ເມືອງໃໝ່ ຫວນຄືນ 3 ວັນປະຫວັດສາດ ທີ່ສຳຄັນຂອງພັກ-ຂອງຊາດ
ໃນຕອນເຊົ້າຂອງ ວັນທີ 04 ມີນາ 2025 ນີ້ ໄດ້ຈັດພິທີເລົ່າຫວນຄືນວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ, ສະເຫຼີມສະຫຼອງວັນສ້າງຕັ້ງ ວັນແມ່ຍິງສາກົນ ຄົບຮອບ 115 ປີີ, ແລະ ຜັນຂະຫຍາຍຜົນສຳເລັດກອງປະຄົບຄະນະຄັ້ງທີ III ຂອງຄະນະກໍາມະການສູນກາງພັກ ກອມມູນິດອິນດູຈີນ ສະໃໝທີ XX ຢູ່ທີ່ສະໂມສອນເມືອງໃໝ່ ແຂວງຜົ້ງສາລີ ໂດຍພາຍໃຕ້ການເປັນທານຂອງ ທ່ານ ພອນທະວີ ໄຊມົນຕີ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງໃໝ່, ມີບັນດາທ່ານກໍາມະການປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ຄະນະບໍລິຫານງານສະຫະພັນແມ່ຍິງ, ພະນັກງານບໍານານ, ປະທານ-ຮອງປະທານສະຫະພັນແມ່ຍິງ ພ້ອມດ້ວຍສະມາຊິກສະຫະພັນແມ່ຍິງ ອ້ອມຂ້າງເທດສະບານເມືອງເຂົ້າຮ່ວມຢ່າງຫຼວງຫຼາຍ.
ໃນພິທີ ທ່ານ ນ ແດງ ຕິດສະພອນ ກຳມະການປະຈຳພັກເມືອງ ປະທານແນວລາວສ້າງຊາດເມືອງ ຜູ້ຊີ້ນຳຂົງເຂດອົງການຈັດຕັ້ງມະຫາຊົນ ໄດ້ຂື້ນເລົ່າຄືນປະຫວັດມູນເຊືື້ອການກຳເນີດຂອງວັນແມ່ຍິງສາກົນ ຄົບຮອບ 115 ປີ ເຊິ່ງໄດ້ຍົກໃຫ້ເຫັນຂະບວນການຕໍ່ສູ້ຂອງແມ່ຍິງໃນທົ່ວໂລກ ທີ່ທວງເອົາສິດສະເໝີພາບລະຫວ່າງ ຍິງ-ຊາຍ, ທວງເອົາຄ່າແຮງງານ ແລະ ທວງໃຫ້ນາຍທຶນຫຼຸດຜ່ອນຊົ່ວໂມງເຮັດວຽກ, ພ້ອມທັງທວງເອົານະໂຍບາຍຕໍ່ແມ່ຍິງໃນເວລາເຈັບປ່ວຍ, ຖືພາ ແລະ ເກີດລູກ, ຍົກໃຫ້ເຫັນພາລະບົດບາດ ແລະ ໜ້າທີ່ຂອງເອື້ອຍນ້ອງສະຫະພັນແມ່ຍິງ ໄດ້ມີການເຕີບໃຫຍ່ຂະຫຍາຍຕົວຢ່າງແຂງແຮງເປັນຕົ້ນແມ່ນອົງການຈັດຕັ້ງ, ສົນທິສັນຍາ, ຖະແຫຼງການ ກອງປະຊຸມຕ່າງໆກ່ຽວກັບແມ່ຍິງໃນລະດັບສາກົນ, ພາກພື້ນ ແລະ ອາຊ້ຽນ, ນະໂຍບາຍຄວາມກ້າວໜ້າຂອງແມ່ຍິງລາວ ວຽກງານການຮ່ວມມືກັບກັບຕ່າງປະເທດ ແລະ ວຽກງານອື່ນໆ, ມາຮອດວັນທີ 8 ມີນາ 1908 ແມ່ຍິງໄດ້ເດີນຂະບວນປະທ້ວງ ເພື່ອໃຫ້ນາຍທຶນ ຫຼຸດຜ່ອນຊົ່ວໂມງເຮັດວຽກ, ຢຸດການຂູດຮີດແຮງງານແມ່ຍິງ ແລະ ເດັກ, ມາເຖິງປີ 1910 ຂະບວນຕໍ່ສູ້ຂອງແມ່ຍິງ ໄດ້ແຜ່ຂະຫຍາຍກ້ວາງອອກສູ່ປະເທດນາຍທຶນ ຢູ່ທະວີບເອີລົບ ແລະ ກອງປະຊຸມສາກົນກ່ຽວກັບບັນຫາແມ່ຍິງ ຄັ້ງທຳອິດໄດ້ຈັດຂື້ນ, ກອງປະຊຸມດັ່ງກ່າວ ໄດ້ຮັບຮອງ ແລະ ຕົກລົງເອົາ ວັນທີ 8 ມີນາ ຂອງທຸກໆປີ ເປັນວັນແມ່ຍິງສາກົນ.
ຈາກນັ້ນ ທ່ານ ນ ສຸກນາວອນ ມະນີວົງ ປະທານສະຫະພັນແມ່ຍິງເມືອງ ໄດ້ຂື້ນຜັນຂະຫຍາຍຜົນສຳເລັດກອງປະຊຸມໃຫຍ່ ຂອງສະຫະພັນແມ່ຍິງເມືອງໃໝ່ ຄັ້ງທີXI. ໃນໂອກາດດຽວກັນນັ້ນ ທ່ານ ສົມປານຈັນທະລາ ກຳມະການພັກເມືອງ ຫົວໜ້າຄະນະໂຄສະນາອົບຮົມເມືອງ ຂື້ນຜັນຂະຫຍາຍຜົນສຳເລັດກອງປະຄົບຄະນະຄັ້ງທີ III ຂອງຄະນະກໍາມະການສູນກາງພັກ ກອມມູນິດອິນດູຈີນ ສະໃໝທີ XX ແລະ ເລົ້າຫວນຄືນວັນຄຽດແຄ້ນຂອງປະຊາຊົນລາວວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອຊາດ ຄົບຮອບ 79 ປີ.
ຈານັ້ນ ທ່ານ ພອນທະວີ ໄຊມົນຕີ ໄດ້ຂື້ນເລົ່າຫວນຄືນມູນເຊື້ອວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ເຊິ່ງທ່ານກໍໄດ້ຍົກໃຫ້ເຫັນການເຕີບໃຫຍ່ຂະຫຍາຍຕົວ, ການເຕົ້າໂຮມປະຊາຊົນລາວບັນດາເຜົ່າ ເພື່ອນຳພາປະເທດລາວຫຼຸດພົ້ນອອກຈາກແອກປົກຄອງຂອງພວກລ່າເມືອງຂື້ນແບບເກົ່າ-ແບບໃໝ່, ໂດຍສະເພາະແມ່ນການນຳພາ-ຊີ້ນຳ ຂອງພັກໃນການຕໍ່ສູ້ກູ້ຊາດໃນຍຸກສະໃໝ ຈົນມາຮອດປະຈຸບັນ, ຍົກໃຫ້ເຫັນເຖິງທາດແທ້, ພາລະບົດບາດນຳໜ້າຂອງພັກປະຊາຊົນປະຕິວັດລາວ ອັນມີກຽດສະງ່າ ແລະ ໜັກແໜ້ນ.