ເມືອງສໍາພັນແຂວງຜົ້ງສາລີ
ປາຖະກະຖາວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ແລະ ວັນຊາດສາທາລະນະລັດສັງຄົມນິຍົມຫວຽດນາມ ຄົບຮອບ 79 ປີ
ໃນຕອນເຊົ້າຂອງວັນທີ 18 ກັນຍາ 2024 ນີ້, ທາງຄະນະໂຄສະນາອົບຮົມເມືອງ ຮ່ວມກັບສະຫະພັນນັກຮົບເກົ່າເມືອງ ໄດ້ຈັດພິທີປາຖະກະຖາ ວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 22 ປີ (ວັນທີ 9 ກັນຍາ 2002 ວັນທີ 9 ກັນຍາ 2024 ) ແລະ ວັນຊາດສາທາລະນະລັດ ສັງຄົມນິຍົມຫວຽດ ນາມ ຄົບຮອບ 79 ປີ ( 2 ກັນຍາ 1945 – 2 ກັນຍາ 2024 ) ຂຶ້ນຢ່າງເປັນທາງການ ໂດຍການເຂົ້າຮ່ວມເປັນປະທານຂອງທ່ານ ສີແພງ ວ່າເລັ່ງວ້າ ກຳມະ ການປະຈໍາພັກເມືອງ, ປະທານແນວລາວສ້າງຊາດເມືອງ, ຜູ້ຊີ້ນໍາອົງການຈັດຕັ້ງມະຫາຊົນຂັ້ນເມືອງ ມີບັນດາທ່ານ ຫົວໜ້າຫ້ອງການ, ພະນັກງານ-ລັດຖະກອນ, ທະຫານຕໍາຫຼວດ, ລັດວິສາຫະກິດ, ພະນັກງານຫຼັກແຫລ່ງອ້ອມຂ້າງເມືອງເຂົ້າຮ່ວມຢ່າງພ້ອມພຽງ.
ໃນພິທີຄັ້ງນີ້,ທ່ານ ນາງ ວົງເພັດ ພັນປັນຍາ ກໍາມະການພັກເມືອງ ຫົວໜ້າຄະນະໂຄສະນາອົບຮົມເມືອງ ໄດ້ເລົ່າຄື້ນມູນເຊື້ອວັນຊາດຫວຽດນາມ ເຊິ່ງໄດ້ຍົກໃຫ້ເຫັນຄວາມໝາຍຄວາມສຳຄັນຂອງວັນດັ່ງກ່າວໂດຍຫຍໍ້ ໂດຍສະເພາະໃນໄລຍະການຕໍ່ສູ້ຢຶດອໍານາດການປົກຄອງ, ການຕໍ່ສູ້ຕ້ານພວກລ່າເມືອງຂຶ້ນແບບເກົ່າທີ່ເຂົ້າມາຮຸກ ຮານຫວຽດນາມ ເຮັດໃຫ້ປະຊາຊົນຫວຽດນາມ ສູນເສຍສິດເປັນເຈົ້າບໍ່ມີອິດສະຫຼະພາບຖືກກົດຂີ່ຢ່າງໜັກໜ່ວງ, ປະຊາຊົນຫວຽດ ນາມ ບໍ່ສາມາດອົດທົນຕໍ່ການກົດຂີ່ຂູດຮີດອັນແສນທໍລະມານ ຈຶ່ງໄດ້ລຸກຂຶ້ນຕໍ່ສູ້ຢ່າງເນື່ອງນິດລຽນຕິດ, ເພື່ອຊີ້ນຳ-ນຳພາ ການຕໍ່ສູ້ຍາດເອົາເອກະລາດ ພັກກອມມູນິດຫວຽດນາມ ຈຶ່ງໄດ້ຮັບການສ້າງຕັ້ງຂຶ້ນ ຊຶ່ງເປັນບາດລ້ຽວອັນຍິ່ງໃຫຍ່ໃນປະຫວັດສາດຂອງການປະຕິວັດຫວຽດນາມ ນັບຈາກນັ້ນມາຂະບວນການວິວັດແຫ່ງການຕໍ່ສູ້ປົດປ່ອຍຊາດຍາດເອົາອຳນາດການປົກຄອງ ທ້ອນໂຮມປະເທດຊາດເປັນເອກະພາບ ນຳເອົາປະເທດຊາດກ້າວສູ່ສັງກາດແຫ່ງຄວາມເປັນເອກະລາດ ປະກາດສ້າງຕັ້ງ ສາທາລະນະລັດ ປະຊາທິປະໄຕ ຫວຽດນາມ ແລະ ສືບຕໍ່ພາລະກິດຕໍ່ສູ້ປົດປ່ອຍພາກໃຕ້ເພື່ອທ້ອນໂຮມປະເທດຊາດ ໃຫ້ເປັນເອ ກະພາບ ແລະ ສະຖາປະນາສາທາລະນະລັດ ສັງຄົມນິຍົມຫວຽດນາມຂຶ້ນ.
