕ່ຳ ; ສຳລັບພື້ນທີ່ນາ, ໜອງປາ, ສ່ວນບ້ານທີ່ຖືກຜົນກະທົບໜັກ ແລະ ຮ້າຍແຮງແມ່ນ ເຂດບ້ານໂພທອງ ແລະ ບ້ານບຸນໃຕ້, ນອກຈາກນໍ້າຖ້ວມຂັງເຮືອນແລ້ວແມ່ນຕະຫຼາດກະສິກຳ ແລະ ໂຮງຮຽນປະຖົມໂພທອງເສຍຫາຍໜັກ, ໃນນີ້, ຕະຫຼາດກະສິກຳ: ໂຕະຕັ່ງຂາຍຜັກ, ເຄື່ອງກິນສຸກ, ອາຫານແຫ້ງ, ອາຫານທະເລ ແລະ ອາຫານຕ່າງໆ ຈຳນວນ 79 ຊຸດນໍ້າໄຫຼຊຸເສຍຫາຍໝົດ; ຮ້ານຂາຍເຄື່ອງຍ່ອຍ, ອາຫານທະເລ+ແຊ່ແຂງ, ອາຫານແຫ້ງ, ເຂົ້າສານ, ຮ້ານເຟີ, ຮ້ານອາຫານ, ຮ້ານຂາຍປາ, ຮ້ານຂາຍເປັດ+ໄກ່ , ຮ້ານຂາຍເຄື່ອງໂອດັອບ; ຮ້ານຂາຍໂທລະສັບ-ເຄື່ອງສຽງ, ຮ້ານເສີມສວຍ, ຮ້ານເຄື່ອງກິນສຸກ, ຮ້ານຕັດຍິບ ແລະ ຮ້ານສ້ອມແປງຕູ້ເຢັນ+ເຄື່ອງໄຟຟ້າ ລວມທັງມົດ 55 ຮ້ານ; ຖືກນໍ້າໄຫຼຊຸເຄື່ອງເສຍຫາຍເປັນຈໍານວນຫຼວງຫຼາຍ. ສຳລັບຜົນເສຍຫາຍທັງໝົດທີ່ຖືກໄພພິບັດຄັ້ງນີ້ ພາກສ່ວນທີ່ກ່ຽວຂ້ອງພວມເລັ່ງເກັບກຳຂໍ້ມູນ ເຊິ່ງບໍ່ສາມາດປະເມີນມູນຄ່າເສຍຫາຍໄດ້ທັງໝົດເທື່ອ.
ຕໍ່ກັບເຫດການດັ່ງກ່າວທາງການນຳແຂວງກໍ່ຄືຄະນະກໍາມະການຄຸ້ມຄອງໄພພີບັດ ຂັ້ນແຂວງ ໄດ້ເນັ້ນໃຫ້ອົງການປົກຄອງເມືອງເລັ່ງຊ່ວຍເຫຼື່ອຜູ້ທີ່ຖືກຜົນກະທົບໃນຄັ້ງນີ້, ສືບຕໍ່ເກັບກຳຂໍ້ມູນທີ່ເສຍໃນຄັ້ງນີ້ໃຫ້ໄວໂດຍສະເພາະດ້ານພື້ນຖານໂຄງລ່າງ, ດ້ານກະສີກຳ ແລ້ວລາຍງານຕໍ່ຂັ້ນເທິ້ງ, ສືບຕໍ່ປຸກລະດົມອົບອຸ່ນສະພາບຈິດໃຈ ຂອງຜູ້ຖືກຜົນກະທົບ, ສືບຕໍ່ແຈ້ງເຕືອນ ມາຍັງພໍ່ແມ່ປະຊາ ຊົນທີ່ອາໄສລຽບຕາມແຄມສາຍນໍ້າດັ່ງກ່າວ ໃຫ້ມີສະຕິເຝົ້າລະວັງຕໍ່ການປ່ຽນແປງຂອງສະພາບດິນຟ້າອາກາດ ຕິດຕາມລະດັບນໍ້າທີ່ອາດຈະສູງຂຶ້ນ ເຖິ່ງຂີດອັນຕະລາຍ ເພື່ອປ້ອງກັນຄວາມເສຍຫາຍ ແລະ ຮັບມືກັບໄພພິບັດທີ່ອາດຈະເກີດຂຶ້ນໃຫ້ທັນເວລາ ພ້ອມກັນຕິດຕາມຂ່າວການປ່ຽນແປງຂອງສະພາບດິນຟ້າອາກາດຈາກກົມອຸຕຸນິຍົມ ອຸທົກກະສາດ, ຈາກວິທະຍຸ, ລະບົບໂທລະໂຄ່ງ ແລະ ສື່ສັງຄົມອອນລາຍຕ່າງໆ ທີ່ເປັນທາງການ ແລະ ໜ້າເຊື່ອຖື ໃຫ້ພາກັນຍົກຍ້າຍໄປບ່ອນທີ່ສູງ ແລະ ເພື່ອຮັບປະກັນຄວາມປອດໄພທັງຊີວິດ ແລະ ຊັບສິນ. ພ້ອມກັນນີ້ທາງການນຳແຂວງ, ການນຳເມືອງພ້ອມດ້ວຍດ້ວຍຄະນະກໍ່ໄດ້ເດີນສຳຫຼວດເບິ່ງສະຖານທີ່ເກີດເຫດ ແລະ ຊອກຫາວິທີແກ້ໄຂໃນຕໍ່ໜ້າ.
ໃນໂອກາດທີ່ ທ່ານ ຮອງເຈົ້າແຂວງຜົ້ງສາລີ ພ້ອມດ້ວຍຄະນະກໍາມະການຄຸ້ມຄອງໄພພີບັດ ຂັ້ນແຂວງລົງຕິດຕາມຊຸກຍູ້ ແລະ ຊ່ວຍເຫຼືອເບື່ອງຕົ້ນໄພພິບັດຢູ່ເມືອງບຸນໃຕ້ ໄດ້ນຳເອົາເງິນສົດຈຳນວນ 20 ລ້ານກີບ, ເຄື່ອງໃຊ້ຕ່າງໆທີ່ຈຳເປັນຂອງພະແນກແຮງ ງານ ແລະ ສະຫວັດດີການສັງຄົມ ຈຳນວນ 100 ກັບລວມມູນຄ່າ 25 ລ້ານກີບ ແລະ ເຄື່ອງນຸ່ງຫົ່ມ ຂອງຫ້ອງວ່າການແຂວງ ຈຳ ນວນ 50 ຖົງ ລວມມູນຄ່າ 5 ລ້ານກີບ ມອບໃຫ້ກັບທາງອົງການປົກຄອງເມືອງຕື່ມອີກເພື່່ອສືບຕໍ່ໄປມອບໃຫ້ກັບຜູ້ທີ່ຖືກຜົນກະທົບໃນຄັ້ງນີ້.
