ເມືອງສໍາພັນ ແຂວງຜົ້ງສາລີ ປາຖະກະຖາເລົ່າມູນເຊື້ອວັນສ້າງຕັ້ງແມ່ຍິງສາກົນ ຄົບຮອບ 115 ປີ
ໃນຕອນເຊົ້າຂອງວັນທີ 07 ມີນາ 2025ນີ້, ທາງສະຫະພັນແມ່ຍິງເມືອງ ໄດ້ຈັດພິທີປາຖະກະຖາເລົ່າມູນເຊື້ອວັນສ້າງຕັ້ງແມ່ຍິງສາກົນ 8 ມີນາ 1910 – 8 ມີນາ 2025 ຄົບຮອບ 115 ປີ ຂື້ນຢູ່ທີສະໂມສອນຂອງເມືອງ ໂດຍພາຍໃຕ້ການເປັນກຽດເຂົ້າຮ່ວມເປັນປະທານຂອງທ່ານ ທອງຕື ເກຍສະບົງ ກໍາມະການພັກແຂວງ ເລຂາພັກເມືອງເຈົ້າເມືອງໆສໍາພັນ, ມີທ່ານ ນ. ສົມວັນ ສຸມວິໄລ ກໍາມະການພັກເມືອງ ຄະນະບໍລິຫານງານສະຫະພັນແມ່ຍິງແຂວງ ປະທານສະຫະພັນແມ່ຍິງເມືອງ, ມີ ມີຄະນະປະຈໍາ, ຄະນະບໍລິຫານງານພັກເມືອງ, ຫົວໜ້າ – ຮອງຫົວໜ້າຫ້ອງການ, ຫົວໜ້າຄະນະກອງບັນຊາການ ປກຊ-ປກສ ເມືອງ, ຄະນະບໍລິຫານງານສະຫະພັນແມ່ຍິງເມືອງ, ປະທານໜ່ວຍ ຕະຫຼອດຮອດສະມາຊິກສະຫະພັນແມ່ຍິງໜ່ວຍອ້ອມຂ້າງເມືອງເຂົ້າຮ່ວມ ນັບທັງ 2 ບ້ານ ບ້ານ ນາ ແລະ ບ້ານ ນາໄຊ ເຂົ້າຮ່ວມທັງໝົດ 149 ຄົນ, ຍິງ 100 ຄົນ.
ໃນພິທີທ່ານ ນ. ສົມວັນ ສຸມວິໄໄລ ກໍາມະການພັກເມືອງ ຄະນະບໍລິຫານງານສະຫະພັນແມ່ຍິງແຂວງ ປະທານສະຫະພັນແມ່ຍິງເມືອງ ໄດ້ຂື້ນຜ່ານເອກະສານວັນສ້າງຕັ້ງວັນແມ່ຍິງສາກົນ 8 ມີນາ 1910 – 8 ມີນາ 2025 ຄົບຮອບ 115 ປີ ວັນທີ 8 ມີນາ ແມ່ນເຫດການ-ການເມືອງທີ່ສໍາຄັນ, ເປັນຂິດໝາຍແຫ່ງໄຊຊະນະອັນພື້ນຖານຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນເປັນທໍາ ໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ, ເປັນວັນລະນຶກເຖີງການຕໍ່ສູ້ຂອງແມ່ຍິງ ເພື່ອປົດປ່ອຍຕົນເອງ ແລະ ທ່ວງໃຫ້ມີສິດປະຊາທິປະໄຕ ຄືກັນກັບຜູ້ຊາຍ ແລະ ທວງໃຫ້ນາຍທຶນແກ້ໄຂຊິວິດການເປັນຢູ່. ແມ່ຍິງສາກົນແມ່ນ ກໍາເນີດຂື້ນໃນທ່າມກາງທີ່ສະພາບແວດລ້ອມຂອງພວກສັກດີນາ ແລະ ນາຍທຶນຂະຫຍາຍຕົວ ເມື່ອໂຮງຈັກໂຮງງານອຸດສະຫະກໍາຂອງນາຍທຶນຂະຫຍາຍຕົວ ມັນໄດ້ສ້າງຄວາມຮັ່ງມີໃຫ້ແກ່ນາຍທຶນ, ແຕ່ຊໍ້າພັດຍີ່ງເພີ່ມຄວາມທຸກຍາກລໍາບາກ ໃຫ້ແກ່ຊາວຜູ້ອອກແຮງງານ ເວົ້າລວມ ເວົ້າສະເພາະແມ່ນກໍາມະກອນເພດຍິງ ມາເຖີງປີ 1910 ຂະບວນການຕໍ່ສູ້ຂອງແມ່ຍິງ ໄດ້ແຜ່ຂະຫຍາຍກ້ວາງອອກໄປສູ່ປະເທດນາຍທຶນຢູ່ທະວີບເອີລົບ ແລະ ໃນປີນີ້ເອງ ກອງປະຊຸມສາກົນກ່ຽວກັບບັນຫາແມ່ຍິງ ຄັ້ງທໍາອິດ ໄດ້ຈັດຂຶ້ນຢູ່ໂກເປນຮາກ ນະຄອນຫຼວງຂອງປະເທດເດນມາກ ມີຜູ້ແທນເຂົ້າຮ່ວມ 100 ກ່ວາຄົນ ຈາກ 17 ປະເທດ ເຂົ້າຮ່ວມ ກອງປະຊຸມດັ່ງກ່າວ ໄດ້ຮັບຮອງ ແລະ ຕົກລົງເອົາວັນທີ 8 ມີນາ ຂອງທຸກໆປີ ເປັນວັນແມ່ຍິງສາກົນ.
