ເມືອງຍອດອູ ແຂວງຜົ້ງສາລີ ປາຖະກະຖາ ວັນຊາດທີ 2 ທັນວາ ແລະ ວັນຄ້າຍວັນເກີດປະທານ ໄກສອນ ພົມວິຫານ
ຕອນເຊົ້າຂອງວັນທີ 3 ທັນວາ 2024 ເມືອງຍອດອູ ແຂວງຜົ້ງສາລີ ໄດ້ຈັດພິທີປາຖະກະຖາ ວັນຊາດທີ 2 ທັນວາ ຄົບຮອບ 49 ປີ (2 ທັນວາ 1975 – 2 ທັນວາ 2024 ) ແລະ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 104 ປີ ( 13 ທັນວາ 1920 – 13 ທັນວາ 2024 ) ຢູ່ທີ່ສະໂມສອນຂອງເມືອງ ໂດຍພາຍໃຕ້ການເປັນປະທານຂອງ ທ່ານ ສົມຫວັງ ສຸມວິໄລ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງ-ເມືອງຍອດອູ ມີບັນດາທ່ານ ກຳມະການປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ນາຍແລະ ພົນທະຫານ, ນາຍ ແລະ ພົນຕຳຫຼວດ ຕະຫຼອດຮອດພະນັກງານ-ລັດຖະກອນ ອ້ອມຂ້າງເມືອງເຂົ້າຮ່ວມ.
ໃນພິທີທ່ານ ມືກ່ຽງ ລາວທາງ ກຳມະການປະຈຳພັກເມືອງ ຮອງເລຂາພັກເມືອງ ຜູ້ຊີ້ນຳວຽກງານພັກ-ພະນັກງານ ໄດ້ເລົ່າປະຫວັດມູນເຊື້ອ, ຄວາມໝາຍ, ຄວາມສຳຄັນຂອງວັນຊາດ ເຊິ່ງທ່ານໄດ້ກ່າວວ່າ: ວັນທີ 2 ທັນວາ 1975 ແມ່ນວັນທີ່ມີຄວາມໝາຍສໍາຄັນ ສໍາລັບທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ, ແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດ ແຫ່ງການຕໍ່ສູ້ຂອງຊາດລາວເຮົາ, ແມ່ນວັນທີ່ປະຊາຊົນລາວບັນດາເຜົ່າ ໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ, ແມ່ນວັນທີ່ປະເທດລາວ ໄດ້ມີເອກະລາດຢ່າງສົມບູນ ແລະ ມີອະທິປະໄຕຢ່າງຄົບຖ້ວນ, ມີທີ່ຕັ້ງອັນສົມກຽດ ແລະ ມີຖານະເທົ່າທຽມກັບປະເທດອື່ນໃນເວທີປະຊາຄົມໂລກ, ແມ່ນວັນແຫ່ງສັນຕິພາບ, ວັນແຫ່ງການກ້າວສູ່ຍຸກສະໄໝໃໝ່ແຫ່ງການສ້າງປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນະຖາວອນ ຢູ່ບົນຜືນແຜ່ນດິນອັນຄົບຖ້ວນ ແລະ ແສນຮັກຂອງພວກເຮົາ.
ຈາກນັ້ນ ທ່ານ ສົມຫວັງ ສຸມວິໄລ ກໍ່ໄດ້ຫວນຄືນມູນເຊື້ອວັນເກີດຂອງປະທານ ໄກສອນ ພົມວິຫານ ຄົບຮອບ 104 ປີ ເຊີ່ງທ່ານເປັນຜູ້ນຳໜ້າພາທາງໃນການປະຕິວັດຕໍ່ສູ້ປົດປ່ອຍຊາດ ແລະ ປົກປັກຮັກສາ ສ້າງສາພັດທະນາ ເຮັດໃຫ້ປະເທດຊາດຂອງພວກເຮົາມີຄວາມຈະເລີນຮຸ່ງເຮືອງສີວິໄລມາຮອດປະຈຸບັນນີ້ ທັງໝົດນັ້ນຄືຜົນສຳເລັດໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນຳພາ-ຊີ້ນຳ ຂອງພັກ. ການປາຖະກະຖາຄັ້ງນີ້ແມ່ນເພຶ່ອລະນຶກເຖິງຜົນງານການປະຕິວັດຕໍ່ສູ້ປົດປ່ອຍຊາດ, ລະນຶກເຖິງຄຸນງາມຄວາມດີ ຂອງປະທານໄກສອນ ພົມວິຫານ ທີ່ມີຕໍ່ປະເທດຊາດ, ທັງເປັນການສຶກສາອົບຮົມພະນັກງານລັດຖະກອນ- ສະມາຊິກພັກ, ນັກຮົບ, ໃຫ້ຮ່ຳຮຽນເອົາຄຸນທາດການເມືອງ, ຄຸນສົມບັດສິນທຳປະຕິວັດ, ແບບແຜນວິທີເຮັດວຽກ, ແບບແຜນດຳລົງຊີວິດ ແລະ ແບບຢ່າງອັນດີງາມຂອງປະທານໄກສອນ ພົມວິຫານ ເພຶ່ອມາຝຶກຝົນຫຼໍ່ຫຼອມຕົນເອງ ໃຫກາຍເປັນສະມາຊິກພັກຫຼັກແຫຼ່ງທີ່ດີ, ມີນໍ້ໃຈຮັກຊາດ ເສີມຂະຫຍາຍຄວາມສາມັກຄີເປັນຈິດໜຶ່ງໃຈດຽວ ແລະ ເປັນຜູ້ສືບທອດພາລະກິດຂອງພັກ, ຂອງຊາດ.