ເມືອງສໍາພັນ ແຂວງຜົ້ງສາລີ ປາຖະກະຖາ 2 ວັນສໍາຄັນ ປະຈໍາເດືອນ ກຸມພາ 2025
ໃນຕອນເຊົ້າຂອງວັນທີ 06 ກຸມພາ 2025ນີ້, ທາງສະຫະພັນກໍາມະບານເມືອງກັບຄະນະໂຄສະນາອົບຮົມເມືອງ ໄດ້ສົມທົບກັນຈັດພິທີປາຖະກະຖາ 2 ວັນສໍາຄັນ ປະຈໍາເດືອນ ກຸມພາ ຄື: ວັນສ້າງຕັ້ງສະຫະພັນກໍາມະບານລາວ 1 ກຸມພາ 1956-1 ກຸມພາ 2025 ຄົບຮອບ 69 ປີ ແລະ ວັນສ້າງຕັ້ງພັກກອມມູນິດຫວຽດນາມ 3 ກຸມພາ 1930 – 3 ກຸມພາ 2025 ຄົບຮອບ 95 ປີ ຂຶ້ນຢູ່ທີ່ສະໂມສອນຂອງເມືອງ ໂດຍພາຍໃຕ້ການເປັນປະທານຂອງທ່ານ ສີແພງ ວ້າເລັງວາ ກຳມະການປະຈໍາພັກເມືອງ, ປະທານແນວລາວສ້າງຊາດເມືອງ ຜູ້ຊີ້ນໍາອົງການຈັດມະຫາຊົນ, ມີທ່ານ ແອ ຍີນທະນົງ ກໍາມະການພັກເມືອງ, ຄະນະບໍລິຫານງານສະຫະພັນກໍາ ມະບານແຂວງ, ປະທານສະຫະພັນກໍາມະບານເມືອງ, ມີທ່ານ ນ. ວົງເພັດ ພັນປັນຍາ ກໍາມະການພັກເມືອງ, ຫົວໜ້າຄະນະໂຄສະ ນາອົບຮົມເມືອງ, ມີຄະນະປະຈໍາ, ຄະນະພັກເມືອງ, ຫົວໜ້າ – ຮອງຫົວໜ້າຫ້ອງການ, ຫົວໜ້າຄະນະກອງບັນຊາການ ປກຊ-ປກສ ເມືອງ, ຄະນະບໍລິຫານງານສະຫະພັນກໍາມະບານເມືອງ, ປະທານໜ່ວຍ ຕະຫຼອດຮອດສະມາຊິກສະຫະພັນກໍາມະບານໜ່ວຍອ້ອມຂ້າງເມືອງເຂົ້າຮ່ວມ.
ໃນພິທີຍັງໄດ້ຮັບຟັງການເລົ່າມູນເຊື້ອວັນສ້າງຕັ້ງສະຫະພັນກໍາມະບານລາວ ຄົບຮອບ 69 ປີ ຈາກທ່ານ ສີແພງ ວ້າເລັງວາ ກຳມະການປະຈໍາພັກເມືອງ, ປະທານແນວລາວສ້າງຊາດ, ຜູູ້ຊີ້ນໍາອົງການຈັດຕັ້ງມະຫາຊົນ ຊຶ່ງທ່ານໄດ້ຍົກໃຫ້ເຫັນປະເທດລາວຕົກຢູ່ໃນໃຕ້ແອກປົກຄອງຂອງພວກລ່າເມືອງຂຶ້ນ ພວກເຂົາໄດ້ເຂັ່ນຂ້າປະຊາຊົນຜູ້ອອກແຮງງານລາວບັນດາເຜົ່າຢ່າງໂຫດຮ້າຍທາລຸນ ຈຶ່ງເຮັດໃຫ້ຊົົນຊັ້ນກໍາມະກອນລາວ ໄດ້ກໍາເນີດ ແລະ ປະກົດຕົວຂຶ້ນ ໃນເງື່ອນໄຂປະຫັວດສາດທີ່ລະອິດລະອ້ຽວ ແຕ່ຊົນຊັ້ນກໍາມະກອນລາວກໍນັບມື້ນັບຂະຫຍາຍຕົວຢ່າງຕໍ່ເນື່ອງ ຊິວິດການເປັນຢູ່ຂອງກໍາມະກອນ ຜູ້ອອກແຮງງານ ແລະ ປະຊາຊົນບັນດາເຜົ່າອຶດຍາກຂາດແຄນ, ບໍ່ໄດ້ຮັບຄວາມເປັນທໍາ, ຂາດເສລີພາບ ທາງດ້ານການເມືອງ ແລະ ກົດໝາຍ ຕໍ່ສູ້ຈົນໄດ້ຮັບໄຊຊະນະ ແລະ ໄດ້ຮັບການສ້າງຕັ້ງຂຶ້ນໃນວັນທີ 1 ກຸມພາ 1956 ຢ່າງສົມບູນ, ຈາກນັ້ນ; ທ່ານ ນ. ວົງເພັດ ພັນປັນຍາ ກໍາມະການພັກເມືອງ ຫົວ ໜ້າຄະນະໂຄສະນາອົບຮົມເມືອງ ໄດ້ຜ່ານເອກະສານວັນສ້າງຕັ້ງພັກກອມມູນິດຫວຽດນາມ ຄົບຮອບ 95 ປີ ຫວຽດນາມໄດ້ຕົກເປັນຫົວເມືອງຂຶ້ນຂອງຝຣັ່ງ ໃຕແອກປົກຄອງຂອງພວກຈັກກະພັດຕ່າງດ້າວ ປະຊາຊົນຫວຽດນາມໄດ້ສູນເສຍສິດເປັນເຈົ້າ ບໍ່ມີອິດສະຫຼະພາບ ຖຶກກົດຂີ່ຂູດຮີດຢ່າງໜັກໜ່ວງ ແລະ ປ່າເຖື່ອນ ດ້ວຍນໍ້າໃຈຮັກຊາດ ແລະ ຄຽດແຄ້ນສັດຕູຕໍ່ພວກລ່າເມືອງຂຶ້ນຮຸກຮານ ປະຊາຊົນຫວຽດນາມໄດ້ຈັບອາວຸດຕໍ່ສູ້ບໍ່ຍອມຈໍານົນ ຈົນໄດ້ຮັບໄຊຊະນະ ແລະ ປະກາດສ້າງຕັ້ງໃນວັນທີ 3 ກຸມພາ 1930, ແລະ ພ້ອມທັງໄດ້ຮັບຟັງການຜ່ານບົດຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ VIII ຜູ້ແທນກໍາມະບານທົ່ວເມືອງສໍາພັນ ຈາກທ່ານ ແອ ຍີນທະນົງ ກໍາມະການພັກເມືອງ, ຄະນະບໍລິຫານສະຫະພັນກໍາມະບານແຂວງ, ປະທານສະຫະພັນກໍາມະບານເມືອງ.
ການປາຖະກະຖາໃນຄັ້ງນີ້ ກໍ່ເພື່ອເປັນການຫວນຄືນມູນເຊື້ອປະຫັວດສາດຕ່າງໆ ເພື່ອໃຫ້ສະມາຊິກພັກ, ພະນັກງານ-ລັດຖະກອນ ກໍຄືສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງານທຸກສະຫາຍ ຮັບຮູ້ ແລະ ເຂົ້າໃຈຕໍ່ເນື້ອໃນ, ບົດຮຽນໃນດ້ານຕ່າງໆ ເພື່ອນໍາໃຊ້ເຂົ້າໃນຊິວິດຕົວຈິງໃຫ້ຫຼາຍຂຶ້ນ ທາງດ້ານປະລິມານ ແລະ ຄຸນນະພາບ.
ໃນຕອນທ້າຍຂອງພີທີປາຖະກະຖາດັ່ງກ່າວ ຍັງໄດ້ຮັບຟັງການມີຄໍາເຫັນໂອ້ລົມ ຂອງທ່ານປະທານພິທີ ຮຽກຮ້ອງໃຫ້ຄະນະບໍລິ ຫານງານສະຫະພັນກໍາມະບານເມືອງ, ປະທານສະຫະພັນກໍາມະບານແຕ່ລະໜ່ວຍ ເອົາໃຈໃສ່ສຶກສາອົບຮົມທາງດ້ານການເມືອງ-ແນວຄິດ ໃຫ້ແກ່ພະນັກງານກໍ່ຄືສະມາຊິກກໍາມະບານ ໃນຂົງເຂດທີ່ຕົນຮັບຜິດຊອບຢ່າງເປັນປະຈໍາ, ນໍາເອົາເນື້ອໃນຈິດໃຈບົດຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 8 ຜູ້ແທນກໍາມະບານທົ່ວເມືອງ ເຜີຍແຜ່, ເຊື່ອມຊຶມໃຫ້ທົ່ວເຖິງ ແລະ ເຂົ້າໃຈຢ່າງເລິກເຊິ່ງ, ປັງປຸງແບບແຜນວິທີເຮັດວຽກ ໃນການຊີ້ນໍາ-ນໍາພາ ວຽກງານກໍາມະບານໃຫ້ມີບາດກ້າວດີກວ່າເກົ່າ, ເພີ່ມທະວີຕ້ານ ແລະ ສະກັດກັ້ນບັນດາປະກົດການຫຍໍ້ທໍ້ ໃນຖັນແຖວພະນັກງານລັດຖະກອນ ກໍຄືສະມາຊິກກໍາມະບານໃຫ້ມີຄວາມສະຫງົບໂດຍພື້ນຖານ, ເອົາໃຈໃສ່ປະກອບສ່ວນໃນການສ້າງຂະບວນການຮອບດ້ານຕ່າງໆ ຂອງເມືອງຢ່າງເປັນຂະບວນຝົດຟື້ນ.