ເມືອງບຸນໃຕ້ ແຂວງຜົ້ງສາລີ ດໍາເນີນກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງ
ກອງປະຊຸມໃຫຍ່ຜູ້ແທນອົງຄະນະພັກ ເມືອງບຸນໃຕ້ ຄັ້ງທີ VII ໄດ້ໄຂຂື້ນຢ່າງເປັນທາງການ ທີ່ ສະໂມສອນໃຫຍ່ຂອງເມືອງ ໃນວັນທີ 03 ມີນາ 2025 ແລະ ຈະອັດລົງໃນຕອນບ່າຍຂອງວັນທີ 4 ມີນາ 2025 ນີ້. ໂດຍເປັນກຽດຢ່າງສູງ ທີ່ໄດ້ຕ້ອນຮັບ ສະຫາຍ ຄຳຜອຍ ວັນນະສານ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ຜົ້ງສາລີ ທີ່ໄດ້ນໍາເອົາຄວາມເປັນຫ່ວງເປັນໃຍ, ຄວາມສາມັກຄີຮັກແພງຂອງຄະນະບໍລິຫານງານພັກແຂວງ ມາສູ່ກອງປະຊຸມໃຫ່ຍຄັ້ງທີ VII ຂອງອົງຄະນະພັກເມືອງ. ນອກຈາກນັ້ນ ຍັງມີບັນດາສະຫາຍຜູ້ຕາງໜ້າຈາກ ຄະນະກວດກາພັກແຂວງ, ຄະນະຈັດຕັ້ງແຂວງ, ຜູ້ແທນຈາກບັນດາພະແນກການຂັ້ນແຂວງ, ຄະນະພັກເມືອງ 3 ເມືອງໃຕ້ ຂອງແຂວງຜົ້ງສາລີ ແລະ ບັນດາສະມາຊິກພັກອາວຸໂສ, ພະນັກງານບໍານານ, ສະຫາຍເລຂາຄະນະພັກຮາກຖານ, ຜູ້ແທນສົມບູນ, ຊຶ່ງເປັນຕົວແທນໃຫ້ແກ່ ສະມາຊິກພັກທັງໝົດ ທີ່ຂຶ້ນກັບອົງຄະນະພັກເມືອງບຸນໃຕ້ ເຂົ້າຮ່ວມທັງໝົດ 151 ສະຫາຍ.
ໃນກອງປະຊຸມ ສະຫາຍ ນາງ ສຸກສະຫວັນ ສຸລິຄຳ ກຳມະການປະຈຳພັກເມືອງ, ຫົວໜ້າຄະນະຈັດຕັ້ງເມືອງ ໄດ້ຜ່ານມະຕິຕົກລົງຂອງຄະນະປະຈຳພັກແຂວງ ສະບັບເລກທີ 74 /ຄພຂ, ລົງວັນທີ 27 ກຸມພາ 2025 ວ່າດ້ວຍການອະນຸມັດດໍາເນີນກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງບຸນໃຕ້ ແລະ ລາຍງານຄຸນລັກສະນະຂອງຜູ້ແທນກອງປະຊຸມໃຫຍ່. ຈາກນັ້ນ ສະຫາຍ ທອງສິງ ອິນທະແສງ ວ່າການແທນເລຂາພັກເມືອງ, ເຈົ້າເມືອງບຸນໃຕ້ ໄດ້ມີຄຳເຫັນ ແລະ ກ່າວເປີດກອງປະຊຸມຢ່າງເປັນທາງການວ່າ: ກອງປະຊຸມໃຫຍ່ຄັ້ງນີ້, ແມ່ນເຫດການ ການເມືອງທີ່ສໍາຄັນຍິ່ງ ແລະ ທັງເປັນຂິດໝາຍປະຫວັດສາດແຫ່ງການເຕີບໃຫຍ່ຂະຫຍາຍຕົວ ຂອງອົງຄະນະພັກເມືອງບຸນໃຕ້ ໃນໄລຍະໃໝ່, ຊຶ່ງຢູ່ໃນສະພາບແວດລ້ອມຂອງໂລກ, ຂອງປະເທດ, ຂອງແຂວງ ແລະ ຂອງພາຍໃນເມືອງ ປະສົບກັບຄວາມຫຍຸ້ງຍາກຫຼາຍດ້ານ, ມີທັງກາລະໂອກາດ, ສິ່ງເອື້ອອໍານວຍ, ມີສິ່ງທ້າທາຍ ທົດສອບຫຼາຍຢ່າງ ທີ່ພວກເຮົາໄດ້ຜ່ານຜ່າ ແລະ ຍັງຈະໄດ້ສຶບຕໍ່ບຸກບືນຜ່ານຜ່າ, ກ້າວຂຶ້ນໃນຕໍ່ໜ້າ. ກອງປະຊຸມໃຫຍ່ຂອງພວກເຮົາຈະໄດ້ດຳເນີນເປັນເວລາ 2 ວັນຄື: ວັນທີ 3-4 ມີນາ ນີ້. ເຊິ່ງໃນກອງປະຊຸມຜູ້ແທນທັງໝົດ ຈະໄດ້ສູມສະຕິປັນຍາໃນການຄົ້ນຄວ້າຮັບຮອງບັນຫາສໍາຄັນຫຼາຍດ້ານ ເປັນຕົ້ນ: ຈະໄດ້ຕີລາຄາການຈັດຕັ້ງປະຕິບັດມະຕິກອງປະຊຸມໃຫ່ຍ ຜູ້ແທນທົ່ວອົງຄະນະພັກເມືອງບຸນໃຕ້ ຄັ້ງທີ VI ຕິດພັນກັບການປະເມີນຢ່າງກວມລວມ, ການຖອດຖອນບົດຮຽນອັນເປັນປະໂຫຍດ ແລະ ຕົກລົງທິດທາງໜ້າທີ່ລວມ, ແຜນນະໂຍບາຍ ແລະ ວາງທິດຊີ້ນໍາ ຕໍ່ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IV ໃນຕໍ່ໜ້າ ເພຶ່ອສຶບຕໍ່ບູລະນະລະບອບປະຊາທິປະໄຕ ປະຊາຊົນ ແລະ ສ້າງປະຖົມປັດໃຈ ໃນການພັດທະນາເມືອງບຸນໃຕ້ ໃຫ້ເປັນເມືອງພັດທະນາກ້າວຂື້ນຢ່າງບໍ່ຢຸດຢັ້ງ.
