ທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີ

ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີ

     ວັນທີ 28 ມິຖຸນາ 2024 ນີ້, ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍຄະນະຈາກກະຊວງ ແລະ ແຂວງຈຳປາສັກ ໄດ້ມາເຄື່ອນໄຫວຢ້ຽມຢາມ ແລະ ພົບປະໂອ້ລົມເຮັດວຽກຮ່ວມກັບພະແນກອຸດສະຫາກຳ ແລະ ການຄ້າແຂວງຜົ້ງສາລີ ຢູ່ທີ່ຫ້ອງວ່າການແຂວງຜົ້ງສາລີ ໂດຍມີທ່ານ ຄຳຜອຍ ວັນນະສານ ເຈົ້າແຂວງໆຜົ້ງສາລີ ພ້ອມດ້ວຍຄະນະນຳ, ພະນັກງານລັດຖະກອນ ພະແນກອຸດສະຫາກຳ ແລະ ການຄ້າແຂວງ ແລະ ຫ້ອງການ 7 ເມືອງທົ່ວແຂວງໃຫ້ການຕ້ອນຮັບ ແລະ ເຂົ້າຮ່ວມປະຊຸມ.

     ໃນໂອກາດນີ້, ທ່ານ ທະນູຄຳ ປິດຈະວົງ ຫົວໜ້າ ພະແນກອຸດສະຫາກຳ ແລະ ການຄ້າແຂວງ ໄດ້ລາຍງານຫຍໍ້ສະພາບການຈັດຕັ້ງປະຕິບັດວຽກງານ ອຸດສາຫະກຳ ແລະ ການຄ້າ 6 ເດືອນຕົ້ນປີ 2024 ເຊິ່ງທ່ານໄດ້ຍົກໃຫ້ເຫັນການຈັດຕັ້ງປະຕິບັດວຽກງານໃຫຍ່ໆເປັນຕົ້ນແມ່ນ ວຽກງານເຊື່ອມໂຍງ, ເຊື່ອມຈອດເສດຖະກິດກັບພາກພື້ນ ແລະ ສາກົນ ເພື່ອຊອກຫາຕະຫຼາດຈຳໜ່າຍສິນຄ້າລາວ ໄດ້ສະເໜີຫາກະຊວງ ປະສານກັບກະຊວງກ່ຽວຂ້ອງ ເພື່ອຊ່ວຍຄົ້ນຄ້ວາການສົ່ງອອກພືດລະດູແລ້ງ ຢູ່ແຂວງຜົ້ງສາລີ ເປັນຕົ້ນ: ໝາກຖົ່ວເບີ, ຖົ່ວຂົນ ແລະ ຖົ່ວແປບ ຊຶ່ງບັນຫາດັ່ງກ່າວໄດ້ຮັບການແກ້ໄຂສໍາເລັດ ແລະ ໄດ້ດໍາເນີນການສົ່ງອອກເປັນປົກກະຕິແລ້ວ; ວຽກງານສົ່ງເສີມການພັດທະນາ ແລະ ຜະລິດເປັນສິນຄ້າ ຕິດພັນກັບຕະຫຼາດ ໄດ້ປະສານສົມທົບກັບ ກະຊວງ ອຄ ຊຸກຍູ້ສົ່ງເສີມຂະບວນການຜະລິດເປັນສິນຄ້າ, ການປຸງແຕ່ງພືດກະສິກໍາ, ພືດອຸດສາຫະກໍາ ແລະ ຫັດຖະກຳປຸງແຕ່ງເປັນສິນຄ້າ ຕາມທ່າແຮງບົ່ມຊ້ອນ ຢູ່ແຕ່ລະເມືອງ; ມອບໂຮງງານປຸງແຕ່ງກະສິກຳ ແລະ ປ່າໄມ້ຂັ້ນຕົ້ນ ແລະ ເພີ່ມຕຶ່ມຈຳນວນ 3 ກິດຈະການ ຕາມການຕົກລົງຂອງກະຊວງ ໃຫ້ພະແນກກະສິກໍາປ່າໄມ້ພ້ອມທັງຕິດຕາມ, ຊຸກຍູ້ ໃຫ້ບັນດາໂຮງງານອຸດສາຫະກໍາປຸງແຕ່ງດັ່ງກ່າວ ປະຕິບັດຕາມລະບຽບການຂອງກະຊວງກ່ຽວຂ້ອງ; ເຜີຍແຜ່, ແນະນໍາ ແລະ ບໍລິ ການໃຫ້ຄໍາປຶກສາຫົວໜ່ວຍ MSME ເພື່ອເຂົ້າເຖິງແຫຼ່ງທຶນບ້ວງເງິນກອງທຶນ ທສວ ແລະ ທຶນສົມທົບຈາກກອງທຶນສົ່ງເສີມ MSME ໃນການຍົກລະດັບເຄື່ອງຈັກເຕັກໂນໂລຊີ ໃຫ້ກັບກຸ່ມລູກຄ້າເປົ້າໝາຍ ຈຳນວນ 4 ຄັ້ງ, ມີ 4 ຫົວໜ່ວຍ; ວຽກງານສ້າງຄວາມເຂັ້ມແຂງ ແລະ ສະພາບແວດລ້ອມທີ່ເອື້ອອຳນວຍໃຫ້ແກ່ພາກທຸລະກິດ ໄດ້ປະຕິບັດຕາມ 7 ມາດຕະການຍຸດທະສາດ ແລະ 13 ວີທີການ ໃນການຈັດຕັ້ງປະຕິບັດດ້ວຍການເອື້ອອຳນວຍຄວາມສະດວກໃຫ້ແກ່ຂັ້ນຕອນ, ຂັ້ນຂອດ ການນຳເຂົ້າ ແລະ ສົ່ງອອກສິນຄ້າ ໃຫ້ມີຄວາມສະດວກວ່ອງໄວ; ໂດຍສົມທົບກັບພາກສ່ວນກ່ຽວຂ້ອງ ປະຕິບັດຂັ້ນຂອດການປະກອບເອກະສານນຳເຂົ້າ ແລະ ສົ່ງອອກສິນຄ້າ ຈາກ 3-4 ມື້ ມາເປັນ 1-2 ມື້; ຫຼຸດຂັ້ນຂອດການບໍລິການແຈ້ງຂື້ນທະບຽນວິສາຫະກິດຈາກ 9 ຂັ້ນຕອນ ເຫຼືອພຽງແຕ່ 3 ຂັ້ນຕອນ ແລະ ຂື້ນທະບຽນວິສາຫະກິດ ຈາກ 2-3 ເດືອນ ມາເປັນ 5 ວັນລັດຖະການ, ການຈັດຕັ້ງປະຕິບັດວຽກງານເຄັ່ງຮ້ອນຂອງລັດຖະບານ ກໍໄດ້ຜັນຂະຫຍາຍດ້ວຍການອອກຂໍ້ຕົກລົງແຕ່ງຕັ້ງຄະນະຮັບຜິດຊອບຈັດຕັ້ງປະຕິບັດວຽກງານດັ່ງກ່າວ ໂດຍມອບໝາຍໃຫ້ຄະນະພະແນກ ຮັບຜິດຊອບລົງເລິກນໍາພາຈັດຕັ້ງປະຕິບັດແຕ່ລະມາດຕະການ ໂດຍກຳນົດເປັນກິດຈະກໍາ, ໂຄງການ ແລະ ສ້າງແຜນດໍາເນີນງານໃນແຕ່ລະໄລຍະ, ພ້ອມທັງນໍາພາຈັດຕັ້ງປະຕິບັດຢ່າງມີຈຸດສຸມ ແລະ ມີຜົນສໍາເລັດທີ່ພົ້ນເດັ່ນ. ພ້ອມກັນນີ້ ຫົວໜ້າພະແນກ ອຄ ຍັງໄດ້ສະເໜີ ຕໍ່ທ່ານ ລັດຖະມົນຕີ ຊ່ວຍສະເໜີກະຊວງຊ່ວຍເຈລະຈາ ລັດຖະບານຈີນ ໃນການເປີດນໍາໃຊ້ດ່ານປາຄາ-ບ້ານຈອມ ໃຫ້ສາມາດດຳເນີນການຄ້າຊາຍແດນເປັນປົກກະຕິ; ໃຫ້ທາງກະຊວງ ຊ່ວຍຄົ້ນຄວ້າ ນຳເອົາລາຍການສິນຄ້າ: ຊາ, ໝາກແໜ່ງ, ໝາກເດືອຍ, ພືດສະມູນໄພ ທີ່ຍັງບໍ່ທັນໄດ້ຮັບຮອງ ລົງນາມໃນອະນຸສັນຍາສອງຝ່າຍ ລາວ-ຈີນ ເພື່ອເຈລະຈາເຂົ້າແຜນຮັບຮອງ ລົງນາມຕາມລະບຽບການ; ຂໍໃຫ້ກົມມາດຕະຖານ ແລະ ວັດແທກ-ຊັ່ງຜອງ ຊ່ວຍຄົ້ນຄວ້າສະໜອງອຸປະກອນໃນການວັດແທກ ທີ່ຈຳເປັນ ເປັນຕົ້ນ: ເຄື່ອງກວດຄຸນນະພາບນໍ້າມັນເຊື້ອໄຟ, ແມ່ແບບວັດແທກກົງເຕີນໍ້າປະປາ, ກົງເຕີໄຟຟ້າ 3 ເຟດ ແລະ ບັນຫາອື່ນໆອີກຈຳນວນໝື່ງ. ໃນກອງປະຊຸມ ບັນດາທ່ານທີ່ເຂົ້າຮ່ວມຈາກສູນກາງ ແລະ ທ້ອງຖິ່ນ ໄດ້ມີການປະກອບຄໍາຄິດເຫັນແລກປ່ຽນບົດຮຽນເຊິ່ງກັນ ແລະ ກັນລະຫວ່າງສູນກາງກັບທ້ອງຖິ່ນຕໍ່ກັບປະເດັ່ນທີ່ແຕ່ລະຝ່າຍໃຫ້ຄວາມສົນໃຈ ເປັນຕົ້ນແມ່ນບັນຫາຂໍ້ຫຍຸງຍາກທີ່ພົບພໍ້ ແລະ ຊອກາແນວທາງການຈັດຕັ້ງປະຕິບັດໃນຕໍ່ໜ້າໃຫ້ມີຄວາມເປັນເອກະພາບລະຫ່ວາງສູນກາງກັບທ້ອງຖິ່ນໃຫ້ມີຄວາມເປັນເອກະພາບ ແລະ ມີຜົນສຳເລັດກ່ວາເກົ່າ.

     ໃນໂອກາດດັ່ງກ່າວ ໄດ້ເຊັນບົດບັນທຶກການຮ່ວມມື ລະຫວ່າງກົມຊັບສິນທາງບັນຍາ, ກົມການຄ້າຕ່າງປະເທດ ແລະ ກົມມາດຕະ ຖານ ແລະ ວັດແທກ ຂອງກະຊວງ ອຸດສາຫະກຳ ແລະ ການຄ້າ ແລະ ພະແນກ ອຸດສາຫະກຳ ແລະ ການຄ້າ ແຂວງຜົ້ງສາລີ ຕື່ມອີກ.

( ພາບ-ຂ່າວ: ແສງຄຳ ສາລີວັນ )