ເມືອງໃໝ່ ແຂວງຜົ້ງສາລີ ດຳເນີນກອງປະຊຸມອົງການປົກຄອງເມືອງເປີດກວ້າງ ຄັ້ງທີ 9 ຊຸດທີ III
ກອງປະຊຸມໄດ້ໄຂຂຶ້ນໃນຕອນເຊົ້າຂອງ ວັນທີ 16 ສິງຫາ 2024 ນີ້, ທີ່ສະໂມສອນຂອງເມືອງໃໝ່ ແຂວງຜົ້ງສາລີ ໂດຍພາຍໃຕ້ການເປັນປະທານຮ່ວມຂອງ ທ່ານ ທອງສະຫວັນ ທຳມະວົງ ກໍາມະການປະຈຳພັກແຂວງ, ປະທານແນວລາວສ້າງຊາດແຂວງ, ຜູ້ຊີ້ນຳວຽກງານຮອບດ້ານເມືອງໃໝ໋ ແລະ ທ່ານ ສອນສະໜຸກ ສີສຸລາດ ເລຂາຄະນະບໍລິຫານງານພັກເມືອງເຈົ້້າເມືອງໆໃໝ່, ມີບັນດາທ່ານສະມາຊິກອົງການປົກຄອງເມືອງ, ແຂກເຊີນຈາກຂົງເຂດການເມືອງ, ແນວລາວສ້າງຊາດ, ອົງການຈັດຕັ້ງມະຫາຊົນ, ອົງການຕຸລາການ, ນາຍທະຫານ-ນາຍຕຳຫຼວດ, ລັດວິສາຫະກິດ, ດ່ານສາກົນ, ດ່ານປະເພນີ, ເລຂາພັກກຸ່ມ ຕະຫຼອດຮອດ ເລຂາພັກນາຍບ້ານພາຍໃນເທດສະບານເມືອງເຂົ້າຮ່ວມ.
ໃນກອງປະຊຸມຜູ້ແທນກອງປະຊຸມໄດ້ຮັບຟັງ ການຜ່ານຮ່າງບົດສະຫຼຸບຕີລາຄາການຈັດຕັ້ງປະຕິບັດວຽກງານຂອງອົງການປົກຄອງເມືອງ 06 ເດືອນຕົ້ນປີ ແລະ ກຳນົດທິດທາງແຜນການ 6 ເດືອນທ້າຍປີ 2024, ຮ່າງຕີລາຄາຄືນການຈັດຕັ້ງປະຕິບັດມະຕິກອງປະຊຸມອົງການປົກຄອງເມືອງຄັ້ງທີ 08 ປະຈໍາປີ 2023, ຮັບຟັງຮ່າງບົດສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ແລະ ຮ່າງບົດສະຫຼຸບການຈັດຕັ້ງປະຕິບັດແຜນງົບປະມານປະຈໍາ 06 ເດືອນຕົ້ນປີ ແລະ ທີດທາງແຜນການ 06 ເດືອນທ້າຍປີ 2024; ຮັບຟັງຮ່າງບົດສະຫຼຸບການຂຶ້ນສໍາມະໂນທີ່ດິນ, ການອອກໃບຕາດິນ ແລະ ຈັດສັນປະເພດທີ່ດິນ ຂັ້ນບ້ານແບບມີສ່ວນຮ່ວມ ແລະ ການແກ້ໄຂບັນຫາທີ່ດິນທີເກີດຂື້ນພາຍໃນເມືອງປະຈໍາ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2024;. ໃນໄລຍະ 6 ເດືອນຜ່ານມາ ການຈັດຕັ້ງປະຕິບັດແຜນການ, ໂຄງການ ໃນການສ້າງເສດຖະກິດ ແລະ ແກ້ໄຂຄວາມທຸກຍາກຂອງເມືອງ ສາມາດຂະຫຍາຍຕົວຢູ່ໃນລະດັບ 4,56% ຫຼຸດແຜນການ 5,39% ໃນນີ້: ກະສິກຳ-ປ່າໄມ້ ຂະຫຍາຍຕົວເພີ່ມ 4,42%, ອຸດສາຫະກຳ-ຫັດຖະກຳ ຂະຫຍາຍຕົວເພີ່ມ 4,18%, ການບໍລິຫານ ຂະຫຍາຍຕົວເພີ່ມ 4,96%, ລວມຍອດມູນຄ່າຜະລິດຕະພັນພາຍໃນເມືອງ ປະຕິບັດໄດ້ 254,29 ຕື້ກີບ ເທົ່າກັບ 77,68% ຂອງແຜນງານ, ສະເລ່ຍຕໍ່ຫົວຄົນບັນລຸໄດ້ 420 ໂດລາ ເທົ່າກັບ 8,980,020 ກີບ ການຂຸດຄົ້ນລາຍຮັບ ສາມາດປະຕິບັດໄດ້ 1.524.961.501 ກີບ ກວມເອົາ 88,65% ຂອງແຜນການປີ ແລະ ສາມາດຄຸ້ມຄອງລາຍຈ່າຍໄດ້ທັງໝົດ 1.532.430.042 ກີບ ກວມເອົາ 51,51% ຂອງແຜນການປີ, ສາມາດອອກໃບຕາດິນເປັນລະບົບ ແລະ ສະເພາະຕອນໄດ້ທັງໝົດ 195 ຕອນ, ຈົດຖະບຽນນຳໃຊ້ໄດ້ 15 ຕອນ ຄຸ້ມຄອງການຈັດສັນໄດ້ 8 ປະເພດທີດິນຂັ້ນບ້ານແບບມີສ່ວນຮ່ວມໄດ້ 48 ບ້ານ ພ້ອມນີ້: ບັນດາຜູ້ແທນກອງປະຊຸມຍັງໄດ້ພ້ອມກັນປະກອບຄໍາຄິດຄໍາເຫັນຢ່າງແບບເປີດກວ້າງ ແລະ ກົງໄປກົງມາ ໃສ່ແຕ່ລະຂົງເຂດວຽກງານເພື່ອເຮັດໃຫ້ການຈັດຕັ້ງປະຕິບັດວຽກງານມີຜົນສໍາເລັດດີຂື້ນກ່ວາເກົ່າ.
ໂອກາດນີ້, ທ່ານ ທອງສະຫວັນ ທຳມະວົງໄດ້ເນັ້ນໜັກບັນດາສະມາຊິກອົງການປົກຄອງເມືອງ ແລະ ທຸກພາກສ່ວນທີ່ກ່ຽວຂ້ອງ ຈົ່ງພ້ອມກັນນຳເອົາຕ້ອງນໍາເອົາເນື້ອໃນຂອງກອງປະຊຸມຄັ້ງນີ້ໄປຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດຢູ່ໃນຂົງເຂດຄວາມຮັບຜິດຊອບຂອງຕົນ ດ້ວຍຄວາມຮັບຜິດຊອບສູງ,ໃຫ້ແທດເຖິງຕົວຈິງ ສາມາດກວດກາ, ກວດສອບໄດ້ ແລະ ປະກົດຜົນເປັນຈິງ