ສຳເລັດການປະເມີນແມ່ຍິງ 3 ດີ ຂອງໜ່ວຍສະຫະພັນແມ່ຍິງຄະນະໂຄສະນາອົບຮົມແຂວງ ປະຈຳປີ 2023
ເພື່ອປະຕິບັດຕາມແຈ້ງການຂອງສະຫະພັນແມ່ຍິງແຂວງ ສະບັບເລກທີ 509/ສຍຂ, ລົງວັນທີ 31 ສິງຫາ 2023 ວ່າດ້ວຍການຈັດຕັ້ງວຽກງານຂໍ້ແຂ່ງຂັນ 3 ດີ ປະຈຳປີ 2023. ມາໃນຕອນເຊົ້າຂອງວັນທີ 12 ຕຸລາ 2023 ຜ່ານມານີ້ ໜ່ວຍແມ່ຍິງ
ຄະນະໂຄສະນາອົບຮົມແຂວງ ໄດ້ຈັດໃຫ້ມີກອງປະຊຸມປະເມີນຂໍ້ແຂ່ງຂັນ 3 ດີ ປະຈຳປີ 2023 ຂຶ້ນຢ່າງເປັນທາງການ ນະທີ່ຫ້ອງປະຊຸມຂອງຄະນະໂຄສະນາອົບຮົມແຂວງ. ໂດຍການເປັນປະທານຂອງ ທ່ານ ນ. ຈັນມະນີ ນາມວົງ ກຳມະການພັກແຂວງ, ຫົວຫນ້າຄະນະໂຄສະນາອົບຮົມແຂວງ ພ້ອມດ້ວຍເອື້ອຍນ້ອງແມ່ຍິງພາຍໃນໜ່ວຍແມ່ຍິງຄະນະໂຄສະນາອົບຮົມແຂວງເຂົ້າຮ່ວມທັງໜົດ 10 ສະຫາຍ.
ການປະເມີນຜົນຄັ້ງນີ້ ກໍເພື່ອຕີລາຄາຜົນງານດ້ານດີ ແລະ ອ່ອນຂໍ້ຄົງຂ້າງຂອງແຕ່ລະສະຫາຍຕະຫຼອດໄລຍະ 1 ປີຜ່ານມາ ມີການຕຳນິຕິຊົມເຊິ່ງກັນ ແລະ ກັນດ້ວຍຄວາມຈິງໃຈ ເພື່ອພ້ອມກັນກ້າວໜ້າ ແລະ ມີຄວາມເປັນເອກະພາບກັນໃນການປະຕິບັດຕາມຂໍ້ແຂ່ງຂັນ 3 ດີ ປະຈຳປີ 2023 ເອົາໃຈໃສ່ປະຕິບັດວຽກງານຕາມແຕ່ລະໄລຍະທີ່ທາງສູນກາງສະຫະພັນແມ່ຍິງລາວ ກໍຄືຂອງສະຫະພັນແມ່ຍິງແຂວງ ວາງອອກໃຫ້ໄດ້ຮັບຜົນດີກວ່າເກົ່າ ຜ່ານການປະເມີນຂໍ້ແຂ່ງຂັນ 3 ດີ ປະຈຳປີ 2023 ຂອງໜ່ວຍແມ່ຍິງຄະນະໂຄສະນາອົບຮົມແຂວງໃນຄັ້ງນີ້, ໃຫ້ບັນດາສະຫາຍເອື້ອຍນ້ອງແມ່ຍິງພາຍໃນໜ່ວຍຄະນະໂຄສະນາອົບຮົມແຂວງ ຕີຄະແນນໃສ່ໃບປະເມີນຜົນຂອງຕົນເອງຕາມແຕ່ລະມາດຖານ ພ້ອມທັງປະເມີນຂອງໜ່ວຍແມ່ຍິງ.
ໃນຕອນທ້າຍຂອງພິທີກໍ່ໄດ້ຮັບຟັງການໂອ້ລົມ ແລະ ຄຳໂອວາດ ຂອງ ທ່ານ ນ. ຈັນມະນີ ນາມວົງ ກຳມະການພັກແຂວງ, ເລຂາໜ່ວຍພັກ, ຫົວໜ້າຄະນະໂຄສະນາອົບຮົມແຂວງ. ຊຶ່ງກ່ອນອື່ນທ່ານ ກໍໄດ້ສະແດງຄວາມຍ້ອງຍໍຊົມເຊີຍຕໍ່ສະມາຊິກເອື້ອຍນ້ອງແມ່ຍິງພາຍໃນໜ່ວຍສະຫະພັນແມ່ຍິງຄະນະໂຄສະນາອົບຮົມແຂວງ ແລະ ທ່ານກໍໄດ້ຍົກໃຫ້ເຫັນເຖິງກົດລະບຽບຂອງສູນກາງສະຫະພັນແມ່ຍິງລາວ, ຂອງສະຫະພັນແມ່ຍິງແຂວງ ກໍຄື ຂອງໜ່ວຍສະຫະພັນແມ່ຍິງຄະນະໂຄສະນາອົບຮົມແຂວງ, ແມ່ນຕົວແທນຂອງແມ່ຍິງລາວບັນດາເຜົ່າ ທັງເປັນຕົວແທນທີ່ຈົ່ງຮັກພັກດີ ຢ່າງສະເໝີຕົ້ນສະເໝີປາຍ ຕໍ່ສິດ ແລະ ຜົນປະໂຫຍດຂອງແມ່ຍິງລາວ ກໍຄື ບົດບາດຍິງ-ຊາຍ.