ປະກາດແຕ່ງຕັ້ງທ່ານ ນ. ພອນສະຫວັນ ສັກຕິຄຸນ ເປັນຫົວໜ້າຄະນະໂຄສະນາອົບຮົມ ແຂວງຜົ້ງສາລີ ຄົນໃໝ່
ພິທີ ມອບ-ຮັບໜ້າທີ່ ລະຫ່ວາງ ຫົວໜ້າຄະນະໂຄສະນາອົບຮົມ ແຂວງຜົ້ງສາລີ ຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນໃນຕອນເຊົ້າຂອງ ວັນທີ 8 ພະຈິກ 2024 ນີ້, ທີ່ຫ້ອງປະຊຸມຂອງໂຄສະນາອົບຮົມແຂວງ ໂດຍການເຂົ້າຮ່ວມຂອງ ທ່ານ ບຸນທະວີ ສໍສຸກັນ ກຳມະການປະຈຳພັກແຂວງ, ປະທານອົງການກວດກາພັກ-ລັດ ແຂວງ, ມີທ່ານ ນາງ ຈັນມະນີ ນາມວົງ ກຳມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ, ມີທ່ານ ນ. ພອນສະຫວັນ ສັກຕິຄຸນ ເລຂາໜ່ວຍພັກ, ເລຂາທິການສະພາປະຊາຊົນແຂວງ ມີບັນດາທ່ານຄະນະຮັບຜິດຊອບບຸກຄະລາກອນຂັ້ນແຂວງ, ບັນດາທ່ານຮອງຫົວໜ້າຄະນະໂຄສະນາອົບຮົມແຂວງ, ຫົວໜ້າ-ຮອງຫົວໜ້າຂະແໜງ, ພ້ອມດ້ວຍພະນັກງານລັດຖະກອນ ເຂົ້າຮ່ວມ.
ໃນພິທີ ທ່ານ ນາງ ຈັນມະນີ ນາມວົງ ຫົວໜ້າຄະນະໂຄສະນາອົບຮົມແຂວງ ໄດ້ຂຶ້ນຜ່ານ ບົດສະຫຼູບການຊີ້ນຳໆພາວຽກງານຮອບດ້ານຂອງຄະນະໂຄສະນາອົບຮົມແຂວງຜົ້ງສາລີ ໃນໄລຍະທີ່ຜ່ານມາ ເຊິ່ງທ່ານໄດ້ຍົກໃຫ້ເຫັນຜົນງານດ້ານຕັ້ງໜ້າໃນການຊີ້ນຳໆພາວຽກງານ ຈຸດອ່ອນຂໍ້ຄົງຂ້າງ ແລະ ບາງບົດຮຽນທີ່ຖອດຖອນໄດ້ ແລະ ແຜນວຽກທີ່ຈະຕ້ອງໄດ້ສືອບຕໍ່ຈັດຕັ້ງປະຕິບັດໃນຕໍ່ໜ້າ.ຈາກນັ້ນ ທ່ານ ບຸນພອນ ວິລະກຽດ ຮອງຫົວໜ້າຄະນະຈັດຕັ້ງແຂວງ, ຄະນະຮັບຜິດຊອບບຸກຄະລາກອນຂັ້ນແຂວງ ໄດ້ຜ່ານມະຕິຕົກລົງຂອງຄະນະປະຈຳພັກແຂວງ ສະບັບເລກທີ 703/ຄພຂ ລົງວັນທີ 22 ຕຸລາ 2024 ວ່າດ້ວຍການຍົກຍ້າຍ ແລະ ແຕ່ງຕັ້ງພະນັກງານຮັບໜ່າທີ່ໃໝ່ ໃນນີ້ໄດ້ຍົກຍ້າຍ ແລະ ແຕ່ງຕັ້ງສະຫາຍ ພອນສະຫວັນ ສັກຕິຄຸນ ເລຂາໜ່ວຍພັກ, ເລຂາທິການສະພາປະຊາຊົນແຂວງ ເປັນເລຂາໜ່ວຍພັກ ຄະນະໂຄສະນາອົບຮົມແຂວງ, ຜ່ານຂໍ້ຕົກລົງຂອງທ່ານ ເຈົ້າແຂວງ ສະບັບເລກທີ 909/ຂຜລ ລົງວັນທີ 22 ຕຸລາ 2024 ວ່າດ້ວຍການແຕ່ງຕັ້ງໃຫ້ພະນັກງານດຳລົງຕໍ່າແໜ່ງບໍລິຫານ ໃນນີ້ ໄດ້ຕົກລົງຍົກຍ້າຍ ແລະ ແຕ່ງຕັ້ງ ທ່ານ ນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງ ໄປຮັບໜ້າທີ່ໃໝ່ ເປັນຫົວໜ້າຄະນະໂຄສະນາອົບຮົມແຂວງ. ຈາກນັ້ນກໍ່ໄດ້ເຊັນບົດບັນທຶກມອບ-ຮັບວຽກຮ່ວມກັນ ລະຫ່ວາງ ຜູ້ເກົ່າ ແລະ ຜູ້ໃໝ່ ໂດຍຊ່ອງໜ້າຈາກທ່ານ ທ່ານ ບຸນທະວີ ສໍສຸກັນ ກຳມະການປະຈຳພັກແຂວງ, ປະທານອົງການກວດກາພັກ-ລັດ ແຂວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຄີພິຍານ.
