ສຳເລັດກອງປະຊຸມໃຫຍ່ຜູ້ແທນ ອົງຄະນະພັກ ເມືອງຍອດອູ ຄັ້ງທີ X
ກອງປະຊຸມໃຫຍ່ຜູ້ແທນອົງຄະນະພັກເມືອງຍອດອູ ແຂວງ ຜົ້ງສາລີ ຄັ້ງທີ X ໄດ້ໄຂຂຶ້ນໃນຕອນເຊົ້າຂອງວັນທີ 27 ກຸມພາ ແລະ ອັດລົງໃນວັນທີ 28 ກຸມພາ 2025 ພາຍຫລັງໄດ້ດໍາເນີນມາເປັນເວລາ 2 ວັນ. ເຊິ່ງມີຜູ້ເຂົ້າຮ່ວມທັງໝົດ 193 ສະຫາຍ, ຍິງ 21 ສະຫາຍ ໃນນັ້ນມີຜູ້ແທນສົມບູນ 149 ສະຫາຍ, ຍິງ 18 ສະຫາຍ ເຊິ່ງເປັນຕົວແທນໃຫ້ແກ່ສະມາຊິກພັກທັງໝົດ 1,512 ສະຫາຍ, ຍິງ 477 ສະຫາຍ, ແຂກເຊີນ 42 ສະຫາຍ, ຍິງ 3ສະຫາຍ.
ກອງປະຊຸມໃຫຍ່ ຜູ້ແທນອົງຄະນະພັກເມືອງຍອດອູ ຄັ້ງທີ X ໄດ້ລົງປະຊາມະຕິເປັນເອກະສັນ ຮັບຮອງເອົາບົດລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ບົດສຳຫຼວດການນຳພາລວມຂອງຄະນະບໍລິຫານງານພັກເມືອງ ສະໄໝທີ IX ຊຶ່ງໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການນຳພາ-ຊີ້ນຳ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ ໃນ 5 ປີຜ່ານມາ, ພ້ອມນີ້ ກອງປະຊຸມຍັງໄດ້ເປັນເອກະສັນກັນຮັບຮອງເອົາທິດທາງ, ຄາດໝາຍສູ້ຊົນ 5 ປີ ແຕ່ນີ້ຮອດປີ 2029 ໂດຍຈະສຸມໃສ່ການປັບປຸງ, ກໍ່ສ້າງຄະນະພັກ, ສະມາຊິກພັກແຕ່ລະຂັ້ນ ໃຫ້ໜັກແໜ້ນເຂັ້ມແຂງດ້ານການເມືອງແນວຄິດ, ການຈັດຕັ້ງ ແລະ ແບບແຜນນໍາພາທີ່ດີ ສາມາດເປັນແບບຢ່າງນໍາໜ້າ ໃນການຈັດຕັ້ງປະຕິບັດວຽກງານຢ່າງແທ້ຈິງ; ປັບປຸງວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ເປັນຂະບວນກວ້າງຂວາງ, ມີຄວາມເຂັ້ມແຂງ ແລະ ຖືເອົາວຽກງານດັ່ງກ່າວເປັນໜ້າທີ່ຄວາມຮັບຜິດຊອບ ຂອງທົ່ວປວງຊົນຊາວເມືອງຍອດອູ, ສູ້ຊົນພັດທະນາເສດຖະກິດຂອງເມືອງໃຫ້ຂະຫຍາຍຕົວຕໍ່ເນື່ອງ ແລະ ຍຶນຍົງ ຕາມທິດສ້າງເສດຖະກິດ ເອກະລາດເປັນເຈົ້າຕົນເອງ. ເອົາໃຈໃສ່ອະນຸລັກຮັກສາ, ສົ່ງເສີມວັດທະນະທໍາ ຮີດຄອງປະເພນີອັນດີງາມຂອງເຜົ່າໃຫ້ຍືນຍົງ, ປັບປຸງ ແລະ ສ້າງສື່ມວນຊົນໃຫ້ວອງໄວ, ທັນສະໄໝ.
