ຊົມເຊີຍວັນສ້າງຕັ້ງຄະນະໂຄສະນາອົບຮົມຜົ້ງສາລີ                                                                                                ຂ່ ຳ ນັບຮັບຕ້ອນກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງຜົ້ງສາລີຢ່າງສຸດໃຈ !

ແຂວງຜົ້ງສາລີ ປາຖະກະຖາ ວັນສ້າງຕັ້ງສາຍພົວພັນການທູດ ລາວ - ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາ ມິດຕະພາບ ແລະ ການຮ່ວມມື ລາວ - ຫວຽດນາມ ຄົບຮອບ 45 ປີ

ແຂວງຜົ້ງສາລີ ປາຖະກະຖາ ວັນສ້າງຕັ້ງສາຍພົວພັນການທູດ ລາວ - ຫວຽດນາມ

ຄົບຮອບ 60 ປີ ແລະ ວັນເຊັນສົນທິສັນຍາ ມິດຕະພາບ ແລະ ການຮ່ວມມື ລາວ - ຫວຽດນາມ ຄົບຮອບ 45 ປີ

     ໃນຕອນເຊົ້າຂອງວັນທີ 5 ສິງຫາ 2022 ນີ້, ຢູ່ທີ່ສະໂມສອນໃຫຍ່ຂອງເມືອງບຸນເໜືອ ທາງຄະນະໂຄສະນາອົບຮົມແຂວງ ໄດ້ຈັດພິທີປາຖະກະຖາວັນສ້າງຕັ້ງສາຍພົວພັນການທູດ ລາວ - ຫວຽດນາມ ຄົບຮອບ 60 ປີ (5 ກັນຍາ 1962 – 5 ກັນຍາ 2022) ແລະ ວັນເຊັນສົນທິສັນຍາ ມິດຕະພາບ ແລະ ການຮ່ວມມືລາວ - ຫວຽດນາມ ຄົບຮອບ 45 ປີ (18 ກໍລະກົດ 1962 - 18 ກໍລະກົດ 2022) ຂຶ້ນ ໂດຍການເຂົ້າຮ່ວມ ແລະ ປາຖະກະຖາ ຂອງທ່ານ ບົວທອງ ອຸແສງຄຳ ຮອງເລຂາພັກແຂວງ, ຫົວໜ້າຄະນະ

ຊີ້ນຳການກະກຽມສະເຫຼີມສະຫຼອງປີສາມັກຄີມິດຕະພາບ ລາວ - ຫວຽດນາມ ຂັ້ນແຂວງ ຊຶ່ງທ່ານໄດ້ຍົກໃຫ້ເຫັນຄວາມໝາຍສໍາຄັນຂອງສາຍພົວພັນມິດຕະພາບ,  ຄວາມສາມັກແບບຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃນໄລຍະທີ່ຜ່ານມາ ຊຶ່ງໃຫ້ຮູ້ວ່າສອງຊາດ ລາວ-ຫວຽດນາມ, ນັບແຕ່ມື້ສ້າງຕັ້ງພັກກອມມູນິດອິນດູຈີນ ໃນປີ 1930 ໂດຍແມ່ນປະທານໂຮ່ຈິມິນເປັນຜູ້ກໍ່ຕັ້ງຂຶ້ນ, ຄວາມເປັນພີ່ນ້ອງລະຫວ່າງສອງຊາດມີຄວາມເລິກເຊິ່ງຂຶ້ນ, ກວ່າເຄິ່ງສະຕະວັດທີ່ຜ່ານມາສອງຊາດ ລາວ-ຫວຽດນາມ ໄດ້ຄຽງບ່າຄຽງໄຫຼ່ກັນຕໍ່ສູ້ຢ່າງພິລະອາດຫານ, ຜ່ານຜ່າທຸກອຸປະສັກທຸລະກັນດານທີ່ເຕັມໄປດ້ວຍຄວາມເສຍສະຫຼະ, ແລະ ດ້ວຍຄໍາສອນອະມະຕະຂອງປະທານໂຮ່ຈິມິນ ວ່າ “ການຊ່ວຍເຫຼືອເພື່ອນ ປຽບເໝືອນການຊ່ວຍເຫຼືອຕົນເອງ”; ປະຊາຊົນຫວຽດນາມ ແລະ ປະຊາຊົນລາວ ແມ່ນເພື່ອນບ້ານໃກ້ຄຽງ, ອ້າຍນ້ອງອັນໃກ້ຊິດສະໜິດສະໜົມ, ຮ່ວມສູ້ຮົບໃນຂຸມຄອງດຽວກັນ, ໄດ້ຄຽງບ່າຄຽງໄຫຼ່ຮ່ວມສຸກຮ່ວມທຸກ, ຮ່ວມກັນຮົບ, ພ້ອມກັນເອົາຊະນະ, ນ້ຳໃຈສາມັກຄີສູ້ຮົບ ແລະ ນໍ້າໃຈມິດຕະພາບຖານອ້າຍນ້ອງລະຫວ່າງປະຊາຊົນສອງປະເທດ ພວກເຮົາໄດ້ຮັບການຫຼໍ່ຫຼອມຈາກການຕໍ່ສູ້ ແມ່ນປັດໄຈແຫ່ງໄຊຊະນະ ຂອງພາລະກິດຕໍ່ສູ້ກູ້ຊາດ, ແມ່ນພື້ນຖານອັນໝັ້ນແກ່ນໃຫ້ແກ່ການພົວພັນຮ່ວມມືຍາວນານ ເພື່ອສ້າງສາປະເທດ ຊາດຕາມຈຸດໝາຍທີ່ພັກໄດ້ກໍານົດໄວ້.

