ໜ່ວຍພັກ ຄະນະໂຄສະນາອົບຮົມແຂວງຜົ້ງສາລີ
ໄດ້ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄັ້ງທີ V ປະຈຳປີ 2023
ພິທີມອບ-ຮັບໃບຢັ້ງຍືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຄັ້ງທີ V ປະຈໍາປີ 2023 ຂອງໜ່ວຍພັກ ຄະນະໂຄສະນາອົບຮົມແຂວງຜົ້ງສາລີ ໄດ້ຈັດຂຶ້ນໃນຕອນເຊົ້າຂອງວັນທີ 22 ພະຈີກ 2024 ນີ້, ຢູ່ຫ້ອງປະຊຸມຄະນະໂຄສະນາອົບຮົມແຂວງ. ໂດຍການເປັນກຽດເຂົ້າຮ່ວມຂອງສະຫາຍ ບຸນທະວີ ສໍສຸກັນ ກຳມະການປະຈຳພັກແຂວງ, ປະທານອົງການກວດກາພັກ-ລັດແຂວງ, ມີສະຫາຍ ນາງ ພອນສະຫວັນ ສັກຕິຄຸນ ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ, ມີສະຫາຍ ນາງ ຈັນມະນີ ນາມວົງ ອະດີດກຳມະການພັກແຂວງ ອະດິດຫົວໜ້າຄະນະໂຄສະນາອົບຮົມແຂວງ, ມີຜູ້ຕາງໜ້າຄະນະຈັດຕັ້ງແຂວງ, ກວດກາແຂວງ, ຕະຫຼອດຮອດສະມາຊິກພັກສົມບູນ ແລະ ສໍາຮອງ ພາຍໃນໜ່ວຍພັກເຂົ້າຮ່ວມ.
ໃນພິທີສະຫາຍ ບຸນສຸລີ ໂລມາ ຮອງເລຂາໝ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ ກໍ່ໄດ້ຂຶ້ນຜ່ານບົດສະຫຼູບການກໍ່ສ້າງໜ່ວຍພັກປອດໃສເຂັ້ມແຂງ ແລະ ໜັກແໜ້ນ ປະຈຳປີ 2022 ແລະ ຜ່ານທິດທາງແຜນການກໍ່ສ້າງໜ່ວຍພັກປອດໃສເຂັ້ມແຂງ ແລະ ໜັກແໜ້ນ ໃນຕໍ່ໜ້າ. ເຊີ່ງທ່ານໄດ້ຍົກໃຫ້ເຫັນຜົນງານດ້ານຕັ້ງໜ້າໃນການຊີ້ນຳໆພາການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໝັກແໜ້ນ, ຈຸດອ່ອນຂໍ້ຄົງຂ້າງ ແລະ ບາງບົດຮຽນທີ່ຖອດ ຖອນໄດ້ ໃນໄລຍະທີ່ຜ່ານມາ. ປະຈຸບັນພາຍໃນໜ່ວຍພັກມີສະມາຊີກພັກທັງໝົດ 16 ສະຫາຍ, ຍີງ 9 ສະຫາຍ. ຈາກນັ້ນ ສະຫາຍ ນາງ ກິ່ງເພັດ ແສງສຸບັນ ຕາງໜ້າຄະນະຈັດຕັ້ງແຂວງ ກໍ່ໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 651/ຄພຂ ລົງວັນທີ 11 ຕຸລາ 2024 ວ່າດ້ວຍການຕົກລົງມອບໃບຢັ້ງຢືນໃຫ້ໜວ່ຍພັກ ຄະນະໂຄສະນາອົບຮົມແຂວງຜົ້ງສາລີ ເປັນໜ່ວຍພັກປອດໃສເຂັ້ມແຂງ ແລະ ໜັກແໜ້ນ ປະຈໍາປີ 2023. ເປັນກຽດຂຶ້ນມອບໃບຢັ້ງຍືນໂດຍ ສະຫາຍ ບຸນທະວີ ສໍສຸກັນ ກຳມະການປະຈຳພັກແຂວງ, ປະທານອົງການກວດກາພັກ-ລັດແຂວງ ແລະ ຂຶ້ນຮັບໂດຍ ສະຫາຍ ບຸນສຸລີ ໂລມາ ຮອງເລຂາໝ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ.
