ຄະນະໂຄສະນາອົບຮົມແຂວງຜົ້ງສາລີ ຈັດພິທີປະກາດຍົກຍ້າຍພະນັກງານການນຳ ຂອງຄະນະໂຄສະນາອົບຮົມແຂວງຜົ້ງສາລີ

      ໃນຕອນເຊົ້າ ຂອງວັນທີ 08 ມັງກອນ 2025 ຄະນະໂຄສະນາອົບຮົມແຂວງຜົ້ງສາລີ ໄດ້ຈັດພິທີຍົກຍ້າຍພະນັກງານໄປຢູ່ຂະແໜງການອື່ນ ໂດຍພາຍໃຕ້ການເປັນປະທານ ຂອງທ່ານ ນ. ພອນສະຫວັນ ສັກຕິຄຸນ ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ, ມີບັນດາທ່ານຮອງຫົວໜ້າຄະນະໂຄສະນາອົບຮົມແຂວງ, ຫົວໜ້າຂະແໜງ, ຮອງຂະແໜງ ຕະຫຼອດຮອດພະນັກງານວິຊາການເຂົ້າຮ່ວມ ທັງໝົດ 11 ທ່ານ, ຍິງ 5 ທ່ານ.

     ໃນນີ້, ທ່ານ ບຸນສຸລີ ໂລມາ ຮອງເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ ໄດ້ຂຶ້ນຜ່ານຂໍ້ຕົກລົງ ຂອງເຈົ້າແຂວງ ວ່າດ້ວຍການຍົກຍ້າຍພະນັກງານ ໄປປະຈຳຢູ່ຂະແໜງການອື່ນ ສະບັບເລກທີ 1084/ຂຜລ, ລົງວັນທີ 26 ທັນວາ 2024. ຊຶ່ງໃນນີ້ ໄດ້ຍົກຍ້າຍ ທ່ານ ຄຳຜາສຸກ ແກ້ວນາ ຮອງຫົວໜ້າຄະນະໂຄສະນາອົບຮົມແຂວງ ໄປປະຈຳຢູ່ຫ້ອງວ່າການເມືອງຜົ້ງສາລີ.

      ໃນພິທີ, ໄດ້ມີການເຊັນບົດບັນທຶກການມອບ-ຮັບວຽກງານ ລະຫວ່າງ ທ່ານ ນ. ພອນສະຫວັນ ສັກຕິຄຸນ ຫົວໜ້າຄະນະໂຄສະນາອົບຮົມແຂວງ ແລະ ທ່ານ ຄຳຜາສຸກ ແກ້ວນາ ຮອງຫົວໜ້າຄະນະໂຄສະນາອົບຮົມແຂວງ.

      ຕອນທ້າຍຂອງພິທີ ທ່ານ ນ. ພອນສະຫວັນ ສັກຕິຄຸນ ຫົວໜ້າຄະນະໂຄສະນາອົບຮົມແຂວງ ກໍໄດ້ມີຄຳເຫັນຕໍ່ ທ່ານ ຄຳຜາສຸກ ແກ້ວນາ ເປັນຕົ້ນແມ່ນເພື່ອເປັນທິດທາງໃນການໄປປະຈຳການ ກໍຄືການໄປປະຕິບັດໜ້າທີ່ຢູ່ຍ່ອນໃໝ່.