   

     ລາວ ແລະ ຫວຽດນາມ ແມ່ນສອງປະເທດລ້ວນເເຕ່ຕັ້ງຢູ່ເເຫຼມອິນດູຈີນ, ອີງຫຼັງໃສ່ສາຍພູຫຼວງທີ່ສູງສະຫງ່າ, ຮ່ວມດື່ມນ້ຳສາຍແມ່ຂອງ, ເປັນເພື່ອນບ້ານໃກ້ຊິດຕິດແທດກັນມາແຕ່ດົນນານ, ມີເຂດນໍ້າແດນດິນຕິດລຽນກັນຫຼາຍກວ່າ 2.000 ກິໂລແມັດ, ມີມູນເຊື້ອສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ, ຜູກພັນສະໜິດແໜ້ນແບບບ້ານໃກ້ເຮືອນຄຽງ, ບ້ານພີ່ເມືອງນ້ອງ, ບ້ານແກ່ວເຮືອນດອງ. ໄປພຸ້ນກິນປາ-ມາພີ້ກິນ ເຂົ້າ ເຄີຍກິນນ້ຳຮ່ວມສາຍ, ກິນປາຮ່ວມຫ້ວຍ, ປະຊາຊົນບັນດາເຜົ່າມີຕົ້ນກຳເນີດດ້ານວັດທະນະທໍາ, ຮີດຄອງປະເພນີແບບດໍາລົງຊີວິດແລະ ຄວາມເຊື່ອຖື, ມີພາສາປາກເວົ້າຄ້າຍຄືກັນຫຼາຍດ້ານເຊິ່ງສາມາດເຂົ້າໃຈກັນໄດ້.

  