ຈາກນັ້ນ ສະຫາຍ ນາງ ວັນເຮືອງ ສໍດາລາ ຮອງຫົວໜ້າຄະນະໂຄສະນາອົບຮົມແຂວງຜົ້ງສາລີ ໄດ້ຂຶ້ນຜ່ານຂໍ້ຕົກລົງຂອງຄະນະຊີ້ນຳການແຂ່ງຂັນຍ້ອງຍໍ, ຮັກຊາດ ແລະ ພັດທະນາ ວ່າດ້ວຍການແຂ່ງຂັນຍ້ອງຍໍ, ຮັກຊາດ ແລະ ພັດທະນາ ແຂວງຜົ້ງສາລີ ປະຈຳປີ 2023 ພ້ອມທັງມອບໃບຍ້ອງຍໍຂອງທ່ານເຈົ້າແຂວງ ສະເພາະຂອງຄະນະໂຄສະນາອົບຮົມແຂວງມີ 13 ທ່ານ, ຍິງ, 9 ທ່ານ. ເປັນກຽດຂຶ້ນມອບໃບຍ້ອງຍໍໂດຍ ສະຫາຍ ບຸນທະວີ ສໍສຸກັນ ປະທານອົງການກວດກາພັກ-ລັດແຂວງ ແລະ ຂຶ້ນຮັບໂດຍ ພະນັກງານ-ລັດຖະກອນພາຍໃນຄະນະໂຄສະນາອົບຮົມແຂວງ ຕາມລຳດັບ.
ໃນໂອກາດທີມີຄວາມໜາຍຄວາມສໍາຄັນນັ້ນຍັງໄດ້ຮັບຟັງການໂອ້ລົມຈາກ ສະຫາຍ ບຸນທະວີ ສໍສຸກັນ ກຳມະການປະຈຳພັກແຂວງ, ປະທານອົງການກວດກາພັກ-ລັດແຂວງ ເຊິ່ງກ່ອນອື່ນສະຫາຍ ກໍ່ໄດ້ສະແດງຄວາມຍ້ອງຍໍຊົມເຊີຍ ແລະ ຕິລາສູງຕໍ່ຜົນສໍາເລັດການກໍ່ສ້າງໜ່ວຍພັກປອດໃສເຂັ້ມແຂງ ແລະ ໜັກແໜ້ນໃນຄັ້ງນີ້ ພ້ອມນີ້ ສະຫາຍຍັງໄດ້ຮຽກຮ້ອງມາຍັງຄະນະໜ່ວຍພັກສືບຕໍ່ຊີ້ນຳໆພາການເມືອງແນວຄິດໃຫ້ຖັນແຖວສະມາຊີກພັກຢ່າງຕໍ່ເນື່ອງລຽນຕິດ, ສະມາຊິກພັກແຕ່ລະສະຫາຍຕ້ອງເປັນເຈົ້າການໃນການພັດທະນາກົມກອງ, ພັດທະນາຕົນເອງດ້ວຍຄວາມເປັນແບບຢ່າງນໍາໜ້າ, ເຊື່ອໜັ້ນຕໍ່ການນຳພາຂອງພັກ, ມີນໍ້າໃຈເສຍສະຫຼະເພື່ອພັກ, ເພື່ອປະເທດຊາດ ແລະ ເພື່ອປະຊາຊົນ, ສືບຕໍ່ເຊື່ອມຊືມບັນດາເອກະສານຕ່າງໆໃຫ້ແກ່ສະມາຊິກພັກເປັນແຕ່ລະໄລຍະ, ເອົາໃຈໃສ່ໂຄສະນາແນວທາງນະໂຍບາຍຂອງພັກ, ລະບຽບກົດໝາຍຂອງລັດໃຫ້ພາກລັດ, ເອກະຊົນ ແລະ ທົ່ວສັງຄົມເຂົ້າໃຈຢ່າງເລີກເຊີ່ງ ແລະ ທົ່ວເຖີ່ງ, ຈົ່ງພ້ອມກັນເຕົ້າໂຮມຄວາມສາມັກຄີພາຍໃນໜ່ວຍພັກໃຫ້ເປັນປືກແຜນ ແລະ ສືບຕໍ່ຮັກສາມູນເຊື້ອໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນໃຫ້ໜັ້ນຄົງຕະຫຼອດໄປ.