ເຈົ້າແຂວງຜົ້ງສາລີ ລົງຕິດຕາມຊຸກຍູ້ການເຮັດນາແຊງ (ນາຫວ່ານ) ຢູ່ເມືອງໃໝ່
ໃນໂອກາດທີ່ ທ່ານ ຄຳຜອຍ ວັນນະສານ ກຳມະການສູນກາງພັກ ເລຂາພັກແຂວງ, ເຈົ້າແຂວງໆຜົ້ງສາລີ ພ້ອມດ້ວຍຂະແໜງການທີ່ກ່ຽວຂ້ອງຂັ້ນແຂວງ ໄດ້ລົງຊຸກຍູ້ວຽກງານຮອບດ້ານຂອງເມືອງ ແລະ ແຜນການກະກຽມກອງປະຊຸມໃຫຍ່ຂອງພັກ 3 ຂັ້ນຢູ່ເມືອງໃໝ່ນັ້ນ. ຕອນບ່າຍຂອງວັນທີ 27 ກຸມພາ 2024 ນີ້, ທ່ານ ຄໍາຜອຍ ວັນນະສານ ເຈົ້າແຂວງຜົ້ງສາລີ ພ້ອມດ້ວຍຂະແໜງການທີ່ກ່ຽວຂ້ອງຂັ້ນແຂວງ, ຂັ້ນເມືອງ ລົງຕິດ ຕາມຊຸກຍູ້ການເຮັດນາແຊງ (ນາຫວ່ານ) ທີ່ບ້ານນໍ້ງາ ເມືອງໃໝ່ ໂດຍມີທ່ານ ສອນສະໜຸກ ສີສຸລາດ ເຈົ້າເມືອງໆໃໝ່ ພ້ອມດ້ວຍການນຳເມືອງໃຫ້ການຕ້ອນຮັບ ແລະ ເຂົ້າຮ່ວມຕິດຕາມ.
ການເຮັດນາແຊງ (ນາວ່ານ) ພາຍໃນເມືອງໃໝ່ ແມ່ນເປັນປີທຳອິດ ຊຶ່ງມີທັງໝົດ ຈໍານວນ 3 ບ້ານຄື: ບ້ານນໍ້າງາ, ບ້ານ ໂພນໄຊ ແລະ ບ້ານ ຫ້ວຍຊອງເໜືອ ທັງໝົດມີ 14 ຄອບຄົວ, ແນວພັນເຂົ້າທັງໝົດ 676 kg ໃນເນື້ອທີ່ທັງໝົດ 8,83 ເຮັກຕາ ໃນນີ້ມີ 1 ຄອບຄົວ ທີ່ບ້ານ ນໍ້ງາ ໄດ້ທົດລອງໃນການເຮັດ(ນາວ່ານ) ຫຼັງ ຈາກທີ່ໄດ້ໄປຖອດຖອນບົດຮຽນການເຮັດນາຫວ່ານຈາກແຂວງດຽນບ່ຽນ, ສສ ຫວຽດນາມ ຈຶ່ງໄດ້ທົດລອງເຮັດນາວ່ານຈໍານວນ 3,3 ຮຕ. ເຊິ່ງໃນນີ້ມີແນວປູກ 221 kg, ເຊິ່ງຈະໃຊ້ເວລາໃນການປູກ ຈົນຮອດລະດູເກັບກ່ຽວແມ່ນ 5-6 ເດືອນ, ແລະ ຄາດວ່າຈະໄດ້ຮັບຜົນຜະລິດ 4 – 5 ໂຕນຕໍ່ເຮັກຕາ. ຊຶ່ງຜ່ານຈາກການເຮັດນາ ( ນາຫວ່ານ ) ໄດ້ມີການແນະນຳດ້ານເຕັກນິກຈາກພາກສ່ວນທີ່ກ່ຽວຂ້ອງ ແລະ ຜູ້ທີ່ເຄີຍເຮັດຕົວຈິງມາແລ້ວ ເປັນຕົ້ນແມ່ນຂັ້ນຕອນການວ່ານເຂົ້າ, ການບົວລະບັດຮັກສາ, ການໃສ່ປຸ້ຍແຕ່ລະໄລຍະ. ພ້ອມກັນນີ້ ທາງຜູ້ເຮັດນາຕົວຈິງໄດ້ສະເໜີນຳພາກສ່ວນກ່ຽວຂ້ອງຊ່ວຍປຸຍ ແລະ ດ້ານເຕັກນິກຕື່ມອີກ. ຜ່ານການລົງ ຢ້ຽມຢາມຄັ້ງນີ້, ທ່ານເຈົ້າແຂວງກໍ່ໄດ້ສະແດງຄວາມຊົມເຊີຍ ຕໍ່ຄວາມພະຍາຍາມໃນການຊອກອາຊີບ ຈາກບົດຮຽນທີ່ຕົນເອງໄດ້ມາ ແລະ ສາມາດສ້າງລາຍຮັບເຂົ້າຄອບຄົວ, ທັງເປັນການສົ່ງເສີມການຜະລິດ ທົດແທນການນໍາເຂົ້າຕາມແນວທາງນະໂຍບາຍຂອງຂັ້ນເທິງໄປເທື່ອລະກ້າວ, ພ້ອມນີ້ທ່ານເຈົ້າແຂວງ ຍັງໄດ້ເນັ້ນໃຫ້ອົງການປົກຄອງເມືອງ ໂດຍສະເພາະແມ່ນຫ້ອງການກະສິກໍາ ແລະ ປ່າໄມ້ເມືອງ ໃຫ້ຄວາມໃກ້ສິດ ແລະ ແນະນໍາໃນດ້ານເຕັດນີກໃນແຕ່ລະໄລຍະ ແລະ ອໍານວຍຄວາມສະດວກດ້ານຕ່າງໆຕື່ມອີກ.
ຈາກນັ້ນທ່ານເຈົ້າແຂວງ ພ້ອມດ້ວຍຄະນະ ຍັງໄດ້ໄປຕິດຕາມການປູກພຶດຜັກຕ່າງໆເປັນສິນຄ້າຂອງປະ ຊາຊົນຢູ່ບ້ານເພ້ຍ ຊຶ່ງສາມາດສ້າງລາຍຮັບໃຫ້ແກ່ຄອບຄົວໜຶ່ງໄດ້ 10 ລ້ານກວ່າກີບຕໍ່ປີ.