     ໃນຊຸມປີ 1959-1960 ຜູ້ນໍາຂອງສອງປະເທດໄດ້ຮ່ວມກັນວາງແນວທາງຍຸດທະສາດ, ຍຸດໂທບາຍ ແລະ ວິທີປະຕິວັດເພື່ອຕີເອົາຊະນະຈັກກະພັດຜູ້ຮຸກຮານ, ໃນເວລານັ້ນປະທານໂຮ່ຈິມິນ ໄດ້ຢັ້ງຢືນໃຫ້ເຫັນວ່າ: ສາຍພົວພັນລະຫວ່າງສອງພັກທີ່ມີອຸດົມ ການກອມມູນິດອັນດຽວກັນ ລະຫວ່າງສອງປະເທດສັງຄົມນິຍົມນໍາກັນແລ້ວ, ຍັງມີສາຍພົວພັນອັນສະໜິດສະໜົມແບບເປັນກັນເອງເຊິ່ງບໍ່ຄືປະເທດໃດໃນໂລກ, ເພິ່ນຍັງໄດ້ເວົ້າວ່າ  “ພວກເຮົາຕ້ອງເວົ້າວ່າ”, “ສາຍພົວພັນພິເສດ” ຈິ່ງຈະຖືກຕ້ອງ, ສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານທີ່ມີຄວາມດູດດື່ມເລິກເຊິ່ງແໜ້ນແຟ້ນ, ໝັ້ນຄົງ ແລະ ມີຊີວິດຊີວາທີ່ເຕັມໄປດ້ວຍຄວາມເຫຼື້ອມໃສ ຫາສາຍພົວ ພັນໃດໃນໂລກນີ້ປຽບທຽບໄດ້ຍາກ ຊຶ່ງປະທານໂຮ່ຈິມິນ ໄດ້ກັ່ນຕອງພັນລະນາສາຍພົວພັນ ລາວ-ຫວຽດນາມ ໃນບົດກະວີທີ່ມີຊື່ສຽງຂອງເພິ່ນ ວ່າ: “ ຮັກແພງກັນໝາຍໝັ້ນຫຼາຍສັນພູກໍປີນໄຕ່ ຫຼາຍນໍ້າໃຫຍ່ ແລະ ໂຄກຄ້ອຍ ຂວາງກັ້ນກໍດຸ່ງໄປ ສອງຊາດລາວຫວຽດນາມ ໄດ້ຝັງຮັກຢູ່ໃນໃຈ ຮົງຮ່າທັງແມ່ຂອງບໍ່ເລິກປຸນປານໄດ້ ", ປະທານສຸພາ ນຸວົງ ໄດ້ເວົ້າວ່າ: “ ລາວ ແລະ ຫວຽດນາມ ເປັນປະເທດເພື່ອນບ້ານໃກ້ຄຽງ, ເປັນບ້ານພີ່ເມືອງນ້ອງທີ່ໃກ້ຊິດຕິດພັນກັນຮ່ວມສາຍພູຫຼວງອັນດຽວ, ຮ່ວມແມ່ນໍ້າຫຼໍ່ລ້ຽງປະຊາຊົນ ສອງຊາດພວກເຮົາໄດ້ຮ່ວມສຸກຮ່ວມທຸກຄູ່ກັນມາຕັ້ງແຕ່ດົນນານ, ພວກເຮົາໄດ້ຮ່ວມຊະຕາກຳອັນດຽວກັນ, ມີສັດຕູໂຕດຽວກັນ, ເຄີຍອຸ້ມຊູຊ່ວຍເຫຼືອກັນໃນຍາມສ້າງຊາດກໍຄືໃນຍາມກູ້ຊາດ ມິດຕະພາບຖານພີ່ນ້ອງລະຫວ່າງ ລາວ-ຫວຽດນາມ ພວກເຮົາ ແມ່ນຍິ່ງໃຫຍ່ ແລະ ບໍ່ມີບົດເພງ ແລະ ກາບກອນໃດໆຈະພັນລະນາໃຫ້ຄົບຖ້ວນໄດ້, ມິດຕະພາບອັນນັ້ນສູງກວ່າຈອມພູ, ຍາວກວ່າລໍາແມ່ນ້ຳ, ກວ້າງກວ່າມະຫາສະໝຸດ, ງາມກວ່າເດືອນເພັງ, ຫອມກວ່າກິ່ນດອກໄມ້ທີ່ຫອມກວ່າເພິ່ນ. ມິດຕະພາບອັນສູງເດັ່ນນັ້ນປະຊາຊົນທັງສອງຊາດພວກເຮົາ ໄດ້ເສີມສ້າງຂຶ້ນດ້ວຍນ້ຳຈິດນ້ຳໃຈຂອງພວກເຮົາ. ສະ ນັ້ນ, ມັນຈຶ່ງຈະບໍ່ມີສັດຕູມານຮ້າຍໃດໆຈະມາແຕະຕ້ອງມ້າງເພໄດ້ ”. ສຳ ລັບການພົວພັນຮ່ວມມື ລະຫວ່າງແຂວງຜົ້ງສາລີ ກັບ ສສ ຫວຽດນາມ ໃນໄລຍະຜ່ານມາແມ່ນໄດ້ມີການພົວພັນຮ່ວມ ມື ແລະ ຊ່ວຍເຫລືອເຊິ່ງກັນ ແລະ ກັນໃນຫລາຍລະດັບ ແລະ ຫລາຍຂົງເຂດວຽກງານ, ເປັນຕົ້ນ: ໄດ້ແຕ່ງຕັ້ງຄະນະຜູ້ແທນຂັ້ນສູງຂອງແຂວງໄປພົບປະ-ຢ້ຽມຢາມບັນດາແຂວງພາກເໜືອ ຂອງ ສສ ຫວຽດນາມ ຢ່າງເປັນປົກກະ ຕິ, ພ້ອມກັນນັ້ນລັດຖະບານ ແລະ ບັນດາແຂວງຂອງ ສສ ຫວຽດນາມກໍໄດ້ຊ່ວຍທຶນການກໍ່ສ້າງຊັບພະຍາກອນມະນຸດໃນການຝຶກອົບຮົມໄລຍະສັ້ນ, ໄລຍະຍາວ, ໄປທັດສະນະສຶກສາຢູ່ຫວຽດນາມ ແລະ ທຶນການສຶກສາສົ່ງນັກຮຽນຈົບຊັ້ນມໍ7, ພະນັກງານໄປຮຽນລະບົບເຊື່ອມຕໍ່ ທັງໃນແຜນ ແລະ ນອກແຜນໄລຍະແຕ່ປີ 2016 - 2021 ມີ 121 ຄົນ, ຍິງ20 ຄົນ.

