ແຕ່ງຕັ້ງ ທ່ານ ໄຊນະຄອນ ອິນທະວົງ ເປັນຮອງເລຂາພັກແຂວງ, ຮອງເຈົ້າແຂວງໆຜົ້ງສາລີຄົນໃໝ່
ໃນຕອນເຊົ້າຂອງວັນທີ 20 ກັນຍາ 2024 ຜ່ານມານີ້ ທີ່ຫ້ອງປະຊຸມຂອງຫ້ອງວ່າການແຂວງຜົ້ງສາລີ ໄດ້ຈັດໃຫ້ມີພິທີປະ ກາດແຕ່ງຕັ້ງຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງຜົ້ງສາລີ ຄົນ ໃໝ່ຂຶ້ນຢ່າງເປັນທາງການ ໂດຍການເຂົ້າຮ່ວມຂອງທ່ານ ປອ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ຜູ້ຊີ້ນຳວຽກງານຮອບດ້ານຂອງແຂວງຜົ້ງສາລີ, ມີທ່ານ ຄຳຜອຍ ວັນນະສານ ກຳມະການສູນກາງພັກ ເລຂາພັກແຂວງ ເຈົ້າແຂວງໆຜົ້ງສາລີ, ມີບັນດາທ່ານໃນຄະນະບໍລິຫານງານພັກແຂວງ, ບັນດາເຈົ້າເມືອງ, ຫົວໜ້າ-ຮອງພະແນກການ, ອົງການທຽບເທົ່າ ແລະ ພະນັກງານຫຼັກແຫຼ່ງພາຍໃນແຂວງ ພ້ອມດ້ວຍພາກສ່ວນທີ່ກ່ຽວຂ້ອງຈາກສູນກາງເຂົ້າຮ່ວມ.
ໃນພິທີ ທ່ານ ຄຳປ່ຽນ ແກ້ວສໍລະສິງ ຫົວໜ້າກົມກົງຈັກການຈັດຕັ້ງ ແລະ ກົດລະບຽບພັກຄະນະຈັດຕັ້ງສູນກາງພັກ ໄດ້ຜ່ານຄຳສັ່ງຂອງຄະນະເລຂາທິການສູນກາງພັກສະບັບເລກທີ 220/ຄລສພ, ລົງວັນທີ 29 ສິງຫາ 2024 ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ຢູ່ແຂວງຜົ້ງສາລີ, ຄຳສັ່ງຂອງນາຍົກລັດຖະມົນຕີສະບັບເລກທີ14/ນຍ,ລົງວັນທີ 30 ສິງຫາ2024 ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ໂດຍໄດ້ຍົກຍ້າຍ ທ່ານ ໄຊນະຄອນ ອິນທະວົງ ຮອງລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄປຮັບໜ້າທີ່ໃໝ່ຢູ່ແຂວງຜົ້ງສາລີ, ມະຕິຕົກລົງຂອງຄະນະເລຂາທິການສູນກາງພັກສູນກາງພັກ ສະບັບເລກທີ 221 /ຄລສພ, ລົົົົົົົົງວັນທີ 29 ສິງຫາ 2024 ວ່າດ້ວຍການແຕ່ງຕັ້ງ ທ່ານ ໄຊນະຄອນ ອິນທະວົງ ເປັນກຳມະການຄະນະບໍລິຫານງານພັກແຂວງ, ກໍາມະການປະຈໍາພັກແຂວງ ແລະ ເປັນຮອງເລຂາຄະນະບໍລິຫານງານພັກແຂວງຜົ້ງສາລີ, ຜ່ານຂໍ້ຕົກລົງຂອງທ່ານເຈົ້າແຂວງຜົ້ງສາລີ ສະບັບເລກທີ 779/ຂຜລ, ລົງວັນທີ 13 ກັນຍາ 2024 ວ່າດ້ວຍການແຕ່ງຕັ້ງໃຫ້ພະນັກງານດຳລົງຕໍ່າແໜ່ງບໍລິຫານ ໂດຍໄດ້ແຕ່ງຕັ້ງ ທ່ານ ໄຊນະຄອນ ອິນທະວົງ ເປັນຮອງເຈົ້າແຂວງໆຜົ້ງສາລີ.
