ແຂວງຜົ້ງສາລີ ປາຖະກະຖາຫວນຄືນມູນເຊື້ອ ວັນສ້າງຕັ້ງສະຫະພັນກຳມະບານລາວຄົບຮອບ 69 ປີ
ໃນຕອນເຊົ້າວັນທີ 30 ມັງກອນ 2025 ນະທີ່ຫ້ອງປະຊຸມຂອງຫ້ອງວ່າການແຂວງ, ໄດ້ຈັດພິທີ ປາຖະກະຖາຫວນຄືນມູນເຊື້ອ ວັນສ້າງຕັ້ງສະຫະພັນກຳມະບານລາວຄົບຮອບ 69 ປີ. ວັນທີ1 ກຸມພາ 1956-1 ກຸມພາ 2025 ໂດຍການເປັນກຽດເຂົ້າຮ່ວມ ຂອງທ່ານ ປອ ໄຊນະຄອນ ອິນທະວົງ, ຮອງ ເລຂາພັກແຂວງ, ຮອງເຈົ້າແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 2 ແຂວງຜົ້ງສາລີ, ມີທ່ານ ນາງ ພອນແກ້ວ ຄຸນສົມເຮືອງ ປະທານສະຫະພັນກຳມະບານແຂວງ, ມີບັນດາ ຮອງ ພະແນກການ, ອົງການທຽບເທົ່າ, ຄະນະປະທານຮາກຖານ ສະຫະພັນກຳມະບານກຳມະບານແຂວງ ຕະຫຼອດຮອດ ສະມາຊິກກຳມະບານອ້ອມຂ້າງແຂວງເຂົ້າຮ່ວມ.
ໃນພິທີ ທ່ານ ປອ ໄຊນະຄອນ ອິນທະວົງ, ຮອງເລຂາພັກແຂວງ, ຮອງເຈົ້າແຂວງ ໄດ້ໃຫ້ກຽດຫວນ ຄືນມູນເຊື້ອໂດຍຍົກໃຫ້ເຫັນມູນເຊື້ອການກຳເນີດ ແລະ ເຕີບໃຫຍ່ຂະຫຍາຍຕົວຂອງສະຫະພັນ ກຳມະບານລາວ ໃນແຕ່ລະໄລຍະ ເປັນຕົ້ນ: ໃນປີ 1893 ປະເທດລາວຕົກຢູ່ໃຕ້ແອກປົກຄອງຂອງ ພວກລ່າເມືອງຂຶ້ນຝຣັ່ງ, ພວກເຂົາໄດ້ເຂັ່ນຂ້າປະຊາຊົນ ຜູ້ອອກແຮງງານລາວ ບັນດາເຜົ່າຢ່າງໂຫດຮ້າຍ ທາລຸນ: ໂດຍສະເພາະພາຍຫຼັງສົງຄາມໂລກຄັ້ງທີ 1 ພວກເຂົາໄດ້ເພີ່ມທະວີການລົງທຶນເຂົ້າໃສ່ການຂຸດ ຄົ້ນວັດຖຸດິບ ແລະ ນໍາເອົາສິນຄ້າເຂົ້າມາຂາຍຢູ່ປະເທດຂອງພວກເຮົາ ແລະ ຊາວຕ່າງດ້າວຈໍານວນ ໜຶ່ງ ກໍໄດ້ລົງທຶນເຂົ້າໃນການດໍາເນີນທຸລະກິດຕາມແບບນາຍທຶນ, ຊຶ່ງໃນເວລານີ້ພວກເຂົາໄດ້ທຸ້ມເທກຳລັງ ແຮງເຂົ້າໃນການຂຸດຄົ້ນແຮ່ກົ່ວຢູ່ບໍ່ໂພນຕິ້ວ ແລະ ບໍ່ແໜ່ງແຂວງຄໍາມ່ວນ ທາງພາກກາງຂອງລາວ, ພວກ ເຂົາບັງຄັບກຳມະກອນອອກແຮງງານ 14-16 ຊົ່ວໂມງຕໍ່ມື້ ອອກແຮງງານຫຼາຍໃຫ້ຄ່າຕອບແທນໜ້ອຍ, ຖືກຕັດເງິນເດືອນ, ໄລ່ອອກການໂດຍບໍ່ມີເຫດຜົນພຽງພໍ, ຖືກທຸບຕີທໍລະມານຢ່າງແສນສາຫັດຈາກພວກນາຍທຶນ, ມີຄວາມສ່ຽງອັນຕະລາຍຕໍ່ການອອກແຮງງານ ໂດຍບັງຄັບເກັບເກນເອົາຊາວໄຮ່ນາໄປ ເປັນກຳມະກອນຮັບຈ້າງ, ເປັນກຸລີຮັບໃຊ້ເຂົາເຈົ້າຕາມລະດູການ ຫຼື ຈະເອີ້ນວ່າ: ກຳມະກອນລະດູການ ເພື່ອສະໜອງໃຫ້ແກ່ການຂຸດຄົ້ນບໍ່ແຮ່ຂອງພວກເຂົາ, ຈຶ່ງໄດ້ສ້າງໂຮງຈັກໄຟຟ້າຢູ່ບາງຕົວເມືອງ ແລະ ຕັ້ງ ບໍລິສັດຂົນສົ່ງທາງນໍ້າ, ສ້າງໂຮງເລື່ອຍໄມ້, ໂຮງສີເຂົ້າ, ຈາກນັ້ນ, ຈຶ່ງເກີດມີກຳມະກອນປະຈຳ ຫຼື ເອີ້ນວ່າ ກຳມະກອນອາຊີບ. ເຫດການທີ່ກ່າວມານັ້ນ, ຊົນຊັ້ນກຳມະກອນລາວ ໄດ້ກຳເນີດ ແລະ ປະກົດຕົວຂຶ້ນ ໃນເງື່ອນໄຂປະຫວັດສາດທີ່ລະອິດລະອ້ຽວ, ແຕ່ນັ້ນມາຊົນຊັ້ນກຳມະກອນລາວ ກໍນັບມື້ມີການ ຂະຫຍາຍຕົວຂຶ້ນຢ່າງຕໍ່ເນື່ອງ, ພ້ອມນີ້ກໍຍົກໃຫ້ເຫັນພາລະບົດບາດ, ສິດ ແລະ ຫນ້າທີ່ ຂອງອົງການຈັດຕັ້ງສະຫະພັນກຳມະບານ ໃນຖານະທີ່ເປັນຕົວແທນແຫ່ງການປົກປ້ອງສິດຜົນປະໂຫຍດອັນຊອບທຳຂອງຊົນຊັ້ນກຳມະກອນ ຊາວຜູ້ອອກແຮງງານຕື່ມອີກ
ຈາກນັ້ນທ່ານ ນ. ສົມສີ ສຸດທິວົງ ຫົວໜ້າຂະແໜງຈັດຕັ້ງ ແລະ ກວດກາ ໄດ້ຜ່ານຂໍ້ຕົກລົງວ່າດ້ວຍ ການມອບຢັ້ງຢືນ ກຳມະບານ 5 ເປັນເຈົ້າ ປະຈຳປີ 2024 ແລະ ຜ່ານຂໍ້ຕົກລົງວ່າດ້ວຍການມອບ ໃບ ຍ້ອງຍໍ ໃຫ້ກຳມະບານຮາກຖານທີ່ໄດ້ປະກອບສ່ວນຊ່ວຍເຫຼືອໄພພິບັດ (ນໍ້າຖ້ວມ) ມອບໃບຍ້ອງຍໍ ຕາງໜ້າຈາກກຳມະບານ 54 ຮາກຖານ ແລະ ກຳມະບານ 11 ຮາກຖານ ຂຶ້ນມອບໂດຍ ທ່ານ ນ.ພອນ ແກ້ວ ຄຸນສົມເຣື່ອງ ປະທານສະຫະພັນກຳມະບາບແຂວງ ແລະ ຂຶ້ນຮັບຕາມລໍາດັບ ແລະ ຜ່ານຂໍ້ຕົກລົງ ວ່າດ້ວຍການມອບ ໃບຊົມເຊີຍ ໃຫ້ກຳມະບານຮາກຖານທີ່ໄດ້ປະກອບສ່ວນຊ່ວຍເຫຼືອໄພພິບັດ ( ນໍ້າ ຖ້ວມ) ຂື້ນມອບໂດຍທ່ານ ຊຽງສີຈັນ ຄໍາປະເສີດ ຮອງປະທານສະຫະພັນກຳມະບານ ແຂວງ ຂື້ນຮັບ ໂດຍຕາງໜ້າຈາກກຳມະບານ 10 ຮາກຖານຂື້ນຮັບຕາມ.
