ເມືອງບຸນໃຕ້ ແຂວງຜົ້ງສາລີ
ປາຖະກະຖາວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ແລະ ວັນ ຊາດສາທາລະນະລັດ ສັງຄົມນິຍົມຫວຽດນາມ ຄົບຮອບ 79 ປີ
ຕອນເຊົ້າຂອງວັນທີ 06 ກັນຍາ 2024 ນີ້ ທາງຄະນະໂຄສະນາອົບຮົມເມືອງບຸນໃຕ້ ໄດ້ສົມທົບກັບຫ້ອງການສະຫະພັນນັກຮົບເກົ່າເມືອງ ຈັດໃຫ້ມີພິທີປາຖະກະຖາສອງວັນປະຫວັດຊາດຄື: ວັນຊາດ ສສ ຫວຽດນາມຄົບຮອບ 79 ປີ ( 02. 9. 1945 – 02. 9. 2024 ) ແລະ ວັນສ້າງຕັ້ງສະຫະພັນນັກຮົບເກົ່າແຫ່ງຊາດຄົບຮອບ 22 ປີ ( 09. 9. 2002 – 09. 9. 2024 ) ຂຶ້ນຢ່າງເປັນທາງການ ນະທີ່ສະໂມສອນ ເມືອງບຸນໃຕ້, ແຂວງຜົ້ງສາລີ ພາຍໃຕ້ການເປັນປະທານຂອງທ່ານ ສານ ສີວົງສາ ກຳມະການປະຈຳພັກເມືອງ, ປະທານແນວລາວສ້າງຊາດເມືອງ, ຜູ້ຊີ້ນຳອົງການຈັດຕັ້ງມະຫາຊົນ, ມີບັນດາທ່ານ ຄະນະປະຈຳພັກເມືອງ, ກຳມະການພັກເມືອງ, ຫົວໜ້າ – ຮອງຫົວໜ້າຫ້ອງການ, ປະທານ – ຮອງປະທານອົງການຈັດຕັ້ງມະຫາຊົນ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ, ອຳນວຍການໂຮງຮຽນ – ໂຮງໝໍ, ເລຂາພັກນາຍ ບ້ານເທດສະບານຕະຫຼອດຮອດພະນັກງານ – ລັດຖະກອນ ອ້ອມຂ້າງເມືອງ ເຂົ້າຮ່ວມຮັບຟັງທັງໝົດ 128 ທ່ານ, ຍິງ 39 ທ່ານ.
ໂອກາດນີ້ ທ່ານ ສານ ສີວົງສາ ກຳມະການປະຈຳພັກເມືອງ ປະທານແນວລາວສ້າງຊາດເມືອງ ໄດ້ເລົ່າຄືນວັນສ້າງຕັ້ງສະຫະພັນນັກຮົບເກົ່າ ຊຶ່ງທ່ານໄດ້ຍົກໃຫ້ເຫັນການເຄື່ອນໄຫວປະຕິວັດ, ຜົນງານນຳພາລະກິດຕໍ່ສູ້ປົດປ່ອຍຊາດ, ປົກປັກຮັກສາສ້າງສາພັດທະນາປະເທດຊາດ.
ຈາກນັ້ນ ທ່ານ ອຸ່ນແປງ ທຳມະໂນໄຊ ກຳມະການພັກເມືອງຫົວໜ້າຄະນະໂຄສະນາອົບຮົມເມືອງໄດ້ຂື້ນ ເລົ່າມູນເຊື້ອ ຂອງການຂະຫຍາຍຕົວຂອງວັນຊາດທີ 2 ກັນຍາ ຄົບຮອບ 79 ປີ, ທ່ານໄດ້ຍົກໃຫ້ເຫັນມູນເຊື້ອອົງອາດແຫ່ງການຕໍ່ຕ້ານຮຸກຮານ ຂອງສັດຕູຈາກພາຍນອກ ແລະ ສ້າງສາພັດທະນາ ໂດຍສຶບຖອດມູນເຊື້ອອັນອົງອາດຂອງບັນພະບູລຸດ, ປະຊາຊົນບັນດາເຜົ່າພາຍໃຕ້ການນຳພາປະຊາຊົນຫວຽດນາມໄດ້ສາມັກຄິກັນຕໍ່ສູ້ຢ່າງພິລະອາດຫານຕ້ານການຮຸກຮານ ແລະ ການຄອບຄອງຂອງພວກຈັກກະພັດລ່າເມືອງແບບເກົ່າ ແລະ ໃໝ່ ສາມາດປົດປ່ອຍປະເທດຊາດ ຂື້ນຢ່າງສະຫງ່າຜ່າເຜີຍ ໃນວັນທີ 02 ກັນຍາ ປີ 1945 ແມ່ນທີ່ມີຄວາມໜາຍຄວາມສຳຄັນ ສຳລັບທົ່ວພັກ – ທົ່ວລັດ, ແລະ ທົ່ວປ່ວງຊົນຫວຽດນາມ, ແມ່ນວັນໄຊສະນະອັນຍິ່ງໃຫ່ຍ ໃນປະຫວັດສາດແຫ່ງການຕໍ່ສູ້ເປັນພັນໆປີ ຂອງຊາວຫວຽດນາມ, ແມ່ນວັນທີປະຊາຊົນຫວຽດນາມໄດ້ເປັນເຈົ້າຂອງປະເທດຊາດຢ່າງແທ້ຈິງ, ໄດ້ເອກະລາດຢ່າງສົມບຸນ ແລະ ມີອະທີປະໄຕຢ່າງຄົບຖ້ວນອັນສົມກຽດ ແລະ ມີຖານະເທົ່າທຽມກັບປະເທດອື່ນໆ ໃນເວທີປະຊາຄົມໂລກ, ວັນທີ 2 ກັນຍາ ແມ່ນແຫ່ງສັນຕິພາບ, ວັນແຫ່ງການກ້າວສູ່ຍົກສະໄໝໃໝ່ ແຫ່ງການສ້າງປະເທດຊາດກາຍເປັນປະເທດສາທາລະນະສັງຄົມນິຍົມຫວຽດນາມ.