ໃນໂອກາດທີ່ມີຄວາມໝາຍຄວາມສຳຄັນນີ້, ທ່ານ ບຸນທະວີ ສໍສຸກັນ ປະທານອົງການກວດກາພັກ-ລັດ ແຂວງ ໄດ້ມີຄຳເຫັນໂອ້ລົມຕໍ່ພິທີ ເຊີ່ງທ່ານໄດ້ກ່າວວ່າ: ການຍົກຍ້າຍຊັບປ່ຽນໜ້າທີ່ວຽກງານແມ່ນເປັນວຽກປົກກະຕິ ແລະ ເປັນຄວາມຮຽກຮ້ອງຕ້ອງການໃນໜ້າທີ່ວຽກງານໄລຍະໃໝ່. ພ້ອມກັນນີ້, ທ່ານໄດ້ກ່າວສະແດງຄວາມຍ້ອງຍໍຊົມເຊີຍມາຍັງຫົວໜ້າຄະນະໂຄສະນາອົບຮົມແຂວງຜູ້ເກົ່າ ທີ່ໄດ້ອຸທິດຕົນສຸມສະຕິປັນຍາເຂົ້າໃນການຈັດຕັ້ງປະຕິບັດວຽກງານໂຄສະນາຕະຫຼອດໄລຍະທີ່ຜ່ານມາ ທີ່ມີຜົນສຳເລັດໃນຫຼາຍດ້ານ, ພ້ອມນັ້ນຮຽກຮ້ອງໃຫ້ຜູ້ເກົ່າຈົ່ງສືບຕໍ່ໃຫ້ການຮ່ວມໄມ້ຮ່ວມມືກັບຄະນະໂຄສະນາອົບຮົມແຂວງຕາມການຮຽກຮ້ອງຈາກຂັ້ນເທິ້ງ, ຕໍ່ກັບ ຫົວໜ້າ ຜູ້ໃໝ່ ສືບຕໍ່ກຳແໜ້ນແນວທາງນະໂຍບາຍຂອງພັກ-ລັດ, ມະຕິຄຳສັ່ງຕ່າງໆຂອງສູນກາງ ແລະ ທ້ອງຖີ່ນ ໃຫ້ເລິກເຊິ່ງ ແລະ ໜັກແໜ້ນເພື່ອເປັນບ່ອນອີງໃນການຊີ້ນຳ-ນຳພາ ວຽກງານໃຫ້ຖຶກຕ້ອງ ແລະ ສອດຄ່ອງ, ເອົາໃຈໃສ່ສຶກສາອົບຮົມ ການເມືອງແນວຄິດ ໃຫ້ສະມາຊິກພັກ, ພະນັກງານລັດຖະກອນ ໃນຄວາມຮັບຜິດຊອບຂອງຕົນ ໃຫ້ເປັນປົກກະຕິ, ຕໍ່ເນື່ອງ ແລະ ແທດເຖີງ, ເພີ່ມທະວີຄວາມເອົາໃຈໃສ່ຕໍ່ລະບອບແບບແຜນນຳພາ ແລະ ແບບແຜນວິທີເຮັດວຽກ ໂດຍປະຕິບັດຕາມຫຼັກການລວມສູນປະຊາທິປະໄຕ ປຶກສາຫາລື ຕົກລົງເປັນໝູ່ຄະນະ ແບ່ງໜ້າທີຄວາມຮັບຜິດຊອບໃຫ້ຢ່າງລະອຽດຈະແຈ້ງ ເຮັດວຽກຕ້ອງມີແຜນການ ແຜນງານ ແລະ ມີການສະຫຼຸບຖອດຖອນບົດຮຽນ ແລະ ສ່ອງແສງລາຍງານໃຫ້ຂັ້ນເທິງເປັນປົກກະຕິ, ສືບຕໍ່ສ້າງວິໄສທັດ, ຈິນຕະການໃໝ່ ໃນການພັດທະນາວຽກງານໂຄສະນາ ໃຫ້ມີຄວາມເຂັ້ມແຂງ, ມີບາດກ້າວໃໝ່, ສືບຕໍ່ຊີ້ນໍາໆພາປະຕິບັດວຽກງານທີ່ວາງໄວ້ໃຫ້ສໍາເລັດ, ເອົາໃຈໃສ່ປັບປຸງແບບແຜນວິທີເຮັດວຽກໃຫ້ແທດເໝາະ ແລະ ສອດຄ່ອງກັບສະພາບໃນປັດຈຸບັນ ແລະ ສືບຕໍ່ພັດທະນາວຽກງານໂຄສະນາໃຫ້ກ້າວຂຶ້ນຢ່າງບໍ່ຢຸດຢັ້ງ.
