ກອງປະຊຸມ ທາບທາມບຸກຄະລາກອນ
ທີ່ຈະອອກຮັບສະໜັກເລືອກຕັ້ງ ເອົາຄະນະບໍລິຫານງານພັກເມືອງໃໝ່ ແຂວງຜົ້ງສາລີ ສະໄໝທີ XV ຮອບທີ III
ໃນຕອນເຊົ້າຂອງວັນທີ 16 ມີນາ 2025 ຢູ່ທີ່ສະໂມສອນໃຫຍ່ຂອງ ເມືອງໃໝ່ ແຂວງຜົ້ງສາລີ ໄດ້ຈັດກອງປະຊຸມທາບທາມບຸກຄະລະກອນທີ່ອອກຮັບສະໜັກເລືອກຕັ້ງເອົາຄະນະບໍລີງານພັກເມືອງໃໝ່ ສະໄໝທີ XV ຮອບທີ່ III ໂດຍການໃຫ້ກຽດເຂົ້າຮ່ວມຂອງ ສະຫາຍ ພົຈວ ຄໍາຈັນ ແສງລາວົງ ກຳມະການປະຈຳພັກແຂວງ, ຫົວໜ້າກອງບັນຊາການປ້ອງກັນຄວາມສະງົບແຂວງ, ຜູ້ຊີ້ນຳວຽກງານຮອບດ້ານເມືອງໃໝ່, ມີສະຫາຍ ບຸນທະວີ ສໍສຸກັນ ກຳມະການປະຈໍາພັກແຂວງ ປະທານກວດກາພັກ-ລັດແຂວງ ຮອງຫົວໜ້າອະນຸກໍາມະການບຸກຄະລະກອນຂັ້ນແຂວງຜົ້ງສາລີ, ມີສະຫາຍ ພອນພະວີ ໄຊມົນຕີ ກໍາມະການພັກແຂວງ ເລຂາຄະນະບໍລິຫານພັກເມືອງ ເຈົ້າເມືອງໆໃໝ່ ມີບັນດາສະຫາຍຄະນະບໍລິຫານງານພັກເມືອງ, ມີຄະນະຮັບຜິດຊອບປັບປຸງກົງຈັກການຈັດຕັ້ງຂັ້ນແຂວງ, ຂັ້ນເມືອງ, ມີຜູ້ແທນກອງປະຊຸມອ້ອມຂ້າງເມືອງເຂົ້າຮ່ວມ.
ໃນກອງປະຊຸມ, ສະຫາຍ ນາງ ພອນສະຫວັນ ສັກຕິຄຸນ ຫົວໜ້າຄະນະໂຄສະນາອົບຮົມແຂວງ ໄດ້ເຜີຍແຜ່ເອກະສານຄວາມເຂົ້າໃຈກ່ຽວກັບການ ດໍາເນີນກອງປະຊຸມໃຫຍ່ 3 ຂັ້ນຂອງພັກ, ຍົກສຸງຄວາມສາມາດນໍາພາ ແລະ ຄວາມເປັນແບບຢ່າງນໍາໜ້າຂອງພັກ, ຕັ້ງໜ້າຝຶກຝົນຫຼໍ່ຫຼອມຄຸນທາດການເມືອງ ແລະ ຄຸນສົມບັດສິນທໍາປະຕິວັດ, ເດັດດ່ຽວແກ້ໄຂປະກົດການຫຍໍ້ທໍ້ໃນຖັນແຖວພະນັກງານ,ສະມາຊິກພັກ, ຂໍ້ຫ້າມສໍາລັບສະມາຊິກພັກ, ຈາກນັ້ນ ສະຫາຍພອນພະວີ ໄຊມົນຕີ ກໍາມະການພັກແຂວງ ເລຂາຄະນະບໍລິຫານພັກເມືອງ ເຈົ້າເມືອງໆໃໝ່ ໄດ້ສະເໜີຮ່າງບົດລາຍການການເມືອງສອງພາກ, ກອງປະຊຸມຍັງຮັບຟັງຮ່າງແຜນພັດທະນາເສະຖະກິດ-ສັງຄົມ 5 ປີຂອງເມືອງ ແລະ ບົດ ກອງປະຊຸມໄດ້ປະກອບຄໍາຄິດຄໍາເຫັນໃສ່ຮ່າງລາຍງານການເມືອງ, ຮ່າງແຜນພັດທະນາເສະຖະກິດ-ສັງຄົມ 5 ປີຂອງເມືອງ ແລະ ເພື່ອໃຫ້ມີເນື້ອໃນຄົບຖ້ວນສົມບູນຂຶ້ນກ່ວາເກົ່າ.
ໂອກາດເຂົ້າຮ່ວມກອງປະຊຸມ ສະຫາຍ ພົຈວ ຄໍາຈັນ ແສງລາວົງ ກໍ່ໄດ້ມີຄໍາເຫັນວ່າ: ກອງປະຊຸມຄັ້ງນີ້ຈະໄດ້ຄັດເລືອກເອົາບຸກຄະລາກອນ ຜູ້ທີ່ມີມາດຖານເງື່ອນໄຂ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມຮູ້ ຄວາມສາມາດ, ມີແບບແຜນນໍາພາ-ວິທີເຮັດວຽກທີ່ດີ ແລະ ມີແບບແຜນດໍາລົງຊີວິດ ທີ່ປອດໃສບໍລິສຸດ ສະນັ້ນ ຈຶ່ງຮຽກຮ້ອງມາຍັງຜູ້ແທນທີ່ເຂົ້າຮ່ວມປະຊຸມທຸກສະຫາຍ ຈົ່ງຍົກສູງສະຕິຄວາມຮັບຜິດຊອບ, ຄົ້ນຄ້ວາພິຈາລະນາ ຢ່າງຖີ່ຖ້ວນ, ພາວະວິໄສ ເພື່ອເລືອກເຟັ້ນເອົາຜູ້ທີ່ມີມາດຖານເງື່ອນໄຂຄົບຖ້ວນ ແລະ ໂດດເດັ່ນ ເຂົ້າໃນເປົ້າໝາຍ ເປັນພະນັກງານນໍາພາ-ຄຸ້ມຄອງ ເພື່ອນໍາພາ-ຊີ້ນໍາວຽກງານອົງການປົກຄອງເມືອງ ໃຫ້ມີການພັດທະນາດີຂຶ້ນ. ຈາກນັ້ນ, ຄະນະຮັບຜິດຊອບບຸກຄະລາກອນຂັ້ນແຂວງ ສະເໜີໂດຍສັງລວມຜົນຂອງການດໍາເນີນຊີວິດການເມືອງ ຂອງຄະນະບໍລິຫານງານພັກເມືອງ ແລະ ຜ່ານມາດຖານເງື່ອນໄຂຂອງພະນັກງານນໍາພາ-ຄຸ້ມຄອງ ແລະ ມາດຖານສະເພາະຂອງຄະນະບໍລິຫານງານພັກເມືອງ, ພ້ອມທັງແນະນໍາການທາບທາມ ແລະ ດໍາເນີນການທາບທາມໃນຮອບທີ 3 ຕາມລະບຽບການ.
