ນະຄອນພູເອີ, ແຂວງຢູນນານ ແຫ່ງ ສປ ຈີນ ກັບ ແຂວງຜົ້ງສາລີ ແຫ່ງ ສປປ ລາວ
ພົບປະແລກປ່ຽນບົດຮຽນຮ່ວມກັນ ພ້ອມທັງສືບຕໍ່ຮັດແໜ້ນຄວາມສາມັກຄີ ແລະ ຮ່ວມມືກັນໃນຫຼາຍດ້ານ
ໃນວັນທີ 24 ກັນາຍາ 2024 ນີ້, ທີ່ຫ້ອງວ່າການປົກຄອງນະຄອນພູເອີ, ແຂວງຢູນນານ ແຫ່ງ ສປ ຈີນ ໄດ້ຈັດໃຫ້ມີພິທີ ພົບປະມິດຕະພາບລະຫ່ວາງຄະນະຜູ້ຂັ້ນສູງນະຄອນພູເອີ, ແຂວງຢູນນານ ແຫ່ງ ສປ ຈີນ ກັບ ແຂວງຜົ້ງສາລີ ແຫ່ງ ສປປ ລາວ ເຊິ່ງຝ່າຍນະຄອນພູເອີ ນຳໂດຍທ່ານ ວາງ ກາງ ຮອງເລຂາພັກ, ເຈົ້ານະຄອນພູເອີ, ພ້ອມດ້ວຍຄະນະ ແຂວງຜົ້ງສາລີ ນຳໂດຍ ທ່ານ ຄຳຜອຍ ວັນນະສານ ກໍາມະການສູນກາງພັກ, ເລຂາພັກແຂວງ, ເຈົ້າແຂວງຜົ້ງສາລີ ພ້ອມດ້ວນຄະນະ ແລະ ວີຊາການທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມ.
ໂອກາດນີ້, ທ່ານ ວາງ ກາງ ເຈົ້ານະຄອນພູເອີ ກໍ່ໄດ້ກ່າວສະແດງຄວາມຕ້ອນຮັບ ແລະ ຕິລາຄາສູງຕໍ່ການມາເຄື່ອນໄຫວວຽກງານຂອງຄະນະຜູ້ແທນແຂວງຜົ້ງສາລີໃນຄັ້ງນີ້, ເຊິ່ງເປັນການເສີມຂະຫຍາຍສາຍພົວພັນມິດຕະພາບ, ຄູ່ຮ່ວມມືຍຸດທະສາດຮອບດ້ານ, ໝັ້ນຄົງ ແລະ ຍາວນານ ຕາມທິດ 4 ດີ; ຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ເວົ້າລວມ, ເວົ້າສະເພາະ ນະຄອນພູເອີ – ແຂວງຜົ້ງສາລີ. ພ້ອມກັນນັ້ນທັງສອງຝ່າຍກໍ່ລາຍງານສະພາບຈຸດພິເສດ ແລະ ການພັດທະນາເສດຖະກິດ – ສັງຄົມໃຫ້ກັນຊາບ, ພ້ອມທັງໄດ້ແລກປ່ຽນບົດຮຽນເຊິ່ງກັນ ແລະ ກັນ ໃນໄລຍະຜ່ານມາຂອງແຕ່ລະຂົງເຂດວຽກງານ, ກອງປະຊຸມທີ່ມີຄວາມໝາຍຄວາມສໍາຄັນ ສອງຝ່າຍໄດ້ທົບທວນຕີລາຄາຄືນບັນດາໝາກຜົນການພົວພັນຮ່ວມມື ກໍ່ຄືການຈັດຕັ້ງປະຕິບັດເນື້ອໃນບົດບັນ ທຶກກອງປະຊຸມພົບປະມິດຕະພາບ ຄັ້ງທີ VI ລະຫວ່າງຄະນະຜູ້ແທນ ແຂວງຜົ້ງສາລີ ກັບ ຄະນະຜູ້ແທນ ນະຄອນພູເອີ ຄັ້ງວັນທີ 29 ທັນວາ 2019 ຢູ່ແຂວງຜົ້ງສາລີຜ່ານມາ; ຊຶ່ງສອງຝ່າຍເຫັນດີເປັນເອກະພາບຮ່ວມກັນວ່າຈະສືບຕໍ່ປົກປັກຮັກສາຄວາມສະເໝີພາບ, ຄວາມເປັນລະບຽບຮຽບຮ້ອຍລຽບຕາມຊາຍແດນສອງຝ່າຍ, ຊຸກຍູ້ ແລະ ປະກອບສ່ວນໃນການພັດທະນາເສດຖະກິດ – ສັງຄົມ ໃຫ້ມີບາດກ້າວຂະຫຍາຍຕົວເທື່ອລະກ້າວຕາງຝ່າຍຕາງໄດ້ຮັບຜົນປະໂຫຍດ.
