ພິທີປະກາດແຕ່ງຕັ້ງຕຳແໜງບໍລິຫານປະເພດ 6 – 7 ຂອງຄະນະໂຄສະນາອົບຮົມເມືອງຂວາ
ໃນຕອນບ່າຍຂອງວັນທີ 19 ກຸ່ມພາ 2025 ທີ່ຫ້ອງປະຊຸມຄະນະຈັດຕັ້ງເມືອງ ເມືອງຂວາ ແຂວງຜົ້ງສາລີ ໄດ້ຈັດພິທີປະກາດແຕ່ງຕັ້ງຕຳແໜ່ງບໍລິຫານປະເພດ 6 ແລະ 7 ຂອງຄະນະໂຄສະນາອົບຮົມເມືອງຂວາ ພາຍໃຕ້ການເປັນປະທານ ຂອງ ທ່ານ ແສງສຸລີ ວົງສະຫວັນ ກຳມະການພັກເມືອງ, ຫົວໜ້າຄະນະໂຄສາອົບຮົມເມືອງ, ມີຫ້ອງການທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.
ໃນພິທີ, ທ່ານ ບຸນໄຊ ສົມພານາວັດ ຮອງປະທານກວດກາພັກ-ລັດເມືອງ ໄດ້ຂຶ້ນສະເໜີຈຸດປະສົງ. ຫລັງຈາກນັ້ນ, ທ່ານ ນາງ ໂນລາ ໄຊຍະຈິດ ຫົວໜ້າໜ່ວຍພັກ-ພະນັກງານ ຄະນະຈັດຕັ້ງເມືອງ ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ເລກທີ 83/ມຂ ເມືອງຂວາ,ວັນທີ 12 ກຸມພາ 2025 ວ່າດ້ວຍການແຕ່ງຕັ້ງດຳລົງຕຳແໜ່ງບໍລິຫານ ປະເພດ6 ມີລາຍຊື່ດັ່ງນີ້:
1. ແຕ່ງຕັ້ງ ທ່ານ ອ່ອນສີ ພົນສຸວັນ ຫົວໜ້າໜ່ວຍງານຄົ້ນຄ້ວາ-ສັງລວມ ຫາງສຽງສັງຄົມ ເປັນຫົວໜ້າໜ່ວຍງານບໍລິຫານ.
2. ແຕ່ງຕັ້ງ ທ່ານ ນາງ ຄໍາມະນີ ຈັນຕະກຸນ ຮອງຫົວໜ້າໜ່ວຍງານ ບໍລິຫານ ຂຶ້ນເປັນຫົວໜ້າໜ່ວຍງານ ອົບຮົມ.
3. ໄດ້ຜ່ານຂໍ້ຕົກລົງແຕ່ງຕັ້ງ ສະບັບເລກທີ 69/ຈມ,ວັນທີ 6 ກຸມພາ 2025 ວ່າດ້ວຍການແຕ່ງຕັ້ງ ທ່ານ ນາງ ສຸລີ ຈັນທະລີ ວິຊາການ ຂຶ້ນເປັນຮອງຫົວໜ້າໜ່ວຍງານບໍລິຫານ ທີ່ຂຶ້ນກັບຄະນະໂຄສະນາອົບຮົມເມືອງ. ເງິນອຸດໜູນຕຳແໜ່ງບໍລິຫານ ແມ່ນໃຫ້ປະຕິບັດ ຕາມດຳລັດຂອງລັດຖະບານ ສະບັບເລກທີ 203/ລບ,ລົງວັນທີ 4 ກໍລະກົດ 2017 ຕຳແໜ່ງປະເພດ 6 ແລະ 7.
ເພື່ອເຮັດໃຫ້ພິທີ ມີຄວາມໝາຍ,ຄວາມສຳຄັນ ທ່ານ ແສງສຸລີ ວົງສະຫວັນ ກໍາມະການພັກເມືອງ ຫົວຫນ້າຄະນະໂຄສະນາອົບຮົມເມືອງ ໄດ້ໂອ້ລົມຕໍ່ພິທີ ໂດຍສະເພາະ ແມ່ນ ພະນັກງານຜູ້ທີ່ຖືກແຕ່ງຕັ້ງດຳລົງຕຳແໜ່ງບໍລິຫານໃໝ່ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຜົນງານການຈັດຕັ້ງປະຕິບັດວຽກງານໃນໄລຍະຜ່ານ ແຕ່ລະທ່ານລ້ວນແຕ່ແມ່ນພະນັກງານໜຸ່ມແໜ້ນ,ເປັນຜູ້ທີ່ມີຄວາມຈູບຈ້າວຫ້າວຫັນຕໍ່ໜ້າທີ່ວຽກງານ,ທາງພັກ – ລັດ ຂັ້ນເທິງເຫັນໄດ້ຜົນງານຄວາມສຳຄັນ ຈຶ່ງເລື່ອນຕຳແໜ່ງເປັນຜູ້ບໍລິຫານ,ເມື່ອໄດ້ເລື່ອນຕຳແໜ່ງແລ້ວໃຫ້ແຕ່ລະທ່ານ ເພີ່ມທະວີ ເອົາໃຈໃສ່ຕໍ່ການປະຕິບັດໜ້າທີ່ວຽກງານການເມືອງ, ທີ່ພັກ – ລັດຂັ້ນເທິງມອບໝາຍ ໃຫ້ດີກວ່າເກົ່າ ມີແນວຄິດອຸ່ນອຽນ, ທຸ່ນທຽງ ຝຶກຝົນຫຼໍ່ຫຼອມຕົນເອງ ຊອກຮູ້ຮໍ່າຮຽນ, ສ້າງຄວາມສາມັກຄີພາຍໃນ, ພາຍນອກ ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ເຊື່ອໝັ້ນຕໍ່ການນຳພາຂອງພັກ – ລັດ ເປັນຜູ້ສືບທອດພາລະກິດໃນການປົກປັກຮັກສາ ແລະ ສ້າງສາພັດທະນາປະເທດຊາດ.