ເມືອງໃໝ່ສະເຫຼີມສະຫຼອງວັນສີ່ງແວດລ້ອມໂລກ ແລະ ວັນສີ່ງແວດລ້ອມແຫ່ງຊາດ 05 ມິຖຸນາ 2024

     ພິ​ທີ​ດັ່ງ​ກ່າວ​ໄດ້​ຈັດ​ຂື້ນ​ໃນ​ຕອນ​ເຊົ້າ​ຂອງວັນ​ທີ 5 ມິ​ຖຸ​ນາ 2024 ນີ້, ທີ່​ສະ​ໂມ​ສອນ​ ເມືອງ​ໃໝ່, ​ແຂວງ​ຜົ້ງ​ສາ​ລີ ໂດຍ​ເ​ປັນກຽດ​ເຂົ້າ​ຮ່ວມ​ຂອງ ​ທ່ານ​ ສອນ​ສະ​ໜຸກ ສີ​ສຸ​ລາດ ເລ​ຂາ​​ພັກ​ເມືອງ ເຈົ້າ​ເມືອງ-ເມືອງ​ໃໝ່, ມີ​ບັນ​ດາ​ກຳ​ມະ​​ປະ​ຈຳການ​ພັກ​ເມືອງ, ກຳ​ມະ​ການ​ພັກ​ເມືອງ, ຫົວ​ໜ້າ-ຮອງ​ຫົວ​ໜ້າ​ຫ້ອງ​ການ, ພະ​ນັກ​ງານ​ລັດ​ຖະ​ກອນ, ຕະຫຼອດ​ຮອດອົງ​ການ​ຈັດ​ຕັ້ງ​ສາ​ກົນ ແລະ ​​ເລ​ຂາ​ພັກ​ນາຍບ້ານ 6 ບ້ານ​ເທດ​ສະ​ບານ​ເມືອງ​ເຂົ້າ​ຮ່ວມ.

     ໃນ​ພິ​ທີ​ ທ່ານ ສຸກ​ຈະ​ເລີນ ສີ​ເຕົ່າ ຫົວ​ໜ້າ​ຫ້ອງ​ການ​ຊັບ​ພະ​ຍາ​ກອນ​ທຳ​ມະ​ຊາດ​ ແລະ ສີ່ງ​ແວດ​ລ້ອມເມືອງ ໄດ້​ຂຶ້ນ​ຜ່ານ​ປະ​ຫວັດ​ຄວາມ​ເປັນ​ມາ ຂອງວັນ​ສິ່ງ​ແວດ​ລ້ອມ​ໂລກ ແລະ ວັນ​ສີ່ງ​ແວດ​ລ້ອມ​ແຫ່ງ​ຊາດ 5 ມິ​ຖຸ​ນາ 2024 ເຊິ່ງ​ທ່ານ​ໄດ້​ໃຫ້​ຮູ້​ວາ: ໃນ​ປີ 1948 ອົງ​ການ​ສາ​ກົນ ເພື່ອ​ອະ​ນຸ​ລັກ​ທຳ​ມະ​ຊາດ ໄດ້​ຈັດ​ກອງ​ປະ​ຊຸມລະ​ດັບ​ສາ​ກົນ​ຄັ້ງ​ປະ​ຖົມ​ມະ​ລຶກ​ກ່ຽວ​ກັບ​ການ​ສຶກ​ສາ​ດ້ານ​ສິ່ງ​ແວດ​ລ້ອມ ເຊິ່ງ​ມີ​ລັດ​ຖະ​ບານ​ຂອງ​ບັນ​ດາ​ປະ​ເທດ​ສະ​ມາ​ສິກ ບັນ​ດາ​ອົງ​ການ​ຈັດ​ຕັ້ງ​ຕ່າງໆ​ຈາກ​ທົ່ວ​ໂລກ​ເຂົ້າ​ຮ່ວມ ເພື່ອ​ກຳ​ນົດ​ນະ​ໂຍ​ບາຍ, ວິ​ທີ​ການ ແລະ ມາດ​ຕະ​ການ​ຕ່າງໆ ເພື່ອ​ປົກ​ປັກ​ຮັກ​ສາ ແລະ ອະ​ນຸ​ລັກ​ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ໃຫ້​ໄດ້​ຮັບ​ຜົນ​ກະ​ທົບ​ນ້ອຍ​ທີ​ສຸດ ຈາກ​ສີ​ມື​ຂອງ​ມະ​ນຸດ ແລະ ​ທາງທຳ​ມະ​ຊາດ​ສ້າງ​ຂຶ້ນ ມີ​ຄຳ​ເຫັນ​ສະ​ເໜີ​ແນວ​ຄິດ​ການ​ພັດ​ທະ​ນາ​ແບບ​ຍືນ​ຍົງ ໂດຍ​ແນ​ໃສ່​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ ຂອງ​ບັນ​ດາ​ປະ​ເທດ​ໃນ​ທົ່ວ​ໂລກ ໂດຍ​ຄຳ​ນຶງ​ເຖິງ ຜົນ​ກະ​ທົບ​ດ້ານ​ສິ່ງ​ແວດ​ລ້ອມທີ​ຈະ​ຕາມ​ມາ, ກອງ​ປະ​ຊຸມ​ໄດ້​ເຫັນ​ດີ​ເປັນ​ເອກ​ພາບ ກຳ​ນົດ​ເອົາ ວັນ​ທີ 5 ມິ​ຖຸ​ນາ ຂອງ​ທຸກ​ປີ ເປັນ​ວັນ​ສິ່ງ​ແວດ​ໂລກ ໃນ​ປີ​ນີ້​ການ​ສະ​ເຫຼີມ​ສະຫຼອງວັນ​ສິ່ງ​ແວດລ້ອມ​ໂລກ ຄົບຮອບ 51 ປີ ນອກ​ນັ້ນ​ສຳ​ລັບ ສ​ປ​ປ ​ລາວ ພັກ-ລັດ ກໍ​ໄດ້​ເອົາ​ໃຈ​ໃສ່​ສົ່ງ​ເສີມ​ການປົກ​ປັກ​ຮັກ​ສາ​​, ​ປູກຈິດ​ສຳ​ນຶກ​ພ້ອມ​ທັງ​ປຸກ​ລະ​ດົມ ບຸກ​ຄົນ, ການ​ຈັດ​ຕັ້ງ​ພາຍໃນ ແລະ ຕ່າງ​ປະ​ເທດ ໃຫ້​ເຫັນ​ຄວາມ​ສຳ​ຄັນ​ຂອງ​ການ​ມີ​ສິ່ງ​ແວດ​ລ້ອມ ຂຽວ, ສະ​ອາດ, ງາມ​ຕາ ປາ​ສະ​ຈາກມວນ​ລະ​ພິດ ເຊິ່ງລາວ​ເຮົາ​ໄດ້​ກຳ​ນົດ​ເອົາ​ວັນ​ທີ 5 ມິ​ຖຸ​ນາ ຂອງ​ທຸກ​ປິ ເປັນວັນ​ສະ​ເຫຼີມ​ສະຫຼອງ​ວັນ​ສິ່ງ​ແວດ​ລ້ອມ​ແຫ່ງ​ຊາດ ເຊິ່ງປີ 2024 ​ນີ້ ​ແມ່ນ​ຄົບຮອບ 25 ປີ: ພາຍ​ໃຕ້​ຄຳ​ຂວັນ ( ຮ​ວ່ມ​ກັນ​ຢຸດ​ຕິ​ທຳ​ລາຍ​ປ່າ​ໄມ້, ຈູດ​ປ່າ​ໄມ້​ແບບ​ຊະ​ຊາຍ ເພື່ອ​ຟື້ນ​ຟູ​ດິນ, ຕ້ານ​ໄພ​ແຫ້ງ​ແລ້ງ ແລະ ​ໄພ​ນ້ຳ​ຖ້ວມ).