ຕອນທ້າຍຂອງພີທີປາຖະກະຖາດັ່ງກ່າວຍັງໄດ້ຮັບຟັງການມີຄໍາເຫັນໂອ້ລົມຂອງທ່ານປະທານພິທີ ຮຽກຮ້ອງໃຫ້ຄະນະບໍລິຫານງານສະຫະພັນແມ່ຍິງເມືອງ, ປະທານສະຫະພັນແມ່ຍິງແຕ່ລະໜ່ວຍເອົາໃຈໃສ່ປະກອບສ່ວນໃນການສ້າງຂະບວນການຮອບດ້ານຕ່າງໆຂອງເມືອງຢ່າງເປັນຂະບວນຟົດຟືນ ເພື່ອກະກຽມຕ້ອນຮັບກອງປະຊຸມໃຫ່ຍອົງຄະນະພັກເມືອງ ຄັ້ງທີ່ XV ທີ່ຈະມາເຖີງນີ້, ໃນບົດມູເຊື້ອສະແດງເຖີງຄວາມເຂັ້ມແຂງຂອງແມ່ຍິງ ຫຼື ຂອງເພດຍິງ ເຊິ່ງຜ່ານການຕໍ່ສູ້ຂອງບັນດາແມ່ຍິງໃນທົ່ວໂລກ ແລະ ສະແດງໃຫ້ເຫັນເຖີງສິດເສລີພາບ, ມີບົດບາດໃນເວທີຕ່າງໆຢ່າງຫຼວງຫຼາຍ ເຮັດໃຫ້ແມ່ຍິງມີບົດບາດສູງຂື້ນ, ການປາຖະກະຖາໃນຄັ້ງນີ້ກໍ່ເພື່ອເປັນການຫວນຄືນມູນເຊື້ອປະຫັວດສາດຕ່າງໆ ເພື່ອໃຫ້ສະມາຊິກພັກ, ພະນັກງານ-ລັດຖະກອນ ກໍຄືສະມາຊິກສະຫະພັນແມ່ຍິງທຸກສະຫາຍ ຮັບຮູ້ ແລະ ເຂົ້າໃຈຕໍ່ເນື້ອໃນ, ບົດຮຽນໃນດ້ານຕ່າງໆ ເພື່ອນໍາໃຊ້ເຂົ້າໃນຊິວິດຕົວຈິງໃຫ້ຫຼາຍຂື້ນ ທາງດ້ານປະລິມານ ແລະ ຄຸນນະພາບ, ສືບຕໍ່ເພີ່ມທະວີເຕົ້າໂຮມຄວາມສາມັກຄີບັນດາເອື້ອຍນ້ອງແມ່ຍິງບັນດາເຜົ່າໃຫ້ແໜ້ນແຟ້ນຂຶ້ນກ່ວາເກົ່າ.
ໃນພີທີໄດ້ຮັບຊົມການສະແດງສີລະປະວັນນະຄະດີ ຈາກຫຼານນ້ອຍມາຈາກ 2 ໂຮງຮຽນ ຄື: ໂຮງຮຽນປະຖົມບ້ານນາ, ໂຮງຮຽນປະຖົມນາໄຊ ແລະ ຍັງໄດ້ຈັດກິດຈະກໍາ ການຖາມ – ຕອບ ຄວາມຮູ້ຮອບຕົວອິກດ້ວຍ.