     ນອກນັ້ນຍັງໄດ້ຮັບການຊ່ວຍເຫຼືອເປັນວັດຖຸແລະ ເງິນສົດ ຈາກບັນດາແຂວງພາກເໜືອຂອງ ສສ ຫວຽດນາມ. ໃນ 6 ປີຜ່ານມາ ຄະນະຜູ້ແທນແຂວງຜົ້ງສາລີ ໄປເຄື່ອນໄຫວຢູ່ບັນດາແຂວງຂອງສສຫວຽດນາມລວມ 156 ຄະນະ, ມີ 1.261 ທ່ານ, ຍິງ 213ທ່ານ ແລະ ໄດ້ຕ້ອນຮັບຄະນະຜູ້ແທນຈາກບັນດາແຂວງຂອງສສຫວຽດນາມລວມ 94 ຄະນະ, ມີ 1.829 ທ່ານ,ຍິງ 426 ທ່ານ. ໄດ້ຮັບການຊ່ວຍເຫຼືອຈາກຫວຽດນາມເປັນເງິນຈໍານວນ 136 ກ່ວາຕື້ດົງ; ນອກຈາກນີ້4 ແຂວງພາກເໜືອ (ດຽນບ່ຽນ, ລາຍເຈົ່າ, ເຊີນລາ ແລະ ວິ່ງຟຸກ )  ແຫ່ງ ສສ ຫວຽດນາມມາຊ່ວຍສ້າງໂຮງຮຽນທິດສະດີການເມືອງ-ການປົກຄອງແຂວງຜົ້ງສາລີມີ ເປັນມູນຄ່າທັງໝົດ17 ຕື້ກວ່າກີບ ແລະ ລັດຖະບານແຫ່ງ ສສ ຫວຽດນາມ ໄດ້ມາຊ່ວຍສ້າງໂຮງຮຽນມັດທະຍົມຄົບວົງຈອນ 1 ແຫ່ງ ຢູ່ເມືອງບຸນເໜືອ ເປັນມູນຄ່າທັງໝົດ 120 ຕື້ດົງ. ພ້ອມກັນນັ້ນ, ແຂວງຜົ້ງສາລີ ກໍໄດ້ຊ່ວຍເຫຼືອແຂວງເຊີນລາ 20.000ໂດລາ ແລະ ຊ່ວຍແຂວງລາຍເຈົ່າ ຈໍານວນ 100 ລ້ານກີບ ແລະ ໄດ້ຊ່ວຍເງິນຈໍານວນ 275 ລ້ານກີບ ໃຫ້ແຂວງດຽນບຽນ ແລະ ແຂວງເຊີນລາ ແຫ່ງ ສສ ຫວຽດນາມ ເພື່ອປ້ອງກັນການລະບາດຂອງເຊື້ອໄວຣັດ Covid-19.

     ເຂົ້າຮ່ວມຮັບຟັງໃນຄັ້ງນີ້, ມີບັນທ່ານ ຫົວໜ້າ - ຮອງຫົວໜ້າພະແນກການ, ອົງການຈັດຕັ້ງມະຫາຊົນ, ອົງການທຽບເທົ່າ, ລັດວິສະຫະກິດຕ່າງໆ, ຕະຫຼອດພະນັກງານ - ລັດຖະກອນອ້ອມຂ້າງແຂວງເຂົ້າຮ່ວມຢ່າງຫຼວງຫຼາຍ.

ຂ່າວໃໝ່

ພິທີພົບປະແລກປ່ຽນບົດຮຽນລະຫວ່າງຄະນະໂຄສະນາອົບຮົມແຂວງຜົ້ງສາລີ ກັບຄະນະໂຄສະນາສຶກສາແຂວງດຽນບ່ຽນ

ເຊື່ອມຕໍ່ເວບໄຊ້ທ

ເລກໂທ ສຸກເສີນ

ແຈ້ງໄຟໄໝ້:   1190
ຕຳຫຼວດ:       1191
ລົດໂຮງໝໍ:    1195
ໄຟຟ້າ:          1199
ນໍ້າປະປາ:      1169

ສະຖິຕິຜູ້ເຂົ້າຊົມ:

222263
ມື້ນີ້ມື້ນີ້357
ມື້ວານນີ້ມື້ວານນີ້357
ອາທິດນີ້ອາທິດນີ້1354
ເດືອນນີ້ເດືອນນີ້2410
ທັງໝົດທັງໝົດ222263

ກິດຈະກຳ