ໂອກາດນີ້, ທ່ານ ປອ ສິນລະວົງ ຄຸດໄພທູນ ໄດ້ໂອ້ລົມຕໍ່ພິທີປະກາດແຕ່ງຕັ້ງ ເຊິ່ງທ່ານໄດ້ກ່າວວ່າ: ການປະກາດການຈັດຕັ້ງໃນເທື່ອນີ້ເປັນບາດກ້າວອັນສຳຄັນໃນການແຕ່ງຕັ້ງພະນັກງານການນຳຍຸດທະສາດ ແນ່ໃສ່ກະກຽມເຂົ້າສູ່ກອງປະຊຸມໃຫຍ່ຂອງແຂວງໃຫ້ມີຜົນສຳເລັດສູງ ເຊິ່ງ ທ່ານ ໄຊນະຄອນ ອິນທະວົງ ກໍ່ເປັນຜູ້ໜຶ່ງທີ່ມີຄວາມຮູ້ຄວາມສາມາດໃນການຊີ້ນຳ-ນຳພາ ແລະ ໄດ້ມີການເຕີບໃຫຍ່ແຕ່ຮາກຖານຂຶ້ນມາ ມີຄວາມສາມາດດ້ານການເສດຖະກິດ-ການເງິນ, ດ້ານການກໍ່ສ້າງພັກ-ພະນັກງານ, ເພື່ອມາຊ່ວຍແຂວງຜົ້ງສາລີ ວາງແຜນພັດທະນາເສດຖະກິດ-ສັງຄົມຂອງແຂວງ, ໃນການຂຸດຄົ້ນແຫຼ່ງລາຍຮັບໃຫ້ໄດ້ເພີ່ມຂຶ້ນ ພັດທະນາເສດຖະກິດ-ສັງຄົມຂອງແຂວງໃຫ້ດີຂຶ້ນໃນຕໍ່ໜ້າ, ດັ່ງນັ້ນຮຽກຮ້ອງມາຍັງບັນດາສະຫາຍໃຫ້ມີຄວາມເປັນເອກະພາບໃນການປະກາດແຕ່ງຕັ້ັງໃນຄັ້ງນີ້; ຕໍ່ກັບພະນັກງານການນໍາທີ່ໄດ້ຮັບການແຕ່ງຕັ້ງໃນຄັ້ງນີ້ ແລະ ການນໍາພາຍໃນແຂວງຜົ້ງສາລີ ສືບຕໍ່ເອົາໃຈໃສ່ຫຼາຍບັນຫາທີ່ສໍາຄັນ ຄື: ຕ້ອງອອກແຮງເສີມຂະຫຍາມູນເຊື້ອສາມັກຄີເປັນປຶກແຜ່ນພາຍໃນຄະນະພັກ, ເຮັດໃຫ້ຄະນະພັກກາຍເປັນໃຈກາງ ການຈັດຕັ້ງທີ່ມີຄວາມໜັກແໜ້ນເຂັ້ມແຂງ, ຕ້ອງເປັນແບບຢ່າງທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ ແລະ ຍົກສູງນໍ້າໃຈເສຍສະຫຼະ; ບຸກບືນຄົ້ນຄວ້າຮໍ່າຮຽນ ເພື່ອກຳແໜ້ນແນວທາງນະໂຍບາຍຂອງພັກ, ໜ້າທີ່ການເມືອງຂອງອົງການປົກຄອງແຂວງ, ເສີມຂະຫຍາຍຫົວຄິດປະດິດສ້າງຂອງຄະນະພັກ, ທັງປຸກລະດົມ ແລະ ຮູ້ນຳໃຊ້ມາດຕະການອັນເຂັ້ມງວດ, ພ້ອມນັ້ນກໍຕ້ອງຮູ້ນຳໃຊ້ບັນດາທ່າແຮງທີ່ບົ່ມຊ້ອນ ບໍ່ວ່າຈະເປັນທາງດ້ານບຸກຄະລາກອນ, ກົງຈັກການຈັດຕັ້ງ, ຊັບພະຍາກອນຂອງທ້ອງຖິ່ນ, ເພື່ອໃຫ້ແຂວງບັນລຸບັນດາເປົ້າໝາຍຂອງການພັດທະນາ, ພ້ອມນີ້ທ່ານ ໄດ້ເນັ້ນໜັກໃຫ້ເອົາໃຈໃສ່ຢ່າງແຂງແຮງໃນຂົງເຂດປ້ອງກັນຊາດ-ປ້ອງກັນຄວາມສະຫງົບ ໂດຍຖືເອົາການເພີ່ມທະວີການຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ ເປັນໃຈກາງປະສານສົມທົບ ແລະ ພ້ອມກັນສືບຕໍ່ຄົ້ນຄວ້າ, ປຶກສາຫາລືກ່ຽວກັບບັນຫາທີ່ພົວພັນເຖິງວຽກງານປ້ອງກັນຊາດ-ປ້ອງກັນຄວາມສະຫງົບ ກໍຄືຄວາມໝັ້ນຄົງ, ຄວາມສະຫງົບສຸກຂອງສັງຄົມ.
ໃນໂອກາດທີ່ທ່ານ ປອ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ຜູ້ຊີ້ນຳວຽກງານຮອບດ້ານຂອງແຂວງຜົ້ງສາລີ ໄດ້ມາເຄື່ອນໄຫວວຽກງານຢູ່ແຂວງຜົ້ງສາລີໃນຄັ້ງນີ້ ໄດ້ມອບເງິນຊ່ວຍເຫຼື່ອໃຫ້ອົງການປົກຄອງແຂວງ ຈຳນວນ 300 ລ້ານກີບ ເພື່ອນໍຳໃຊ້ເຂົ້າໃນວຽກງານຕ້ານໄພພິບັດນໍ້າຖ້ວມ ແລະ ສ້ອມແປງຖະໜົນຫົນທາງ, ພ້ອມກັນນີ້ ຄອບຄົວທ່ານ ອາຊ່າງ ລາວລີ ອາດີດຮອງນາຍົກລັດຖະມົນຕີມອບເງິນຊ່ວຍເຫຼື່ອໃຫ້ແກ່ແຂວງຜົ້ງສາລີ ຈຳນວນ 50 ລ້ານກີບ.