ພ້ອມກັນນີ້, ກອງປະຊຸມທັງສອງຝ່າຍໄດ້ພ້ອມກັນປຶກສາຫາລື ຕໍ່ທິດທາງແຜນການຮ່ວມມືໃນຕໍ່ໜ້າເປັນຕົ້ນແມ່ນ ສອງຝ່າຍເຫັນດີເປັນເອກະພາບ ເພີ່ມທະວີການຮ່ວມມືມິດຕະພາບຮອບດ້ານກັບບັນດາຂະແໜງການ, ເມືອງ ແລະ ບ້ານລະຫວ່າງ ແຂວງຜົ້ງສາລີ ກັບ ນະຄອນພູເອີ ໃຫ້ໄດ້ພົບປະຢ້ຽມຢາມເຊິ່ງກັນ ແລະ ກັນ ເປັນປົກກະຕິ; ສອງຝ່າຍພ້ອມກັນສະໜັບສະໝູນການນຳສະເໜີຂັ້ນເທິງອະນຸມັດສ້າງຕົວເມືອງມິດຕະພາບ ລະຫວ່າງ ເມືອງຍອດອູ, ແຂວງຜົ້ງສາລີ ແຫ່ງ ສປປ ລາວ ກັບ ເມືອງຈຽງເຊິນ, ນະຄອນພູເອີ, ແຂວງຢຸນນານ ແຫ່ງ ສປ ຈີນ ແລະ ພະຍາຍາມຊຸກຍູ້ໃຫ້ໄດ້ເຊັນສັນຍາແຮກສ່ຽວມິດຕະພາບ ກ່ອນປີ 2026, ສອງຝ່າຍເຫັນດີເພີ່ມທະວີການຮ່ວມມືພັດທະນາບໍ່ແຮ່; ການຮ່ວມມືເປີດຕະຫຼາດນັດແລກປ່ຽນສິນຄ້າລຽບຊາຍແດນ; ເພີ່ມທະວີການຮ່ວມມືຜະລິດຕະພັນກະສິກຳ ແລະ ປຸງແຕ່ງ; ດຳເນີນການຮ່ວມມືຜະລິດໄຟຟ້າແສງຕາເວັນ; ສືບຕໍ່ໃຫ້ຂະແໜງການກະສິກຳ ແລະ ປ່າໄມ້ ສອງຝ່າຍຮ່ວມມືກັນຝຶກອົບຮົມການຕ້ານ ແລະ ສະກັດກັ້ນພະຍາດສັດ, ພຶດລຽບຕາມຊາຍແດນ, ສອງຝ່າຍຮ່ວມກັນລົງທຶນການຜະລິດພືດເປັນອາຫານ, ພືດອຸດສາຫະກຳ, ການສົງເສີມປູກ ແລະ ປຸງແຕ່ງຢາພື້ນເມືອງ ເພື່ອຮ່ວມມືແລກປ່ຽນການຈໍາໜ່າຍຕົວຈິງ; ເພີ່ມທະວີການຮ່ວມມືວຽກງານຄົມມະນາຄົມ-ຂົນສົງ: ສືບຕໍ່ຊຸກຍູ້ການຮ່ວມການຂົນສົງລະຫວ່າງຊາດ, ສະໜັບໜູນຟື້ນຟູການຂົນສົງໂດຍສານແຕ່ເມືອງຍອດອູ ຫາ ເມືອງຈຽງເຊິນ, ຊຸກຍູ້ການເປີດສາຍຂົນສົງໂດຍສານແຕ່ພູເອີ ຫາ ຜົ້ງສາລີ; ສືບຕໍ່ຊຸກຍູ້, ເປີດກວ້າງການເຂົ້າ-ອອກຄົນ, ສິນຄ້າ ຜ່ານດ່ານເມືອງຄຳ-ລານຕຸ້ຍ ໃຫ້ເພີ່ມຂຶ້ນ, ສືບຕໍ່ສະເໜີຂັ້ນເທິງອະນຸມັດນະໂຍບາຍອອກວິຊາກັບດ່ານໂດຍໄວເພື່ອເປີດກວ້າງໃຫ້ປະລິມານຄົນ, ສິນຄ້າຜ່ານດ່ານເພີ່ມຂຶ້ນ, ເພີ່ມທະວີການປ້ອງກັນປ່າໄມ້ໃນຂົງເຂດຊາຍແດນ ພ້ອມທັງຮັກສາສິ່ງແວດລ້ອມ ດ້ວຍການສ້າງກົນໄກປະສານງານປ້ອງກັນຜົນກະທົບສິ່ງແວດລ້ອມຕາມລຽບຊາຍແດນ, ເພີ່ມທະວີການປົກປັກຮັກສາຊັບພະຍາກອນສັດນ້ຳ, ສັດປ່າ ໃນຂອບເຂບສະຫງວນ, ຕິດຕາມສົ່ງຂ່າວປະສານງານການເຄື່ອນຍ້າຍຂອງສັດ, ນະຄອນພູເອີ ເຫັນດີສືບຕໍ່ຊ່ວຍຈັດຝຶກອົບຮົມວິຊາອາຊີບໃຫ້ແກ່ແຂວງຜົ້ງສາລີ ຕາມສະພາບຄວາມຕ້ອງການຕົວຈິງ, ພ້ອມກັນນີ້ນະຄອນພູເອີສືບຕໍ່ໃຫ້ທຶນການສຶກສາແກ່ແຂວງຜົ້ງສາລີໃນແຜນແຕ່ປີ 2024 – 2027 ປີລະ 10 ທຶນ ໄປສຶກສາວິຊາສະເພາະທີ່ມະຫາວິທະຍາໄລພູເອີ, ສືບຕໍ່ເພີ່ມທະວີຮ່ວມມືການທ່ອງທ່ຽວຂ້າມແດນ 1 ມື້ພາຍໃນເມືອງຍອດອູ ຫາ ເມືອງຈຽງເຊິນ,ວຽກງານຄຸ້ມຄອງດ່ານ ແລະ ຊາຍແດນ ສອງຝ່າຍ ສືບຕໍ່ຈັດຕັ້ງຜັນຂະຫຍາຍສົນທິສັນຍາ ວ່າດ້ວຍການຄຸ້ມຄອງຊາຍແດນ ລະຫວ່າງ (ສປປ ລາວ ກັບ ສປ ຈີນ ) ໃຫ້ເປັນຢ່າງດີ, ສືບຕໍ່ຊຸກຍູ້ກອງບັນຊາການຕໍາຫຼວດ, ກອງປ້ອງກັນຊາຍແດນ ແລະ ພາກສ່ວນຄຸ້ມຄອງດ່ານເພີ່ມທະວີການແລກປ່ຽນຂໍ້ມູນຂ່າວສານ, ແລກປ່ຽນບົດຮຽນປະສົບການ, ຊ່ວຍອຳນວຍຄວາມສະດວກໃຫ້ການເຂົ້າ-ອອກດ່ານຖືກຕ້ອງຕາມກົດໝາຍ; ພ້ອມກັນປະສານສົມທົບປຶກສາຫາລືແກ້ໄຂບັນຫາ ທີ່ເກີດຂຶ້ນຢູ່ລຽບຊາຍແດນ, ເພີ່ມທະວີສະກັນການລັກລອບເຂົາອອກ, ການຄ້າມະນຸດ, ການຕົວະຢົວະລອກລວງດ້ານຂໍ້ມູນຂ່າວສານ, ບັນຫາຢາເສບຕິດ ແລະການເຄື່ອນໄຫວກະທຳຜິດຕໍ່ກົດໝາຍອື່ນໆ.
ໃນກອງປະຊຸມດັ່ງກ່າວສອງຝ່າຍໄດ້ຮ່ວມກັນລົງນາມເຊັນບົດບັກທຶກການຮ່ວມມືໃນຕໍ່ໜ້າຕື່ມອີກ ເຊິ່ງຕາງໜ້າອົງການປົກຄອງແຂວງຜົ້ງສາລີ ແຫ່ງ ສປປ ລາວ ເຊັນໂດຍທ່ານ ຄຳຜອຍ ວັນນະສານ ເຈົ້າແຂວງຜົ້ງສາລີ ແລະ ຝ່າຍນະຄອນພູເອີ, ແຂວງຢຸນນານ ແຫ່ງ ສປ ຈີນ ເຊັນໂດຍທ່ານ ວາງ ກາງ ຮອງເລຂາພັກ, ເຈົ້ານະຄອນພູເອີ; ພ້ອມກັນນີ້ ບັນດາຂະແໜງການທີ່ກ່ຽວຂ້ອງກໍ່ໄດ້ຮ່ວມລົງນາມ ເປັນຕົ້ນແມ່ນກ່ຽວ ກັບການປົກປັກຮັກສາລະບົບນິເວດ ແລະ ສິ່ງແວດລ້ອມລຽບຊາຍແດນ ລະຫວ່າງ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງຜົ້ງສາລີ ກັບ ຫ້ອງການນິເວດວິທະຍາ ແລະ ສິ່ງແວດລ້ອມ ນະຄອນພູເອີ; ການຮ່ວມມືທາງດ້ານການຂົນສົ່ງສາກົນທາງບົກແບບສະດວກ ລະຫວ່າງ ຫ້ອງການຄົມມະນາ ແລະ ຂົນສົ່ງ ນະຄອນ ພູເອີ ກັບ ພະແນກໂຍທາທິການ ແລະ ຂົນສົ່ງແຂວງຜົ້ງສາລີ ແລະ ການປ້ອງກັນ ແລະ ຄວບຄຸມອັກຄີໄພ, ຄວບຄຸມສັດຕູພືດປ່າໄມ້ ແລະ ທົ່ງຫຍ້າ ລະຫວ່າງພະແນກກະສິກຳ ແລະ ປ່າໄມ້ ແຂວງຜົ້ງສາລີ ກັບ ຫ້ອງການປ່າໄມ້ ແລະ ຫຍ້າ ນະຄອນພູເອີ ໂດຍຊ່ອງໜ້າຈາກພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຄີພິຍານ.
ຂ່າວ: ແສງຄຳ ສາລີວັນ
