ເມືອງສຳພັນ ແຂວງຜົ້ງສາລີ ສະເຫຼີມສະຫຼອງວັນຄູແຫ່ງຊາດ 7 ຕຸລາ ຄົບຮອບ 30 ປີ
ໃນຕອນເຊົ້າ ວັນທີ 7 ຕຸລາ 2024 ນີ້ ຢູ່ທີ່ສະໂມສອນເມືອງສຳພັນ ໄດ້ຈັດພິທີສະເຫຼີມສະຫຼອງວັນຄູແຫ່ງຊາດ ຄົບຮອບ 30 ປີ ກໍຄື (ວັນທີ 7 ຕຸລາ 1994 ຫາ ວັນທີ 7 ຕຸລາ 2024) ແລະ ວັນວິທະຍາສາດແຫ່ງຊາດຄົບຮອບ 37 ປີ ( ວັນທີ 12 ຕຸລາ 1987-12 ຕຸລາ 2024 ) ໂດຍໃຫ້ກຽດເຂົ້າຮ່ວມຂອງທ່ານ ທອງຕື ເກຍສະບົງ ກຳມະການພັກແຂວງ, ເລຂາພັກເມືອງ-ເຈົ້າເມືອງໆສຳພັນ, ມີທ່ານ ບຸນເຊີນ ບຸນທະລາ ຫົວໜ້າຫ້ອງການສຶກສາທິການ ແລະ ກິລາເມືອງ, ມີບັນດາທານຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ອະດິິດພະນັກງານບຳນານ, ອົງການຈັດຕັ້ງບ້ານຕະຫຼອດຮອດພະນັກ ງານ-ລັດຖະກອນ,ພະນັກງານຄູ-ອາຈານ ແລະ ນ້ອງນັກຮຽນ ແຕ່ ມໍ1 – ມໍ 7 ເຂົ້າຮ່ວມ.
ໃນພິທີ ທ່ານນາງ ວົງເພັດ ພັນປັນຍາ ກຳມະການພັກເມືອງ, ຫົວໜ້າຄະນະໂຄສະ ນາອົບຮົມເມືອງ ໄດ້ຂຶ້ນເລົ່າຄືນມູນເຊື້ອປະຫວັດຄວາມເປັນມາຂອງວັນຄູແຫ່ງຊາດ ຄົບຮອບ 30 ປີ ແລະ ວັນວິທະຍາສາດແຫ່ງຊາດຄົບຮອບ 37 ປີ, ວັນຄູແຫ່ງຊາດ ຊຶ່ງເປັນວັນໜື່ງທີ່ສໍາຄັນ ຄູລາວທຸກໆຄົນມີຄວາມເອກອ້າງທະນົງໃຈ ອັນໄດ້ເຮັດໃຫ້ຄູລາວ ໃນປັດຈຸບັນໄດ້ດຳເນີນການພັດທະນາຕົນເອງ ໃຫ້ມີຄວາມກ້າວ ໜ້າໄປຢ່າງບໍ່ຢຸດຢັ້ງ, ຄູໄດ້ມີບົດບາດປະກອບສ່ວນອັນສໍາຄັນທີ່ບໍ່ມີໃຜ ແລະ ຊັ້ນຄົນໃດຈະປະຕິເສດໄດ້ ຄຳວ່າ “ຄູ” ແມ່ນຄໍາເວົ້າທີ່ສືບທອດກັນມາຫຼາຍເຊັ່ນຄົນ“ຄູ” ໝາຍເຖິງຄົນທີ່ມີຄວາມຮູ້ ແລະ ປະສົບການ ສາມາດຖ່າຍທອດຄວາມຮູ້ ແລະ ປະສົບການນັ້ນໄປສູ່ຜູ້ອື່ນໆ,ຮູບການຖ່າຍທອດຄວາມຮູ້ຈາກຜູ້ຮູ້ໄປສູ່ຜູ້ບໍ່ຮູ້ເອີ້ນວ່າ: “ ການຮຽນ-ການສອນ ”.