     ໂອ​ກາດນີ້ ​ທ່ານ​ ສອນ​ສະ​ໜຸກ ສີ​ສຸ​ລາດ ໄດ້​ໂອ້​ລົມ ແລະ ຮຽກ​ຮ້ອງ​ມາ​ຍັງ​ພະ​ນັກ​ງານຫຼັກ​ແຫຼງ​ຂອງ​ເມືອງ, ທຸກ​ພາກ​ສ່ວນ​ໃນ​ສັງ​ຄົມ ຈົ້ງຮ່ວມ​ແຮງ​ຮ່ວມ​ໃຈ​ກັນ​ປົກ​ປັກ​ຮັກ​ສາ​ສິ່ງ​ແວດ​ລ້ອມ​ໂດຍ​ຫັນ​ປ່ຽນ​ພຶດ​ຕິ​ກຳ ແລະ ຈິນ​ຕະ​ນາ​ການ ຈາກ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ ທີ່​ທຳ​ລາຍ​ສິ່ງ​ແວດ​ລ້ອມ ມາ​ເປັນ​ການ​ພັດ​ທະ​ນ​າທີ່​ເປັນ​ມິດ​ຕໍ່​ສີ່ງ​ແວດ​ລ້ອມ​ເພື່ອ​ໃຫ້​ມີ​ຄວາມ​ຍືນຍ​ົງ ແລະ ຍາວ​ນານ. ເພື່ອ​ຄຸນ​ນະ​ພາບ​ຊີ​ວິດ​ຂອງ​ປະ​ຊາ​ຊົນ, ສ້າງ​ເມືອງ​ໃໝ່​ໃຫ້​ມີ​ຄວາມ​ສະ​ອາດ​ງາມ ຕາມ​ທິດ 3 ສໍ: ສະ​ອາດ, ສີ​ຂຽວ ແລະ ​​ ສີ​ວິ​ໄລຂື້ນ​ເລື້ອຍໆ.

     ນອກ​ຈາກ​ນັ້ນ​ຍັງ​ໄດ້​ຈັດ​ຂະ​ບວນ​ຍ່າງເພື່ອ​ສຸ​ຂະ​ພາບ ພ້ອມ​​ທັງອະ​ນາ​ໃນ​ຕາມ​ເສັ້ນ​ທາງ​ເທດ​ບານ​ເມືອງ ເພື່ອ​ເປັນ​ການ​ສະ​ເຫຼີມ​ສະຫຼອງວັນດັ່ງ​ກ່າວ​ຕື່ມ​ອີກ​

(​ພາບ ຂ່າວ: ວັນ​ວິ​ໄລ ຖວ​ທ)