ກອງປະຊຸມໄດ້ຮັບຟັງການລາຍງານ, ການປະກອບຄຳຄິດຄຳເຫັນ ຈາກຜູ້ແທນ ຕາງໜ້າຂົງເຂດພັກ-ພະນັກງານ, ຂົງເຂດປ້ອງກັນຊາດ-ປ້ອງກັນຄວາມສະຫງົບ, ຂົງເຂດປົກປ້ອງກົດໝາຍ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ໜ່ວຍພັກຕົວແບບໃນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ຄອບຄົວຕົວແບບການລ້ຽງສັດໃຫຍ່, ຫັດຖະກຳປັ້ນຫຼໍ່ ແລະ ບ້ານຕົວແບບກຸ່ມທ້ອນເງິນ, ຈາກນັ້ນ ຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະບໍລິຫານງານພັກເມືອງຍອດອູ ສະໄໝທີ X ບົນພື້ນຖານຫຼັກການລວມສູນປະຊາທິປະໄຕ ຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້, ເຊິ່ງມີຜູ້ອອກສະໝັກເລືອກຕັ້ງທັງໝົດ 32 ສະຫາຍ, ຍິງ 04 ສະຫາຍ ແລະ ເລືອກໄດ້ 27 ສະຫາຍ, ຍິງ 03 ສະຫາຍ, ກອງປະຊຸມຄັ້ງປະຖົມມະລຶກ ໄດ້ເລືອກຕັ້ງເອົາ ຄະນະປະຈໍາພັກເມືອງຍອດອູ ຊຸດໃໝ່ ຈຳນວນ 9 ສະຫາຍ, ເຫັນດີເປັນເອກະສັນກັນຢ່າງສົມບູນ ຮັບຮອງເອົາ ເລຂາ, ຮອງເລຂາຄະນະບໍລິຫານງານພັກເມືອງຍອດອູ ຊຸດໃໝ່ ໂດຍເລືອກເອົາ ສະຫາຍ ສົມຫວັງ ສຸມວິໄລ ເປັນເລຂາຄະນະບໍລິຫານຫານງານພັກເມືອງ, ສະຫາຍ ທອງສີ ອິນຈັກ ແລະ ສະຫາຍ ສົມບູນ ອິນໃຈ ເປັນຮອງເລຂາຄະນະບໍລິຫານຫານງານພັກເມືອງ, ກອງປະຊຸມຍັງ ໄດ້ຮັບຮອງເອົາ ປະທານ ແລະ ຮອງປະທານກວດກາພັກເມືອງຍອດອູ ຊຸດໃໝ່ ໂດຍເລືອກເອົາ ສະຫາຍ ສົມບູນ ອິນໃຈ ເປັນປະທານຄະນະກວດກາພັກເມືອງ, ສະຫາຍ ພູວີ ແສງເມືອງ ແລະ ສະຫາຍ ນາງ ອ່ອນສີ ໃຈພົມ ເປັນຮອງປະທານຄະນະກວດກາພັກເມືອງ.
ມາໃນຕອນທ້າຍຂອງກອງປະຊຸມ ສະຫາຍ ທອງສີ ເສົາສຸລິພົມ ຮອງເລຂາພັກແຂວງ, ປະທານສະພາປະຊາຊົນແຂວງ ຜົ້ງສາລີ ໄດ້ມີຄຳເຫັນໂອ້ລົມ ເພື່ອເປັນທິດຊີ້ນຳ ໃຫ້ແກ່ຄະນະບໍລິຫານງານພັກເມືອງຊຸດໃໝ່ ແລະ ຜູ້ແທນກອງປະຊຸມໃນການຈັດຕັ້ງປະຕິບັດ ເນື້ອໃນມະຕິກອງປະຊຸມໃຫຍ່ຜູ້ແທນ ອົງຄະນະພັກເມືອງຍອດອູ ຄັ້ງທີ X ໃຫ້ປະກົດຜົນເປັນຈິງ, ນຳໄປຄົ້ນຄ້ວາເຊື່ອມຊຶມ, ຜັນຂະຫຍາຍຈັດຕັ້ງປະຕິບັດ ໃຫ້ເກີດດອກອອກຜົນຕົວຈິງ ນຳເອົາຜົນປະໂຫຍດມາໃຫ້ປະຊາຊົນບັນດາເຜົ່າໃນທົ່ວເມືອງ ເຮັດໃຫ້ຊີວິດການເປັນຢູ່ທາງດ້ານວັດຖຸ ແລະ ຈິດໃຈ ໄດ້ຮັບການຍົກສູງດີຂຶ້ນເປັນກ້າວໆ.