ກອງປະຊຸມຄັ້ງນີ້, ຍັງຈະໄດ້ພິຈາລະນາ ແລະ ຮັບຮອງບົດສໍາຫຼວດການນໍາພາລວມຂອງຄະນະບໍລິຫານງານພັກເມືອງ ຊຸດທີ VI ທີ່ໄດ້ນໍາພາ-ຊີ້ນໍາ ທັງເປັນໃຈກາງໃນການຈັດຕັ້ງປະຕິບັດມະຕິ ທີ່ມີຜົນສໍາເລັດ, ໃນພາລະກໍາປະຫວັດສາດ ອັນມີກຽດສະຫງ່າ ຂອງຕົນໃນໄລຍະໃໝ່;
ໜ້າທີ່ສໍາຄັນອີກດ້ານໜຶ່ງ ຂອງກອງປະຊຸມໃຫ່ຍຈະໄດ້ດໍາເນີນການເລືອກຕັ້ງຄະນະບໍລິຫານງານພັກເມືອງຊຸດທີ VII ເພື່ອສືບຕໍ່ເປັນຫຼັກແຫຼງແກ່ນສານ ນໍາພາ-ຊີ້ນໍາວຽກງານຮອບດ້ານຢູ່ເມືອງບຸນໃຕ້ ແລະ ເຮັດໃຫ້ຖັນແຖວການນໍາຂັ້ນສູງ ຂອງອົງຄະນະພັກເຮົາ ນັບມື້ນັບໜຸ່ມແໜ້ນ ປ່ຽມລົ້ນໄປດ້ວຍສະຕິປັນຍາ ໂດຍຄັດເລືອກເອົາບັນດາສະຫາຍທີ່ມີມາດຖານ ເງື່ອນໄຂຄົບຖ້ວນ ເພຶ່ອແບກຫາບໜ້າທີ່ອັນໜັກໜ່ວງທີ່ພັກ ແລະ ປະຊາຊົນມອບໝາຍໃຫ້. ພ້ອມດຽວກັນນັ້ນ ໃນກອງປະຊຸມຈະໄດ້ຮັບຟັງການລາຍງານໜ່ວຍພັກຕົວແບບ ໃນການສ້າງໜ່ວຍພັກປອດໃສ, ເຂັ້ມແຂງ, ໜັັກແໜ້ນ, ຄອບຄົວຕົວແບບ ການປູກພັກ, ການລ້ຽງປາ ແລະ ຄອບຄົວຕົວແບບ ໃນ ດ້ານການຈັກສານຜະລິດຕະພັນຫວາຍ ຂອງເມືອງບຸນໃຕ້ ແລະ ປະກອບຄໍາຄິດຄໍາເຫັນໃສ່ຮ່າງລາຍງານຂອງກອງປະຊຸມ. ຈາກນັ້ນ, ກໍຈະໄດ້ດໍາເນີນການເລືອກເອົາຜູ້ແທນສົມບູນ ແລະ ສໍາຮອງ ເພຶ່ອເປັນຕົວແທນໃຫ້ອົງຄະນະພັກເມືອງ ເຂົ້າຮ່ວມກອງປະຊຸມໃຫ່ຍອົງຄະນະພັກແຂວງຜົ້ງສາລີ ຄັ້ງທີ XII ທີ່ຈະໄຂຂຶ້ນໃນຕໍ່ໜ້າ, ກອງປະຊຸມໃຫຍ່ ຍັງຈະໄດ້ຮັບຟັງຄຳເຫັນຊີ້ນຳຂອງສະຫາຍ ຄຳຜອຍ ວັນນະສານ ກຳມະການສຸນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງຜົ້ງສາລີ ເພື່ອເປັນທິດທາງ ໃຫ້ແກ່ການເຄື່ອນໄຫວວຽກງານ ຂອງອົງຄະນະພັກເມືອງ ຄັ້ງທີ VII ໃນຕໍ່ໜ້າ;