ວັນຄູແຫ່ງຊາດລາວໄດ້ຖືກປະກາດໃຊ້ຕັ້ງແຕ່ວັນທີ 7 ຕຸລາ 1994 ເປັນຕົ້ນມາ ເມື່ອຮອດວັນທີ 7 ຕຸລາຂອງທຸກໆປີ ຈະໄດ້ມີການສະ ເຫຼີມສະຫຼອງວັນຄູແຫ່ງຊາດ ມີການເລົ່າປະຫວັດຄວາມເປັນມາ ແລະ ອວຍພອນຄູ ເພື່ອສັນລະ ເສີນຄຸນງາມຄວາມດີຂອງນາຍຄູ (ກໍ່ຄື ຄູສອນໃນຂອບເຂດທົ່ວປະເທດ) ທີ່ໄດ້ເອົາໃຈໃສ່ສຶກສາອົບຮົມສີດສອນລູກຫຼານໃຫ້ມີຄວາມຮູ້, ຄວາມສາມາດ, ເປັນຄົນດີຂອງສັງຄົມ, ປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດ ໃຫ້ມີຄວາມສີວິໄລກ້າວໜ້າຂື້ນເລື້ອຍໆ. ນອກຈາກນັ້ນທ່ານ ບຸນເຊີນ ບຸນທະລາ ຫົວໜ້າຫ້ອງການສຶກສາ ທິການ ແລະ ກິລາເມືອງ ໄດ້ຜ່ານຈົດໝາຍອວຍພອນຂອງທ່ານຫົວໜ້າຫ້ອງການສືກສາທິການ ແລະ ກີລາ ຝາກເຖິງພະນັກງານຄູອາຈານທົ່ວເມືອງ, ເນື່ອງໃນໂອກາດວັນຄູແຫ່ງຊາດໄດ້ໝູນວຽນມາບັນຈົບຄົບຮອບ 30 ປີ (ວັນທີ 07 ຕຸລາ 1994 – 07 ຕຸລາ 2024).
ຊຶ່ງທ່ານໄດ້ອວຍພອນພອນໄຊບັນດາຜູ້ບໍລິຫານການສຶກສາ ແລະ ກິລາທຸກຂັ້ນ ລວມທັງຄູ-ອາຈານ, ນັກຮຽນ-ນັກສຶກສາ ທີ່ພວມປະຕິບັດໜ້າທີ່ ສິດສອນ ແລະ ສຶກສາຮໍ່າຮຽນຢູ່ໃນທຸກໆກຸ່ມໂຮງຮຽນໃນທົ່ວເມືອງ,ວັນທີ 07 ຕຸລາ 2024 ຄົບຮອບ 30 ປີ ໄດ້ບົ່ງບອກໃຫ້ຮູ້ວ່າໃນປະຫວັດສາດຜ່ານມາ,ຄົນລາວເຮົາທຸກໆສາຂາອາຊີບ ລວມທັງຄູບາ-ອາຈານ ແມ່ນບໍ່ໄດ້ຍອມຈຳນົນຕໍ່ການກົດຂີ່ຂູດຮີດ ແລະ ພ້ອມກັນລຸກຮື້ຂຶ້ນຕໍ່ສູ້ດ້ວຍເລືອດ ແລະ ຫົວໃຈຂອງຄູ ທີ່ເຕັມໄປດ້ວຍຄວາມຮັກຊາດ-ແພງເຊື້ອ ໃນນີ້ຄູຄໍາຊຶ່ງເປັນຄູລາວຄົນ ທໍາອິດ ແລະ ເປັນຜູ້ໜຶ່ງທີ່ຮັກຊາດໄດ້ນໍາພາຂະບວນການລຸກຮືຂຶ້ນຕໍ່ສູ້ ເພື່ອຕ້ານກັບແອກການປົກຄອງຂອງພວກລ່າເມືອງຂຶ້ນ, ຖືວ່າເຫດການນີ້ມີຄວາມໝາຍສໍາຄັນບໍ່ໜ້ອຍ ຕໍ່ສະຖານການສຶກສາຂອງພວກເຮົາ ແລະ ຕໍ່ມາກໍໄດ້ກຳນົດເອົາວັນທີ 07 ຕຸລາຂອງທຸກປີ ເປັນວັນຄູແຫ່ງຊາດລາວຢ່າງສົມກຽດ. ພາຍຫຼັງໄດ້ຮັບຟັງການເລົ່າມູນເຊື່ອວັນຄູແລ້ວ ຍັງໄດ້ຈັດກິດຈະ ກຳສະແດງວັນນະຄະດີ ຈາກຄູອາຈານ,ນ້ອງນັກ ແລະ ມອບຊໍ່ດອກໄມ້,ຂອງຂັວນໃຫ້ຄູ-ອາຈານ,ອາດີດພະນັກງານຫ້ອງການສືກສາທີບຳນານ ແລະ ຍ້າຍໄປຂະແໜງການອື່ນດ້ວຍບັນຍາກາດອັນຟົດຟື້ນມ່ວນຊື່ນ.
