ໜ່ວຍພັກຄະນະໂຄສະນາອົບຮົມແຂວງຜົ້ງສາລີ
ຮັບໃບຢັ້ງຢືນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ຄັ້ງທີ V ປະຈຳປີ 2024
ພິທີດັ່ງກ່າວ ໄດ້ຈັດຂຶ້ນໃນຕອນເຊົ້າຂອງວັນທີ 13 ພະຈິກ ປີ 2025 ນະທີ່ຫ້ອງປະຊຸມຂອງຄະນະໂຄສະນາອົບຮົມແຂວງ ໂດຍໃຫ້ກຽດເຂົ້າຮ່ວມເປັນປະທານຂອງສະຫາຍ ສັນຕິ ແກ້ວຍະສານ ຮອງເລຂາພັກແຂວງ ມີສະຫາຍ ນາງ ພອນສະຫວັນ ສັກຕິຄຸນ ກຳມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງຜົ້ງສາລີ, ມີບັນດາສະຫາຍຄະນະພັກ, ຕາງໜ້າຈາກຄະນະຈັດຕັ້ງແຂວງ,ຄະນະກວດກາແຂວງ ແລະ ບັນດາສະຫາຍສະມາຊິກພັກພາຍໃນໜ່ວຍພັກເຂົ້າຮ່ວມ.
ໃນພິທີ ສະຫາຍ ນາງ ພອນສະຫວັນ ສັກຕິຄຸນ ກຳມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງຜົ້ງສາລີ ໄດ້ຜ່ານບົດສະຫຼຸບຫຍໍ້ການນຳພາລວມຂອງໜ່ວຍພັກ ຊຶ່ງສະຫາຍ ໄດ້ຍົກໃຫ້ເຫັນບັນດາຜົນງານຫຼາຍດ້ານ ເປັນຕົ້ນແມ່ນດ້ານດີ, ດ້ານອ່ອນ, ບາງບົດຮຽນທີ່ຖອດຖອນໄດ້ໃນຕະຫຼອດໄລຍະທີ່ຜ່ານມາ ແລະ ທິດທາງແຜນການໃນຕໍ່ໜ້າ.
ຈາກນັ້ນຕາງໜ້າຄະນະຈັດຕັ້ງແຂວງ ກໍໄດ້ຂຶ້ນຜ່ານ ມະຕິຕົກລົງວ່າດ້ວຍການອະນຸມັດມອບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈຳປີ 2024 ສະບັບເລກທີ 993/ຄພຂ, ລົງວັນທີ 14 ຕຸລາ ປີ 2025 ຂຶ້ນມອບໃບຢັ້ງຢືນໂດຍ ສະຫາຍ ສັນຕິ ແກ້ວຍະສານ ຮອງເລຂາພັກແຂວງ ແລະ ຂຶ້ນກ່າວຮັບໂດຍ ສະຫາຍ ນາງ ພອນສະຫວັນ ສັກຕິຄຸນ ກຳມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງຜົ້ງສາລີ ພ້ອມຄະນະຢ່າງສົມກຽດ.
ຂ່າວ: ຍີນໄຊ ສີບຸນເຮືອງ