ຈາກນັ້ນ, ທ່ານ ສີແພງ ວາເລັ່ງວ່າ ກໍາມະການປະຈໍາພັກເມືອງ, ປະທານແນວລາວສ້າງຊາດເມືອງ ຜູ້ຊີ້ນໍາອົງການຈັດຕັ້ງມະຫາຊົນຂັ້ນເມືອງ ໄດ້ຫວນຄືນວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 22 ປີ ຊຶ່ງເປັນອີກວັນໜຶ່ງທີ່ມີຄວາມໝາຍຄວາມສຳຄັນ ເປັນມູນເຊື້ອແຫ່ງການຕໍ່ສູ້ກູ້ເອົາເອກະ ລາດແຫ່ງຊາດ ປົກປັກຮັກສາ ແລະ ສ້າງສາປະເທດຊາດ ເຮັດໃຫ້ປະຊາຊົນບັນດາເຜົ່າມີສິດເສລີພາບ ໄດ້ເປັນເຈົ້າຂອງປະເທດຊາດຢ່າງແທ້ຈິງ ຍັງສະແດງໃຫ້ເຫັນຄວາມເສຍສະຫຼະອັນໃຫຍ່ຫຼວງຂອງນັກຮົບໃນກອງທັບທີ່ໄດ້ອຸທິດຊີວິດ ເພື່ອປະເທດຊາດ ເພື່ອຄວາມສົມບູນພູນສຸກຂອງປະຊາຊົນບັນດາເຜົ່າ. ນັກຮົບເກົ່າແມ່ນຜູ້ອຸທິດຊີວິດເລືອດເນື້ອເພື່ອພາລະກິດປະຕິວັດ ກໍ່ຄືພາລະກິດປະຫວັດສາດຂອງຊາດ, ທັງເປັນຜູ້ສ້າງພາລະກໍາປະຫວັດສາດອັນຍິ່ງໃຫຍ່ ຮັບໃຊ້ການສູ້ຮົບ, ປົດປ່ອຍປະເທດຊາດ ຕ້ານການຮຸກ ຮານຂອງພວກຈັກກະພັດຕ່າງດ້າວອັນລະອິດລະອ້ຽວ, ຍືດເຍື້ອຍາວນານຫຼາຍສິບປີ, ວິລະກຳຂອງພວກເພີ່ນຍັງເປັນອຳມະຕະ ແລະ ສະຖິດຢູ່ໃນໃຈຂອງປະຊາຊົນລາວຜູ້ຮັກຊາດ, ຮັກຄວາມເປັນເອກະລາດ-ອິດສະຫຼະພາບ ແລະ ຄວາມເປັນທຳຕະຫຼອດການ, ນັກຮົບເກົ່າຍາມໃດກໍ່ມີຄວາມເດັດດ່ຽວໜ້ຽວແໜ້ນ, ຮັກສາທາດແທ້ມູນເຊື້ອປະຕິວັດ, ຄວາມຈົ່ງຮັກພັກດີຕໍ່ພັກ ຕໍ່ປະເທດຊາດຢ່າງບໍ່ມີຂອບ ເຂດ, ມີຄວາມຕັດສິນໃຈ ແລະ ເສຍສະຫຼະຢ່າງສູງສົ່ງ, ເພື່ອຜົນປະໂຫຍດສ່ວນລວມຂອງປະເທດຊາດ, ເປັນແວ່ນແຍ່ງໃຫ້ຄົນລຸ້ນສືບທອດ ບໍ່ວ່າທາງດ້ານແບບ ແຜນດຳລົງຊີວິດ, ອຸດົມຄະຕິຫຼັກໝັ້ນຊົນຊັ້ນ ກໍ່ຄືການພັດທະນາເສດຖະກິດ-ແກ້ໄຂຊີວິດການເປັນຢູ່, ເສີມຂະຫຍາຍມູນເຊື້ອຂອງນັກຮົບເກົ່າປະຕິວັດຢ່າງສຸດກົກສຸດປາຍ, ເຮັດສໍາເລັດໜ້າທີ່ຕາມບົດບາດຂອງຕົນ, ຍຶດໝັ້ນລັດທິສັງຄົມນິຍົມ ດູດດື່ມເປັນກໍາລັງແຮງທາງດ້ານສະຕິປັນຍາ, ມັນສະໝອງ ເພື່ອເຂົ້າຮ່ວມກໍ່ສ້າງລະບອບການເມືອງປະຊາທິປະໄຕປະຊາຊົນ ທີ່ມີພັກປະຊາຊົນປະຕິວັດລາວ ເປັນແກ່ນນໍາໃຫ້ມີຄວາມໜັກແໜ້ນ-ເຂັ້ມແຂງ, ຕັ້ງໜ້າປະ ກອບສ່ວນສ້າງສາພັດທະນາປະເທດຊາດໃຫ້ມີຄວາມຮັ່ງມີຜາສຸກ, ມາຮອດປະຈຸບັນ ສະຫະພັນນັກຮົບເກົ່າແຫ່ງຊາດລາວ ໄດ້ມີຄວາມເຕີບໃຫຍ່ເຂັ້ມແຂງ ແລະ ຂະຫຍາຍຕົວກ້າວຂຶ້ນຢ່າງບໍ່ຢຸດຢັ້ງ.
ຈຸດປະສົງຂອງການປາຖະກະຖາ ໃນຄັ້ງນີ້ເພື່ອແນ່ໃສ່ເຮັດໃຫ້ພະນັກງານ-ນັກຮົບລຸ້ນສືບທອດ, ຕ້ອງໄດ້ພ້ອມກັນນຳເອົາເນື້ອໃນບົດຮຽນອັນສຳຄັນດັ່ງກ່າວ ນໍາໄປໝູນ ໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານຕົວຈິງ, ເພື່ອສືບຕໍ່ປົກປັກຮັກສາ ແລະ ເສີມຂະຫຍາຍທາດແທ້ມູນເຊື້ອປະຕິວັດ, ເຕົ້າໂຮມຄວາມສາມັກຄີພາຍໃນ ແລະ ເພື່ອມິດຍຸດທະສາດໃຫ້ເປັນປຶກແຜ່ນ, ເຊີດຊູບົດບາດເປັນຕົວແທນແຫ່ງສິດຜົນປະໂຫຍດອັນຊອບທໍາຂອງນັກຮົບເກົ່າ, ຕັ້ງໜ້າປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ໃຫ້ມີຄວາມມັ່ງຄັ້ງເຂັ້ມແຂງຈະເລີນງອກງາມຍິ່ງໆຂຶ້ນເປັນກ້າວໆ.