ເມືອງໃໝ່ສະເຫຼີມສະຫຼອງວັນປູກຕົ້ນໄມ້ແຫ່ງຊາດ
ພິທີດັ່ງກ່າວໄດ້ຈັດຂຶ້ນໃນຕອນເຊົ້າຂອງວັນທີ 3 ມິຖຸນາ 2024 ນີ້, ທີ່ສະໂມສອນຂອງເມືອງໃໝ່ແຂວງຜົ້ງສາລີ ໂດຍການໃຫ້ກຽດເຂົ້າຮ່ວມຂອງທ່ານ ສອນສະໜຸກ ສີສຸລາດ ເລຂາພັກເມືອງ-ເຈົ້າເມືອງ, ມີບັນດາກຳມະປະຈຳການພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການທະຫານ, ຕຳຫຼວດ, ພະນັກງານ-ລັດຖະກອນ, ອົງການຈັດຕັ້ງສາກົນພ້ອມດ້ວຍເລຂາພັກບ້ານ 6 ບ້ານເທດສະບານເມືອງເຂົ້າຮ່ວມ.
ໃນພິທີທ່ານ ວຽງສະໄໝ ສີສົງຄາມ ກຳມະການພັກເມືອງ, ຫົວໜ້າຫ້ອງການກະສິກຳ ແລະ ປ່າໄມ້ເມືອງໃໝ່ ໄດ້ຂຶ້ນຜ່ານປະຫວັດຄວາມເປັນມາ ວັນປູກຕົ້ນໄມ້ແຫ່ງຊາດ 01 ມິຖຸນາ 2024. ທັງນີ້ກໍ່ເພື່ອເປັນການປຸກຈິດສຳນຶກ ແລະ ທັງເປັນການປຸກລະດົມ ໃຫ້ປະຊາຊົນຊາວເມືອງໃໝ່ໄດ້ຮ່ວມແຮງຮ່ວມໃຈກັນຢ່າງຈິງຈັງ ເພື່ອເປັນການປຸກຈິດສຳນຶກ ໃຫ້ແກ່ທຸກຊັ້ນຄົນຮັບຮູ້ ແລະ ເຂົ້າໃຈຕໍ່ຄວາມໝາຍຄວາມສຳຄັນຕໍ່ການບູລະນະປົກປັກຮັກສາປ່າໄມ້ ໃຫ້ມີຄວາມອຸດົມສົມບູນ ແລະ ເປັນປັດໄຈທີ່ສຳຄັນແກ່ການພັດທະນາເສດຖະກິດ-ສັງຄົມປັດຈຸບັນໃຫ້ຢືນນານ. ບູລະນະປົກປັກຮັກສາປ່າໄມ້ ເມືອງໃໝ່ໃຫ້ເປັນສີຂຽວ.
ໂອກາດນີ້, ທ່ານ ສອນສະໜຸກ ສີສຸລາດ ໄດ້ໂອ້ລົມ ແລະ ຮຽກຮ້ອງມາຍັງພະນັກງານຫຼັກແຫຼງຂອງເມືອງ,ທຸກພາກສ່ວນໃນສັງຄົມ ຮ່ວມແຮງຮ່ວມໃຈກັນປົກປັກຮັກສາປ່າໄມ້ ໂດຍຫັນປ່ຽນພຶດຕິກຳ ແລະ ຈິນຕະນາການ ຈາກການພັດທະນາເສດຖະກິດ-ສັງຄົມ ທີ່ເພື່ອໃຫ້ມີຄວາມຍືນຍົງ ແລະ ຍາວນານ. ເພື່ອຄຸນນະພາບຊີວິດຂອງປະຊາຊົນ, ສ້າງເມືອງໃໝ່ໃຫ້ເປັນເມືອງສີຂຽວ, ສະອາດງາມຕາ.
ຈາກນັ້ນທາງຫ້ອງການກະສິກຳ ແລະ ປ່າໄມ້ເມືອງຍັງໄດ້ແຈກຢາຍເບ້ຍໄມ້ດູລາຍ ແລະ ອື່ນໆຈຳນວນ 500 ເບ້ຍ ແລະພາກັນໄປປູກຕາມສວນໃຜລາວໃຫ້ອຸດົມສົມບູນ ແລະ ຂະຫຍາຍອອກໄປໃຫ້ນັບມື້ນັບຫຼາຍຂື້ນ.